Wantete wa Ntinu 7:1-51
7 Solomo mvu 13 kavanga mu tunga e nzo andi,+ yavana kamanisa yo yawonso.*+
2 Otungidi nzo a Mfind’a Lebanone,+ o lambuka kwandi 100 yinkoso* muna sanzuka yinkoso 50, muna lá yinkoso 30; otungidi yo vana ntandu a nlonga yá mia malunzi ma nsedele ye mvuambu za nsedele+ vana ntandu a malunzi.
3 Kuna ntandu, yafukwa mabaya ma nsedele tuka muna mvuambu zakala vana ntandu a malunzi; mvuambu 45, mvuambu 15 muna konso nlonga.
4 Nlonga ntatu mia zianela miakala mo, konso zianela italanene ye zianela yankaka, muna nlonga miau tatu.
5 E mielo miawonso ye tungwa yandi, konko yá yakala* kumosi mpe ye zianela zitalane muna nlonga tatu.
6 Otungidi Seka* dia Malunzi, yinkoso 50 muna lambuka, yinkoso 30 muna sanzuka, diakala ye veta, malunzi yo nludi kuna ntwala.
7 Otungidi mpe Seka dia Kunda,+ muna kefundisila, i sia vo, Seka dia Mfundu+—diafukwa mabaya ma nsedele tuka kuna yanda yamuna mvuambu.
8 Otungidi mpe nzo andi* ya zingila, kuna yanzala kiankaka,+ yavambana ye Seka, mpila mosi yatungilwa. Solomo otungidi mpe nzo yafwanana ye Seka diadi mu kuma kia mwan’ankento a Faro, ona kabonga se nkaz’andi.+
9 E nzo zazi zawonso zatungilwa mu matadi mantalu,+ mavalwa muna tezo, mavadilwa muna selote za matadi tuka muna kati yaku mbazi, tuka muna nkubilwa yakuna ntandu a yaka, kuna mbazi yakuna yanzala kiampwena.+
10 E nkubilwa yasikidisilwa muna matadi mampwena mantalu; e maka matadi yinkoso kumi makala, mankaka yinkoso nana.
11 Vana ntandu a matadi mama, vakala ye matadi mankaka mantalu, mavalwa muna tezo ye mabaya ma nsedele.
12 E yanzala kiampwena kiazieta yaka kia nlonga ntatu mia matadi mavalwa ye nlonga umosi wa mabaya ma nsedele, kiafwanana ye yaka kia yanzala kia kati+ kia nzo a Yave ye veta kia nzo.+
13 Solomo wa Ntinu obokelese Kirami+ kuna Turo.
14 Kirami i mwan’ankento wafwila yakala wa kanda dia Nafetali, se diandi musi Turo, mvangi a lekwa ya nsongo;+ nkwa ngangu ye umbakuzi+ yo zayi wayingi muna salu kiawonso kia nsongo.* Wizidi kwa Solomo wa Ntinu, osadidi salu yandi yawonso.
15 Ovangidi malunzi mole ma nsongo;+ konso lunzi yinkoso 18 diakala muna lá, nsinga wa yinkoso 12 watezela wazieteswanga muna konso lunzi.*+
16 Ovangidi ntu miole mia nsongo yazunzwa miasiwa vana ntandu a malunzi. O ntu umosi yinkoso tanu wakala muna lá, o wankaka yinkoso tanu muna lá.
17 Vana ntu mina vana ntandu a konso lunzi vasiwa makonde mazingwa tuvambu;+ makonde nsambwadi muna ntu umosi, makonde nsambwadi muna ntu wankaka.
18 Ovangidi bundu ya nganata* mu nlonga miole miazieta konso konde muna fuka ntu miakala vana ntandu a malunzi; i una kavangidi muna ntu miau miole.
