Wantete wa Samuele 13:1-23
13 Saulu mvu . . .* kakala miau vava kayantika yala,+ mvu miole kayala muna Isaele.
2 Saulu osolele 3.000 ma wan’a Isaele; 2.000 bakala yo Saulu kuna Mikemase ye muna zunga kia miongo mia Betele, 1.000 bakala yo Yonatane+ kuna Ngibeya+ a Benyamini. Ana basala ubasindikidi konso muntu kuna saba kiandi.
3 Yonatane ovondele makesa ma Afelesetia+ makala kuna Ngeba,+ Afelesetia bawidi wo. Saulu otumini wantu basika e mpungi+ muna nsi yawonso, oku vo: “Yambula Ayibere bawá!”
4 Isaele yawonso bawidi e nsangu vo: “Saulu ovondele makesa ma Afelesetia, muna kuma kiaki, Afelesetia bamengene nkangu a Isaele.” Nkangu ubokeleso balanda Saulu kuna Ngilengale.+
5 Afelesetia mpe balungalakene kimana banuanisa Isaele, 30.000 ma makalu ma vita, 6.000 m’akwa mvalu ye ulolo wa makesa nze senge vana kumu dia kalunga;+ batombokele yo sikidisa ndo kuna Mikemase, kuna este a Betavene.+
6 Wan’a Isaele una bamwene vo mu mpasi bena, kadi o nkangu ubangamene kikilu; baswekamene muna nduka,+ muna mayenga, muna matadi yo mawulu ye sima.
7 Ayibere akaka basaukidi Yodani, bele kuna nsi a Ngadi ye Ngiladi.+ Kansi, Saulu osidi kuna Ngilengale, o nkangu wawonso unlende yo zakama ye wonga.
8 Saulu ovingidi lumbu nsambwadi yamuna kolo kina Samuele kasikidisa, kansi Samuele kalweke ko kuna Ngilengale, o nkangu uyantikidi mwangana vana kena.
9 Saulu ovovele vo: “Nuntwasila kimenga kia ngioka ye kimenga kia ungudi.” Otambikidi kimenga kia ngioka.+
10 Vava kamene tambika kimenga kia ngioka, Samuele olweke. Saulu wele kunkika yo kunkayisa.
11 Samuele unyuvuidi vo: “Adieyi ovangidi?” Saulu ovutwidi vo: “Mbwene vo nkangu umwangane vava ngina,+ ongeye kulweke muna lumbu kiasikidiswa ko, Afelesetia balungalakene kuna Mikemase.+
12 I kuma mpovele vo: ‘Afelesetia bekulumuka muna kundwanisa oku Ngilengale, kivavidi dienga dia* Yave ko.’ I dianu ntambikidi kimenga kia ngioka.”
13 Samuele ovovese Saulu vo: “Dia uzowa ovangidi. O nkanikinu una Yave wa Nzambi aku kavana kulemvokele wo ko.+ Kele vo walemvokela wo, o Yave wadi sikidisa kintinu kiaku muna Isaele yakwele mvu.
14 Kansi, owau kintinu kiaku ke kizingila ko.+ Yave osolola muntu ona oyangidika ntim’andi,+ Yave okuntumbika se ntu muna nkangu andi,+ kadi kulemvokele ko dina Yave kakanikini.”+
15 Samuele ovaikidi muna Ngilengale, otombokele kuna Ngibeya a Benyamini, Saulu otangidi nkangu una wakala yandi; tezo kia 600 za wantu.+
16 Saulu yo mwan’andi Yonatane yo nkangu wasala yau, bakedi kuna Ngeba+ a Benyamini. Afelesetia basikidisi ndo kuna Mikemase.+
17 Buka tatu ya makesa yavaika muna ndo ya Afelesetia. E buka kimosi kiele muna nzil’a Ofera kuna nsi a Suale;
18 E buka kiankaka kiele muna nzil’a Bete-korone;+ e buka kiantatu kiele muna nzil’a mvivu utalanini ye ndimb’a Seboime kuna makanga.
19 Muna nsi a Isaele ke mwakala mvangi a lekwa ya sengwa ko, kadi Afelesetia bavova vo: “Ke tuyambula ko vo Ayibere bavanga nsosolo ngatu madionga.”
20 Aneyisaele awonso bakulumukanga kwa Afelesetia mu sekesa nsengo zau, masoka,* tanzi ye timinua yovo mpalu.
21 Pimi* kimosi bafutanga muna sekesa nsengo, nsoma, soka, tanzi, timinua ye mpalu.
22 Ozevo, muna lumbu kia vita, ke vakala muntu ko wakala ye nsosolo yovo dionga muna alandi a Saulu yo Yonatane;+ Saulu kaka yo mwan’andi Yonatane bakala ye nuaninua.
23 Buka kimosi kia Afelesetia kiayenda muna mvuila mia Mikemase.+
Mvovo vana yand'a lukaya
^ E ntalu ke ina ko muna sono ya Kiyibere.
^ Yovo “kilembekele ntim’a.”
^ Yovo “sengele.”
^ Kuna nz’ankulu i kunku yole ya sekele.
