Wantete wa Samuele 15:1-35
15 Samuele ovovese Saulu vo: “Yave untumini yàkusa o mazi, wakala se ntinu a nkangu andi Isaele;+ owau wá dina Yave kavovele.+
2 I wau wuwu kavovele Yave a vu: ‘Landa ilanda Aneyamaleke e kunda mu kuma kia dina bavanga kwa Isaele, wau babatelamena muna nzila, vava bavaika muna Engipito.+
3 Owau wenda tufakesa Aneyamaleke,+ ubafwasa+ ye lekwa yawonso bena yau. Kubafwila nkenda ko; vonda awonso,+ akala ye akento, yingiana-ngiana ye nsedia, ngombe ye mameme, samo ye mabuluku.’”+
4 Saulu obokelese nkangu, ubatangidi kuna Telaime. Vakala 200.000 ma makesa* ye 10.000 ma Ayuda.+
5 Saulu wele kuna mbanz’a Amaleke yo sia ayingidi vana ndimba.
6 Saulu ovovese Anekene vo:+ “Nukatuka vana vena Aneyamaleke, kimana yalembi kunufukisa kumosi yo yau.+ Kadi lwasonga walakazi* kwa nkangu a Isaele+ vava batuka muna Engipito.” Anekene bakatukidi vana vena Aneyamaleke.
7 I bosi, Saulu otufakese Aneyamaleke+ tuka kuna Kavila+ yakuna Sure+ ina kuna mbel’a Engipito.
8 Obakidi Angangi+ wa ntinu a Amaleke kimoyo, vo i nkangu wawonso ovondele wo muna nsosolo.+
9 Kansi, Saulu yo nkangu bavukisi* Angangi yo mameme mambote ye ngombe za mazi ye vaka ya mameme ye yawonso yambote,+ ke bafwasidi yo ko. Kansi, lekwa yawonso yambi ye yakondwa mfunu bafwasidi yo.
10 E diambu dia Yave dizidi kwa Samuele, oku vo:
11 “Mbwene ntantu wau yakitula Saulu se ntinu, kadi oyambwidi kundanda, kalemvokele mvovo miame ko.”+ Samuele okendalele kikilu, ododokele Yave fuku wavimba.+
12 Samuele vava kasikamene muna mene-mene kenda wanana yo Saulu, bavovese Samuele vo: “Saulu wele kuna Kamele,+ otelamese lunzi dia luyindwilu lwandi.+ I bosi oviokele, okulumukini kuna Ngilengale.”
13 Vava Samuele kalweke kwa Saulu, o Saulu umvovese vo: “Yambula Yave kasambula. Ndemvokele diambu dia Yave.”
14 Samuele ovovele vo: “O mameme ye ngombe ngwidi zimekanga, akweyi zitukingi?”+
15 Saulu ovutwidi vo: “Kwa Aneyamaleke zibongelo, kadi o nkangu uvukisi mameme mambote ye ngombe kimana bakelela Yave wa Nzambi aku e kimenga; kansi, mana masidi tufwasidi mo.”
16 Samuele ovovese Saulu vo: “Dingalala! Yambula yazayisa dina Yave kampovese fuku wau.”+ Umvutwidi vo: “Vova kwaku!”
17 Samuele ovovele vo: “Vava wakimwenanga+ vo kwafwana ko, nga kwasolwa ko mu kala se ntu a makanda ma Isaele yo kuswa kwa Yave se ntinu a Isaele?+
18 I bosi Yave watuma, oku vo: ‘Wenda tufakesa asumuki a Aneyamaleke.+ Ubanuanisa yavana okubafukisa emvimba.’+
19 Ozevo, ekuma walembi lemvokela nding’a Yave? Kansi, kuna loko diawonso wazabuzioka mu baka e sanzu+ yo vanga edi diambi vana meso ma Yave!”
20 Muna diadi, Saulu ovovese Samuele vo: “Yalemvokela nding’a Yave! Yakwenda kuna Yave kantumini, ntwese Angangi wa ntinu a Amaleke yo vonda Aneyamaleke.+
21 Kansi, nkangu babongele muna sanzu, mameme ye ngombe, zina zambote zayekolwa mu fwaswa, kimana bakela zo se kimenga kwa Yave wa Nzambi aku kuna Ngilengale.”+
22 I bosi, Samuele ovovele vo: “Nga Yave oluta yangalela tukau ye yimenga ya ngioka,+ ke mu lemvokela nding’a Yave ko e? Tala, o lemvoka kusundidi yimenga,+ o wunikina kusundidi mazi ma vaka+ ya mameme;
23 kadi o kolama+ kufwananene ye sumu dia tá ngombo,+ o umvuania ufwananene ye mpandu ye nsambil’a teke.* Wau obembwele diambu dia Yave,+ yandi mpe ubembwele mu kala se ntinu.”+
24 I bosi, Saulu ovovese Samuele vo: “Nsumukini, kadi nkolamene nkanikinu a Yave ye mvovo miaku, kadi mbwenene nkangu o wonga, mpangidi dina bavovele.
25 Owau, dodokolo, loloka sumu diame, vutuka yame kimana yafukamena Yave.”+
26 Kansi, Samuele ovovese Saulu vo: “Kivutuka yaku ko, kadi obembwele diambu dia Yave, o Yave mpe ubembwele, kukala diaka ntinu a Isaele ko.”+
27 Vava Samuele kavilukidi yo kwenda, Saulu osimbinini nsuk’a yunga kiandi kiakondwa moko, kitiazukini.
28 Samuele umvovese vo: “O unu, Yave ukatwidi e kintinu kia Isaele, ovana kio kwa nkwaku ona usundidi o wete.+
29 O Mfumu a Isaele+ ke vuna ko+ ngatu soba e ngindu zandi,* kadi oyandi ke muntu ko kasoba e ngindu zandi.”*+
30 Saulu ovovele vo: “Nsumukini. Owau dodokolo, unzitisa ova meso ma akuluntu a nkangu ame ye ova meso ma Isaele. Vutuka yame kimana yafukamena Yave wa Nzambi aku.”+
31 Samuele wele yo Saulu, Saulu ofukamene Yave.
32 Samuele ovovele vo: “Nuntwasila Angangi wa ntinu a Amaleke.” Angangi wizidi kwa yandi kuna lukatikisu, kadi Angangi ovovele vo: ‘Kieleka, kina diaka mu vonza kia* lufwa ko.’
33 Kansi, Samuele ovovele vo: “Wauna nsosolo aku wakondesa akento o wana, ngudi aku mpe okondwa wana vana vena akento.” Samuele ozengonuene Angangi vana ntadisi a Yave muna Ngilengale.+
34 I bosi, Samuele wele kuna Rama, Saulu otombokele kuna nzo andi kuna Ngibeya a Saulu.
35 Samuele kamonana diaka yo Saulu ko yamuna lumbu kia lufwa lwandi, kadi Samuele wakendalala mu kuma kia Saulu.+ Yave mpe wakendalala kikilu wau kakitula Saulu se ntinu a Isaele.+
Mvovo vana yand'a lukaya
^ Yovo “makesa mediatilanga kia malu.”
^ Mvovo wa Kiyibere una ye nsasa vo: “zola ye walakazi ulembi suka.” Tala Nsas’a Mvovo. “Zola kulembi suka.”
^ Yovo “bafwididi nkenda.”
^ Mvovo wa sina: “zumbi,” i sia vo, nzambi za esi nzo.”
^ Yovo “kuyibanza.”
^ Yovo “kuyibanza.”
^ Mvovo wa sina: “ndudi ya.”
