Wantete wa Samuele 14:1-52
14 Lumbu kimosi Yonatane+ wa mwan’a Saulu ovovele kwa toko wa nati a nuaninua yandi vo: “Wiza twasauka kuna sambu diankaka kuna ndo ya Afelesetia.” Kansi kavovele wo kwa se diandi ko.
2 Saulu onangini kuna mwingilu a Ngibeya+ kuna nsi a nti a nganata* kuna Mingerone, 600 za wantu bakala yandi.+
3 (Akiya wa mwan’a Akitubi,+ wa mpangi a Ikabode+ wa mwan’a Finekase+ wa mwan’a Ele+ wa ngang’a Yave kuna Silo+ yandi wanatanga kidukula.)+ O nkangu ke wazaya wo ko vo Yonatane ovaikidi.
4 Muna fulu ina Yonatane kavavanga viokela mu lwaka muna ndo ya Afelesetia, mwakala ye matadi mole mampwena masongoka nze dinu, dimosi kuna ndambu mosi, diankaka kuna ndambu yankaka; e nkumbu a tadi dimosi Bosese, e nkumbu a tadi diankaka Sene.
5 E tadi dimosi diakala nze lunzi kuna node, ditalanene ye Mikemase, diankaka ditalanene ye Ngeba+ kuna sude.
6 Yonatane ovovese nati a nuaninua yandi vo: “Wiza twasauka kuna ndo ya makesa mama ma mindembi zengwa.+ Nanga Yave okutusadisa, kadi ke vena diambu ko dilenda kakidila Yave mu vuluza, kiakala muna ndonga yovo muna wantu akete.”+
7 O nati a nuaninua umvovese vo: “Vanga edi dina una ntim’aku. Wenda konso kuna ozolele, ikulanda konso kuna ntim’aku ukufila.”
8 Yonatane ovovele vo: “Yambula twasauka vana bena, kimana batumona.
9 Avo batuvovese vo: ‘Nudingalala yavana tukunuluakila!’ tukala vava twina, ke tutomboka ko kuna bena.
10 Avo bavovele vo, ‘Nuiza nuana yeto!’ Tutomboka kadi Yave ubayekwele va moko meto. Ediadi dikala se sinsu kwa yeto.”+
11 Ozevo, yau wole bamonekene kwa buka kiantete kia makesa ma Afelesetia. Afelesetia bavovele vo: “Tala, Ayibere bavaikidi muna mawulu baswekamene.”+
12 Makesa ma Afelesetia bavovese Yonatane yo nati a nuaninua yandi, oku vo: “Nutomboka oku twina, nuatoma kutuzaya!”+ Yonatane ovovese nati a nuaninua vo: “Undanda kadi Yave ubayekwele vana moko ma Isaele.”+
13 Yonatane otombokele muna moko yo malu, o nati a nuaninua unlende; Yonatane oyantikidi tufakesa Afelesetia, o nati a nuaninua wabavondanga kuna nima.
14 Muna nkumbu antete, Yonatane yo nati a nuaninua yandi bavondele tezo kia 20 ma wantu, e fulu kina kiabwila mavimbu kia tezo kia ndambu a akre.*
15 Awonso bakala muna ndo ye awana bakala kuna ntwala bamwene kikilu wonga, kana nkutu i makesa mafilwa mu nuanisa Isaele mazakamene kikilu.+ E nsi iyantikidi nikuka, o Nzambi okotese wonga wayingi vana vena Afelesetia.
16 Ayingidi a Saulu muna Ngibeya+ a Benyamini bamwene vo mavuanga mamwangane muna ndambu zawonso.+
17 Saulu ovovese wantu bakala yandi vo: “Nutanga nkangu twazaya kana nani okatukidi ova twina.” Vava batangidi o nkangu, bamwene vo Yonatane ye nati a nuaninua yandi ke bena vo ko.
18 Saulu ovovese Akiya+ vo: “Twasa Nkel’a Nzambi aludi!” (Kadi muna kolo kiakina,* e Nkel’a Nzambi aludi Aneyisaele bakala yau.)