19 E ntu miakala vana ntandu a malunzi ma veta kia mwelo, miafwanana ye mvuma za lenge-lenge za yinkoso yá muna lá.
20 E ntu miakala vana ntandu a malunzi mau mole, vana kinzieta kiazingwa makonde; 200 za nganata* zasiwa muna nlonga, zazieta konso ntu.+
21 Otelamese malunzi ma veta kia tempelo.*+ Otelamese lunzi dialunene,* ovene dio nkumbu vo Yakini,* i bosi otelamese e lunzi dialumonso,* ovene dio nkumbu vo Boaze.*+
22 E ntu mia malunzi miakala nze mvuma za lenge-lenge. I wau kafokolwela e salu kia malunzi.
23 I bosi, ovangidi Kalunga* kwa sengwa kiazunzwa.+ Kwavindumuka, yinkoso 10 tuka kuna sambu dimosi yakuna sambu diankaka ye yinkoso 5 muna lá, nsinga wa yinkoso 30 uzietele ko.*+
24 Kuna nsi kwakala ye fwaniswa yantoko+ nze nkalu, kumi-kumi muna konso kinkoso, yawonso yazieta Kalunga. Vakala nlonga miole mia fwaniswa ya nkalu, yazunzwa kumosi yo Kalunga.
25 Kwatensekwa vana ntandu a ngombe 12,+ zitatu zitadidi kuna node, zitatu kuna weste, zitatu kuna sude ye zitatu kuna este; o Kalunga kwatensama zo, e nkila miau miawonso mitalanene vana kati.
26 O nkandu andi wa kandazi kia koko;* e mvind’andi wavangwa nze mvind’a mbungwa nze luvuma lwa lenge-lenge. Kwafwana kota 2.000 ma bata.*
27 Ovangidi makalu* kumi+ ma nsongo. Konso kalu yinkoso yá diakala muna lambuka, yinkoso yá muna sanzuka ye yinkoso yá muna lá.
28 E makalu mpila eyi mavangilwa: E yaka yandi ya matolo, e yaka yayi ya matolo yakangama muna tungwa ya makalu.
29 Muna yaka ya matolo mwabandulwa nkosi,+ ngombe ye akelubi,+ muna tungwa mwakala mpe ye fwaniswa yayi. Vana ntandu ye kuna nsi a nkosi ye ngombe, kwakala ye fwaniswa ya mvuma za mabese za zembalala.
30 Konso kalu diakala ye mapine maya ma nsongo ye nkambikwa za nsongo, malu mandi ma konko yau yá i masimbanga mapine. Kuna nsi a longa kwakala ye nsimbi ye fwaniswa ya mvum’a mabese mazunzwa.
31 E mpwasik’a longa mu kati kwa kolowa yakala, kinkoso kimosi muna lá; e mpwasik’a kolowa yavindumuka, o lá kwa nsimbi andi kinkoso kimosi ye ndambu. Muna kolowa mwakala ye fwaniswa. E yaka yandi yau yá ya matolo yafwanana, ke yavindumuka ko.
32 E mapine yá kuna nsi a konko ya yaka makala, e nsimbi za mapine zakangama muna kalu, konso pine diakala ye kinkoso kimosi ye ndambu muna lá.
33 E mapine makala nze mapine ma kalu dia vita. E nsimbi zandi, kangala, nsingala ye sengwa kia kati, yawonso yazunzwa.
34 Nsimbi yá makala muna konso kalu; e nsimbi zazi zazunzwa kumosi ye kalu.
35 Vana ntandu a kalu, vakala ye lukongolo lwa ndambu a kinkoso muna lá, e fwaniswa ye yaka ya matolo vana ntandu a kalu, yazunzwa kumosi ye kalu.
36 Vana ntandu a lukongolo ye yaka ya matolo obandwidi vo akelubi, nkosi ye maba konso vana vafwene, yo zietesa mo mvuma za mabese.+
37 I mpila yayi kavangila makalu kumi;+ mawonso mpila mosi mazunzwa,+ tezo kimosi ye mpwa mosi makala.
38 Ovangidi malonga kumi ma nsongo ma sukulwila;+ konso longa bata 40 diakotanga. Konso longa diakala ye yinkoso yá.* Longa dimosi dimosi diakala muna makalu kumi.
