Wantete wa Samuele 6:1-21
-
Afelesetia bavutwidi e Nkela kwa Isaele (1-21)
6 E Nkel’a+ Yave ngonde nsambwadi yakala muna nsi ya Afelesetia.
2 Afelesetia babokele nganga za nzambi zau ye nganga za ngombo,+ babayuvuidi vo: “Adieyi tuvanga e Nkel’a Yave? Nutuzayisa una tuvutulwila yo kuna fulu kiandi.”
3 Bavutwidi vo: “Avo nuvutwidi nkel’a kangu dia Yave wa Nzambi a Isaele, ke nuvutula yo mpavala ko. Nufwete yo kumvutulwila ye lukau lwa kuzuka.+ Mu mpila yayi kaka nusasukila yo zaya e kuma o koko kwandi ke kwanukatukidi ko.”
4 Bayuvuidi vo: “Nkia lukau lwa kuzuka tukuntwikila?” Bavutwidi vo: “Fwaniswa ya mputa za vumu tanu ya wolo ye fwaniswa ya mpuku tanu za wolo, mun’owu wa lutangu lwa mfumu za Afelesetia,+ kadi vuku kiau kimosi kikedi muna yeno awonso ye muna mfumu zeno.
5 Nuvanga fwaniswa ya mputa zeno za vumu ye fwaniswa ya mpuku zeno+ zina zifwasanga e nsi, nukembela Nzambi a Isaele. Nanga ozezesa koko kwandi muna yeno ye muna nzambi zeno ye nsi eno.+
6 Ekuma nubâdisila ntima mieno nze una Angipito yo Faro babâdisila ntima miau?+ Vava Nzambi kabamwesa e mpasi,+ basindika Isaele.+
7 Owau nuvanga kalu diampa, nubonga ngombe zole zankento za mialakazi, zina ke zasilu vangu ko. Nukanga ngombe muna kalu, nuvutula wan’au muna mpaka, nubasisa kuna vala.
8 Nubonga Nkel’a Yave, nuatenseka yo vana kalu, nusia mo e nkela ina ikala e lekwa ya wolo ina nukuntwikila se lukau lwa kuzuka ova ndambu a Nkel’a Nzambi.+ I bosi nuvutula yo,
9 nutala: avo ikwenda muna nzil’a Bete-semese,+ kuna nsi andi, ozevo nuzaya wo vo yandi utuvangidi e mbi yayi yanene. Kansi avo ke wau ko, tuzaya wo vo ke koko kwandi ko kwatubukumwini; sumbula kaka kiatubwididi.”
10 Bavangidi wo. Babongele ngombe zole zankento za mialakazi, bakangidi zo muna kalu, babindikidi wan’au muna mpaka.
11 Basidi e Nkel’a Yave vana kalu, ye nkela ina ikedi mpuku zawolo ye fwaniswa ya mputa zau za vumu.
12 E ngombe zisimbidi nzila ikwendanga kuna Bete-semese.+ Zele muna nzila yayina, zele amekinge, ke zivengomokene ku lunene ko ngatu ku lumonso. Mfumu za Afelesetia bele landi yakuna mwingilu a Bete-semese.
13 Esi Bete-semese witi* bavelanga muna ndimba. Vava basengwele meso bamwene Nkela, bayangalele kikilu wau bamwene yo.
14 E kalu dilweke muna kiana kia Yosua wa musi Bete-semese, diningamene mo, vana ndambu a tadi diampwena. Babudidi mabaya ma kalu, batambikidi ngombe+ se lukau lwa ngioka kwa Yave.
15 Anelevi+ bakulumwini Nkel’a Yave ye nkel’a lekwa ya wolo yakala vana ndambu, batensekele yo vana tadi diampwena. Esi Bete-semese+ batambikidi tukau twangioka e lumbu kiakina, bakelele Yave kimenga.
16 Mfumu tanu za Afelesetia vava bamwene wo, bavutukidi kuna Ekerone muna lumbu kiakina.
17 E mputa za vumu za wolo zina Afelesetia batwikidi kwa Yave se lukau lwa kuzuka, i zazi:+ imosi ya Asedode,+ imosi ya Ngaza, imosi ya Asekelone, imosi ya Ngati,+ imosi ya Ekerone.+
18 O lutangu lwa mpuku za wolo i lutangu lwa mbanza zawonso za mfumu tanu za Afelesetia—mbanza zina ye yaka ye mavata mena muna yana.
E tadi diampwena dina basidi Nkel’a Yave, dina se kimbangi yamu unu kiaki, muna kiana kia Yosua wa musi Bete-semese.
19 Nzambi ovondele esi Bete-semese wau batala e Nkel’a Yave. Ovondele muna nkangu 50.070 lwa wantu,* o nkangu udididi, kadi Yave ovondele nkangu wayingi.+
20 Esi Bete-semese bayuvuidi vo: “Nani olenda telama vana vena Yave wa Nzambi avelela?+ Kwa nani kekwenda kimana katusisa?”+
21 Dianu vo, batumini wantu kuna kwa esi Kireyate-yarimi,+ bavovele vo: “Afelesetia bavutwidi e Nkel’a Yave. Nukulumuka, nuabonga yo.”+
Mvovo vana yand'a lukaya
^ E witi i mbwaza zivangilwanga e mfumfu a mbolo.
^ Mvovo wa sina: “70 lwa wantu, 50.000 ma wantu.”
