Wantete wa Paulu Kuna kwa Esi Tesalonika 3:1-13
3 Dianu vo, vava ke twalenda diaka zizidila ko, twayindula vo diambote twakala yeto kaka kuna Atenai;+
2 twatuma Timoteo+ wa mpangi eto ye selo kia Nzambi* muna nsangu zambote za Kristu, kanusikidisa* yo kulufiaulwisa muna lukwikilu,
3 kimana valembi kala muntu ovutuka manima* muna mpasi zazi. Kadi yeno kibeni nuzeye wo vo ke tulendi venga e mpasi zazi ko.*+
4 Kadi vava twakala yeno, twateka kunuzayisa vo mpasi tumona, i diau mpe divangamanga, wauna nuzeye.+
5 Muna kuma kiaki, wau kialenda diaka zizidila ko wau twavambana, yatuma Timoteo kimana yazaya owu wina lukwikilu lweno,+ kadi yakala ye wonga vo o Nkadi ampemba+ nanga wanuvukumuna, e salu kieto kiakituka se kiankatu.
6 Kansi Timoteo wau katukidi kwa yeno,+ utuzayisi e nsangu zambote za nukwikilu yo zola kweno, ntangwa zawonso nukutuyindulanga ye kiese kiawonso, nuna ye luzolo lwa kutumona wauna oyeto mpe twinina ye luzolo lwakunumona.
7 Dianu vo, ampangi, muna ntantu* ye mpasi zeto zawonso, nukutufiaulwisanga muna lukwikilu lusonganga.+
8 Wau nusikidi muna Mfumu, oyeto tukumamene.*
9 Aweyi tulenda vutulwila matondo kwa Nzambi muna diambu dieno, muna kiese kiayingi tukunumwenanga vana ndose a Nzambi eto?
10 Fuku yo mwini tudodokelanga kikilu kimana twamonana yeno* yo kudikila dina dikondelo muna lukwikilu lweno.+
11 Yambula Nzambi wa Se dieto yo Mfumu eto Yesu batuziulwila e nzila kimana twiza kwa yeno.
12 Vana ntandu, yambula Mfumu kanukudikila, elo, kanuwokesela o zola muna muntu yo nkwandi+ ye kw’awonso, wauna oyeto tukunuzolelanga,
13 kimana kasikidisa ntima mieno, nuakondwa lusembo, nuakala nuavelela vana ndose a Nzambi+ wa Se muna ngiz’a Mfumu eto Yesu+ ye avauki andi awonso.
Mvovo vana yand'a lukaya
^ Nanga, “ona osalanga kumosi yo Nzambi.”
^ Yovo “kanukumika.”
^ Mvovo wa sina: “onikunua.”
^ Yovo “e mpasi zazi i zau twasolelwa.”
^ Mvovo wa sina: “nsatu.”
^ Mvovo wa sina: “tuna o moyo.”
^ Mvovo wa sina: “twamona diaka ndose zeno.”