39 Osidi makalu matanu kuna lunene lwa nzo ye makalu matanu kuna lumonso, osidi o Kalunga* kuna ndambu a lunene lwa nzo, kuna sude.+
40 Kirami+ ovangidi mpe malonga ma sukulwila, pawu+ ye pidi.+ Kirami omanisi salu kiawonso kasadidi Solomo wa Ntinu mu kuma kia nzo a Yave:+
41 malunzi mole+ ye ntu miandi miakala nze pidi vana ntandu a malunzi mole; makonde mole+ muna fukila ntu mia malunzi miakala nze pidi vana ntandu a malunzi mau mole;
42 400 za nganata*+ muna makonde mole, nlonga miole mia nganata muna konso konde, muna fukila e ntu mia malunzi miau miole miakala nze pidi;
43 makalu kumi+ ye malonga kumi masukulwila+ makala muna makalu;
44 O Kalunga*+ ye ngombe 12 kuna nsi a Kalunga;
45 yinzu ya katulwila ntoto ampolo, pawu ye pidi ye salanganu yawonso ya nsongo wakenzwa una Kirami kavangila Solomo wa Ntinu mu kuma kia nzo a Yave.
46 O ntinu owumbidi yo muna tuma vana kati kwa Sukote ye Saretani kuna mvivu a Yodani.
47 Solomo kasidi teza zitu dia salanganu yawonso ko, kadi ulolo yakala. E zitu dia nsongo ke diazayakana ko.+
48 Solomo ovangidi salanganu yawonso ya nzo a Yave: ziku+ dia wolo; meza ma wolo+ muna sia mbolo za lutambiku;
49 zangikilwa ya minda+ ya wolo walembi sangwa lekwa, itanu kuna lunene, itanu kuna lumonso vana ntwal’a suku dia kati; mvuma,+ minda ye ziminua ya minda ya wolo;+
50 malonga masukulwila, zengelwa ya nsing’a mwinda,+ pidi, mbungwa+ ye matuka*+ ma wolo walembi sangwa lekwa; tungwa ya yelo ya wolo ya suku dia kati,+ i sia vo, Fulu Kisundidi o Vauka ye yelo ya tempelo,+ ya wolo.
51 Muna mpila yayi Solomo wa Ntinu omanisi e salu yawonso kasala mu kuma kia nzo a Yave. Solomo okotese mo lekwa ina Davidi wa se diandi kavaula,+ osidi palata, wolo ye salanganu yankaka muna malundilu ma nzo a Yave.+
Mvovo vana yand'a lukaya
^ Yovo “lûmbu lwandi lwawonso.”
^ Yovo “ndambu ziya.”
^ Yovo “Veta.”
^ Yovo “lûmbu lwandi.”
^ Yovo “ntaku,” mu tini kiaki ye muna tini yankaka ya kapu kiaki.
^ Yovo “konso lunzi muna malunzi mau mole, yinkoso 12 diakala mu vonga.”
^ I sia vo, bundu kina nze ngavua yovo mfuluta.
^ I sia vo, bundu kina nze ngavua yovo mfuluta.
^ Yovo “dia sude.”
^ Nanga ina ye nsasa vo: “Muna Ngolo.”
^ Yovo “dia node.”
^ Ina ye nsasa vo: “Yandi, [i sia vo, Yave] Katoma Sikidisa.”
^ I sia vo, Fulu Kiavauka.
^ Yovo “lundilu dia maza.”
^ Yovo “yinkoso 30 muna vindumuka.”
^ Yovo “makalu ma natina maza.”
^ Yovo “yinkoso yá muna diâmetro.”
^ I sia vo, lundilu dia maza.
^ I sia vo, bundu kina nze ngavua yovo mfuluta.
^ I sia vo, lundilu dia maza.
^ Yovo “maziku.”