19 Vava Saulu kavovanga kwa nganga, e nkindu muna ndo ya Afelesetia iwokele kikilu. I bosi, Saulu ovovese nganga vo: “Yambula vanga dina una vanga.”*
20 Saulu ye nkangu awonso wakala yandi bakutakene benda nuana e vita. Vava balweke, bamwene vo Afelesetia mu vondana bena muna nsosolo, o mavuanga masakidi.
21 Ayibere ana bateka kala ye Afelesetia yo tomboka yau kuna ndo, bayikamene Aneyisaele ana bakala yo Saulu yo Yonatane.
22 Wan’amakala a Isaele ana baswekamena+ muna zunga kia miongo mia Eferaime, vava bawá vo Afelesetia batinini, yau mpe bakotele muna vita yo kubalakama.
23 Yave ovulwizi Isaele e lumbu kiakina,+ e vita ilweke kuna Betavene.+
24 Wan’amakala a Isaele bayoyele e lumbu kiakina, kadi Saulu wadila nkangu e ndofi, oku vo: “Sibwa kesibwa ndiona odia konso lekwa* vava kuma ke kwafwidi ko, yavana imana landa e kunda kwa mbeni zame!” I dianu vo, ke vakala muntu ko wadia lekwa.+
25 Nkangu wawonso ulweke* muna mfinda yakala yo wiki vana ntoto.
26 Vava bakotele muna mfinda, bamwene wiki usonsanga, kansi ke vena muntu ko odidi wo, kadi wonga wa ndofi bamwene.
27 Kansi, Yonatane kawa wo ko vo se diandi ndofi kadididi o nkangu.+ I dianu vo, olambwidi nsuk’a nti una wakala vana koko kwandi, ovubidi wo muna sasala kia wiki. Vava kadidi wo, nitu andi ikumamene.*
28 Mosi muna nkangu ovovele vo: “O se diaku odididi nkangu e ndofi vo: ‘Sibwa kesibwa ndiona odia konso lekwa o unu!’+ I dianu nkangu uyoyele.”
29 Yonatane ovovele vo: “Se diame nsi kamwesese mpasi.* Tala una nitu ame ikumamene* wau ngielekele fiwiki fiafi.
30 Diambote diadi kala o unu kele vo nkangu badia e sanzu+ dia mbeni zau dina basolwele! Kadi ndong’ayingi badi vondwa muna Afelesetia.”
31 E lumbu kiakina, bakwamanene vonda Afelesetia tuka kuna Mikemase yakuna Ayalone,+ o nkangu uyoyele kikilu.
32 Ozevo, nkangu uzabukidi kuna sanzu ye loko diawonso, babongele mameme, ngombe yo wan’a ngombe, babavondele vana fulu, badidi nsuni yo menga.+
33 Disamwinu kwa Saulu vo: “Tala, o nkangu usumukini Yave, badidi nsuni yo menga.”+ Muna kuma kiaki, ovovele vo: “Ke nusongele kwikizi ko! Nundengomwena e tadi diampwena owau.”
34 Saulu ovovele vo: “Numwangana muna nkangu, nubavovesa vo: ‘Konso muntu muna yeno katwasa ngombe ye meme diandi, nuavondela mo vava, nuadia. Ke nusumukina Yave ko muna dia o nsuni yo menga.’”+ Ozevo, konso muntu otwese ngombe andi muna fuku wauna, umvondele vana.
35 Saulu otungidi Yave e ziku.+ Ediadi i ziku diantete katungila Yave.
36 I bosi, Saulu ovovele vo: “Tulakama Afelesetia o fuku, twakutumuna mavua mau yavana kukiá. Ke tuvukisa muntu ko.” Bamvovese vo: “Vanga dina omwene vo diambote muna meso maku.” Nganga ovovele vo: “Yambula twafinama Nzambi aludi va fulu kiaki.”+
37 Saulu oyuvuidi kwa Nzambi vo: “Nga yalakama Afelesetia?+ Nga okubayekola vana moko ma Isaele?” Kansi Nzambi kamvene mvutu ko e lumbu kiakina.
