Wantete wa Ntinu 9:1-28
9 Vava Solomo kamana tunga e nzo a Yave ye nzo* a ntinu+ ye mawonso Solomo kazola vanga,+
2 Yave wamoneka kwa Solomo mu nkumbu anzole, wauna kamonekena kwa yandi kuna Ngibone.+
3 Yave umvovese vo: “Ngwidi e sambu kiaku ye ndomba zaku ova ndose ame. Mvaudi e nzo yayi otungidi, e nkumbu ame ikala mo yakwele mvu,+ o meso mame yo ntim’ame ukala mo ntangwa zawonso.+
4 Vo i ngeye, avo odiatidi ova ndose ame wauna Davidi wa se diaku kadiatila,+ muna ntim’a sikila+ yo unsongi,+ wavanga mawonso ikanikini+ yo lemvokela nsiku miame ye nzengo zame,+
5 ozevo isikidisa e kunda kia kimfumu kiaku muna Isaele yakwele mvu, wauna yasila Davidi wa se diaku o nsilu, oku vo: ‘Muna luvila lwaku ke mukondwa muntu ko ovuanda vana kunda kia kimfumu kia Isaele.’+
6 Kansi, ongeye yo wan’aku avo nuyambwidi kundanda yo lembi lunda nkanikinu miame ye nsiku mina yasikidisa vovo nuina yo kwenda sadila nzambi zankaka yo vumbamene zo,+
7 ozevo ifukisa Isaele muna nsi ina yabavana,+ e nzo eyi mpawidi mu kuma kia nkumbu ame, katula ikatula yo ova meso mame,+ Isaele ikituka se kuma kia luvezo* yo tusevo vana vena nkangu miawonso.+
8 E nzo yayi ikituka se mazumbu.+ Awonso ana beviokela vo, besivika yo sika mumpiozi yo yuvula vo: ‘Ekuma Yave kavangidi e diambu diadi mu nsi yayi ye nzo yayi?’+
9 Bevutula vo: ‘Kadi bayambwidi Yave wa Nzambi au, ona wavaikisa mase mau muna nsi a Engipito, bakwamanene sambila nzambi zankaka, bavumbamene zo yo sadila zo. Kiaki i kuma o Yave kabatwasidi e mpasi zazi zawonso.’”+
10 Kuna mfoko a mvu 20 mina Solomo katunga e nzo zau zole, nzo a Yave ye nzo* a ntinu,+
11 Kirami+ wa ntinu a Turo ovene kwa Solomo mabaya ma nsedele ye sipelese ye wolo wawonso una kazola.+ O Solomo wa Ntinu ovene Kirami mavata 20 muna Ngalili.
12 Muna kuma kiaki, Kirami otukidi kuna Turo, wizidi tala mavata kamvene Solomo, kansi kayangalele mo ko.*
13 Ovovele vo: “E mpangi ame, nkia mpila mavata mama umpene?” I kuma meyikilwanga vo Ntoto a Kabule* yamu unu kiaki.
14 Kirami otwikidi 120 ma talanta* za wolo+ kwa ntinu.
15 Olwalu i lusansu lwa awana kabokelesa Solomo wa Ntinu muna sala e salu yangolo+ muna tunga nzo a Yave,+ nzo* a yandi kibeni, Kundubulu,*+ yaka ya Yerusaleme, Kaso,+ Mengido+ ye Ngeze.+
16 (Faro wa ntinu a Engipito wizidi nuanisa Ngeze, obakidi yo, oyokele yo, ovondele mpe Anekenani+ bakala muna mbanza. Ovene yo se lukau* lwa sindikila mwan’andi,+ wa nkaz’a Solomo.)
17 Solomo otungidi* Ngeze, Bete-korone ya Yanda,+
18 Balati+ yo Tama muna makanga ma nsi,
19 ye mbanza zawonso za malundilu ma Solomo, mbanza za makalu ma vita,+ mbanza za akwa mvalu ye mavata mawonso mana o Solomo kazola tunga muna Yerusaleme, muna Lebanone ye muna nsi yawonso ya luyalu lwandi.
20 Vo i awonso ana basala muna Aneyamore, Anekete, Aneperese, Anekivi yo Aneyebuse,+ ana ke bakala nkangu a Isaele ko,+
21 wan’au ana basala muna nsi—ana ke bafukiswa ko kwa Aneyisaele—Solomo, ubabundwini muna salu yangolo yamu unu kiaki.+
22 Kansi, o Solomo kasidi bunduna muntu ko muna Aneyisaele,+ kadi yau bakala se makesa mandi, selo, afidi, mbanda-mbanda ye mfumu za anati a makalu mandi ma vita ye akwa mvalu.
23 Vakala ye 550 ma mfumu z’akengi ana bavitanga ntu muna salu kia Solomo. Yau batuminanga asadi.+
24 Kansi, mwan’ankento a Faro+ okatukidi muna Mbanz’a Davidi+ otombokele kuna nzo andi ina Solomo kantungila; i bosi, Solomo otungidi Kundubulu.*+
25 Muna konso mvu+ Solomo nkumbu tatu katambikanga yimenga ya ngioka ye yimenga ya ungudi vana ziku dina katungila Yave,+ oyokele ndumbu vana ziku diakala vana ndose a Yave. I mbana kamana tunga e nzo.+
26 Solomo wa Ntinu ovangidi mpe nzaza zayingi kuna Esio-ngebe,+ ina kuna Elate vana kumu dia Mbu Ambwaki, muna nsi a Edome.+
27 O Kirami otumini ntaudi zandi kumosi ye nzaza zazina,+ ana bakulukilwa e salu kia kalunga benda sala kumosi ye ntaudi za Solomo.
28 Bele kuna Ofire,+ babongele ko 420 ma talanta za wolo, batwese zo kwa Solomo wa Ntinu.
Mvovo vana yand'a lukaya
^ Yovo “lûmbu.”
^ Mvovo wa sina: “se ngana.”
^ Yovo “lûmbu.”
^ Mvovo wa sina: “ke mambote ko muna meso mandi.”
^ Nanga, “Ntoto Wakondwa o Mfunu.”
^ Yovo “Milo.” Mvovo wa Kiyibere una ye nsasa vo “zadisa.”
^ Yovo “lûmbu.”
^ Yovo “lukau lwa longo; nkam’a longo.”
^ Yovo “okumikini.”
^ Yovo “Milo.” Mvovo wa Kiyibere una ye nsasa vo “zadisa.”
