Wantete wa Samuele 22:1-23
22 Davidi okatukidi kwakuna,+ otinini kuna nduk’a Adulami.+ Mpangi zandi ye nzo a se diandi yawonso vava bawidi wo, bakulumukini kuna kakala.
2 Wantu awonso bakala muna mpasi, mindia mfuka ye awana bakendalala, banyikamene, Davidi okitukidi se mfumu au. Tezo kia 400 za wantu bakala yandi.
3 Davidi oyalukidi, wele kuna Misepa, kuna Moabe, ovovese ntinu a Moabe vo:+ “Yambula se diame yo ngudi ame beza kala yaku yavana izaya dina Nzambi kevanga mu kuma kiame.”
4 Ubasisidi kwa ntinu a Moabe, bakala yandi e lumbu yawonso ina Davidi kakala muna tininu.+
5 Kuna kwalanda, Ngadi+ wa ngunza ovovese Davidi vo: “Kukadi muna tininu ko. Wenda kuna nsi a Yuda.”+ Davidi okatukidi, wele muna mfind’a Kerete.
6 Saulu owidi wo vo Davidi yo wantu bakala yandi basolwelo. Saulu wavuanda vana kundubulu kuna Ngibeya+ vana nsi a nti a tamareseke ye dionga diandi vana koko, ntaudi zandi zawonso banzietele.
7 I bosi, Saulu ovovese ntaudi ana banzietele vo: “E Anebenyamini, nungwa. Nga mwan’a Yisai+ ovana kwa yeno awonso e yana ye mpatu za vinyu e? Nga okunukitula se mfumu za mafunda ye mfumu za nkama?+
8 Yeno awonso lwamvuandidi e mfulu! Kavena muntu ko wanzayisi wo vo mwan’ame wakanga e kangu yo mwan’a Yisai!+ Kavena muntu ko umfwididi e nkenda ngatu kumpovesa vo, mwan’ame wakasakese selo kiame kankondelela nze unu kiaki.”
9 Doenge+ wa musi Edome ona wakala se ntu a ntaudi za Saulu ovutwidi vo:+ “Yamona mwan’a Yisai vava kalwaka kuna Nobe kwa Akimeleke wa mwan’a Akitubi.+
10 Akimeleke wayuvula Yave mu kuma kia Davidi, wamvana madia. Wamvana mpe nsosolo wa Ngoleyate wa Mfelesetia.”+
11 Vana vau ntinu obokelese Akimeleke wa nganga, wa mwan’a Akitubi ye nganga zawonso za nzo a se diandi ana bakala kuna Nobe. Yau awonso bezidi kwa ntinu.
12 Saulu ovovele vo: “E ngeye mwan’a Akitubi, wá!” Akimeleke ovutwidi vo: “Mon’oyu, e mfumu ame.”
13 Saulu umvovese vo: “Ekuma lumvuandidi e mfulu ngeye yo mwan’a Yisai, wamvene e mbolo yo nsosolo yo yuvula Nzambi mu kuma kiandi? Davidi okuntelamenanga yo kunkondelela nze unu kiaki.”
14 Akimeleke ovutwidi ntinu vo: “Muna selo yaku yawonso nani oluta bundwanga* e vuvu avo ke Davidi ko?+ Yandi mwan’a longo a ntinu,+ mfumu ayingidi aku, otoma zitiswanga muna nzo aku.+
15 Nga yayi i nkumbu antete ngiuvuidi Nzambi mu kuma kiandi e?+ Kilendi yekola ntinu ko! Kuyindula konso diambu muna selo kiaku ko ngatu muna nzo yawonso ya se diame, kadi selo kiaku kazeye diambu ko muna mawonso mama.”+
16 Ntinu ovovele vo: “Fwa ofwa,+ ngeye Akimeleke ye nzo yawonso ya se diaku.”+
17 Ntinu ovovese ayingidi ana banzietele vo: “Nuviluka, nuavonda nganga za Yave, kadi bayikamene Davidi! Bazaya wo vo Davidi tina ketinanga, kansi ke banzayisa wo ko!” Ntaudi za ntinu ke bazolele lambula moko ko bavonda nganga za Yave.
18 Ntinu ovovese Doenge vo:+ “Viluka wavonda nganga!” Vana vau Doenge wa musi Edome,+ ovilukidi ovondele anganga. E lumbu kiakina ovondele 85 lwa wantu ana bavuete kidukula kia lino.+
19 Ovondele nkangu a Nobe+ muna nsosolo, mbanz’a anganga; ovondele akala, akento, yingiana-ngiana ye nsedia, ngombe, mabuluku ye mameme.
20 Kansi, mwana mosi Akimeleke wa mwan’a Akitubi, nkumbu andi Abiata,+ otinini, wele kwa Davidi.
21 Abiata ovovese Davidi vo: “Saulu ovondele nganga za Yave.”
22 Davidi ovovese Abiata vo: “E lumbu kiakina+ vava yamona Doenge wa musi Edome, yazaya wo vo ozayisa mawonso kwa Saulu. Mono i nkwa kuma muna lufwa lwa wantu awonso muna nzo a se diaku.
23 Kala yame. Kumoni wonga ko. Kadi ndiona ovava moyo aku, moyo ame kevava; tanina ikutanina.”+
Mvovo vana yand'a lukaya
^ Yovo “nkwa nkwikizi.”