38 Saulu ovovele vo: “Nuiza, yeno mbuta zawonso za nkangu, nuazaya kana nkia sumu divangamene o unu.
39 Ndididi Yave wa Nzambi amoyo e ndofi, ona ovuluzi Isaele, kana nkutu mwan’ame Yonatane, vondwa kevondwa.” Ke vakala muntu ko muna nkangu wamvana e mvutu.
40 Ovovese Isaele yawonso vo: “Nukala kuna sambu dimosi, omono yo mwan’ame Yonatane tukala ku sambu diankaka.” O nkangu uvovese Saulu vo: “Vanga dina omwene vo diambote muna meso maku.”
41 Saulu ovovele kwa Yave vo: “E Nzambi a Isaele, utuvanina mvutu muna Tumimi!”+ Yonatane yo Saulu basolelo, o nkangu uvevokele.
42 Saulu ovovele vo: “Nutela mono yo Yonatane wa mwan’ame e nkas’a mienze.”*+ Yonatane osolelo.
43 Saulu ovovese Yonatane vo: “Unzayisa, adieyi ovangidi?” Yonatane umvutwidi vo: “Fiwiki kwandi kaka ngielekele vana nsuk’a nkau ukedi ova koko kwame.+ Mon’oyu! Yakubama ngina mu fwa!”
44 Saulu ovovele vo: “Yambula Nzambi kantumba yo sakisa wo vanga, avo kuvondelo ko, e Yonatane.”+
45 O nkangu uvovese Saulu vo: “O Yonatane otwese luvuluzu lwalu lwanene+ kwa Isaele, nga kafwete fwa? Ke dilendi vangama nkutu ko! Tudididi Yave wa Nzambi amoyo e ndofi, kana nkutu lusuki lumosi lwa ntu andi ke lusotoka va ntoto ko, kadi osadidi yo Nzambi o unu.”+ Muna diadi o nkangu uvuluzi* Yonatane, kavondelo ko.
46 Saulu oyambwidi lakama Afelesetia, Afelesetia bavutukidi kuna zunga kiau.
47 Saulu una kasikidisi kintinu muna Isaele, onuene ye mbeni zandi zawonso, Anemoabe,+ Aneyamone,+ Anedome,+ ntinu mia Soba,+ ntinu mia Afelesetia;+ wabatufakesa mwawonso muna kayendanga.
48 Wanuana kuna unkabu wawonso yo tufakesa Amaleke,+ wavuluza Isaele vana moko ma awana bakutumunanga mavua mau.
49 Awaya i wan’amakala a Saulu, Yonatane, Yisevi yo Mankisu.+ Wana wole amakento kakala yau; o mbuta e nkumbu andi Merabe+ o nleke andi i Mikale.+
50 E nkumbu a nkaz’a Saulu Akinoame wa mwan’a Akimasi. E nkumbu a mfumu a makesa mandi, Abene+ wa mwan’a Ne wa mpangi a se dia Saulu.
51 Kisi+ i se dia Saulu, o Ne+ i se dia Abene wa mwan’a Abiele.
52 E lumbu yawonso ya Saulu+ mwakala vita yangolo ye Afelesetia. O Saulu vava kamonanga nkwa ngolo yovo nkwa unkabu, wambonganga ye kunkitula se kesa diandi.+
Mvovo vana yand'a lukaya
^ I sia vo, bundu kina nze ngavua yovo mfuluta.
^ Mvovo wa sina: “tini kia ntoto kia lutama lumosi,” i sia vo, lwa kilenda vatwa kwa ngombe zole mu lumbu kimosi.
^ Mvovo wa sina: “muna lumbu kiakina.”
^ Mvovo wa sina: “Katula koko kwaku.”
^ Mvovo wa sina: “mbolo.”
^ Mvovo wa sina: “Nsi yawonso ilweke.”
^ Mvovo wa sina: “meso mandi makiele.”
^ Mvovo wa sina: “meso mame makiele.”
^ Yovo “otwese mpambani.”
^ Tala Nsas’a Mvovo.
^ Mvovo wa sina: “ukûdidi.”
