Wantete wa Tusansu 17:1-27
17 O Davidi vava kayantika zingila muna nzo andi,* ovovese Natani+ wa ngunza vo: “Tala, omono mu nzo a mabaya ma nsedele+ izingilanga, kansi e nkel’a kangu dia Yave muna saba ina.”+
2 Natani ovutwidi kwa Davidi vo: “Vanga mawonso mena muna ntim’aku, kadi Nzambi aludi una yaku.”
3 Kansi, muna fuku wauna, diambu dia Nzambi dizidi kwa Natani, oku vo:
4 “Wenda vovesa Davidi wa selo kiame vo: ‘I wau wuwu kavovele o Yave: “Ka ngeye ko okuntungila e nzo ina ikala.+
5 Kadi tuka lumbu kina yavaikisa Isaele muna Engipito yamu unu, kikalanga muna nzo ko, kansi ikalanga kaka tuka nzo a ngoto yamu nzo ya ngoto, tuka saba yaku saba.*+
6 Ekolo kiawonso yakangalanga ye Isaele yawonso, nga vakala ye lumbu kina yayuvula afundisi a Isaele ana yatumbika mu vungula e nkangu ame Isaele, oku vo: ‘Ekuma nualembi kuntungila nzo a mabaya ma nsedele?’”’
7 “Owau vovesa kwa Davidi wa selo kiame vo: ‘I wau wuwu kavovele o Yave a vu: “Ikatwidi muna madilu, muna ovungulwilanga mameme kimana wakala se mfidi a nkangu ame Isaele.+
8 Ikala yaku konso kuna okwenda,+ fukisa ifukisa* e mbeni zaku zawonso vovo wina;+ tundidika itundidika nkumbu aku nze nkumbu za akwa tunda ova nza.+
9 Vana ivana e fulu kwa nkangu ame Isaele yo kubasikidisa mûna, i muna bekala, ke betokaneswa diaka ko; ke bebangikwa diaka kwa yimpumbulu ko* nze muna lumbu yavioka,+
10 tuka muna lumbu kina yatumbika afundisi muna nkangu ame Isaele.+ Fwasa ifwasa mbeni zaku zawonso.+ Ivovese wo vo: ‘Yave okutungila e nzo.’*
11 “‘“Vava kilunga e lumbu yaku yo fwa nze mase maku, ivingisa e mbongo aku, i sia vo, mosi muna wan’aku,+ vana fulu kiaku, isikidisa kintinu kiandi.+
12 Yandi okuntungila e nzo,+ isikidisa kunda kia kimfumu kiandi yakwele mvu.+
13 Omono ikala se diandi, yandi okala mwan’ame.+ Kikatula walakazi wame ko muna yandi,+ nze una yakatulwila wo muna ndiona wavita.+
14 Ikunsikidisa muna nzo ame ye muna kintinu kiame yakwele mvu,+ e kunda kiandi kia kimfumu kisikila yakwele mvu.”’”+
15 Natani osamwini mambu mama mawonso ye mona-meso kiawonso kwa Davidi.
16 Muna kuma kiaki, Davidi wa Ntinu okotele yo vuanda vana ntadisi a Yave, ovovele vo: “E Yave wa Nzambi, omono i nani? E kanda diame i nki wau umpangidi mambu mama mawonso?+
17 Vana ntandu a mawonso mama, e Nzambi ovovele mpe vo e nzo a selo kiaku kolo kiayingi ikala kuna ntwala,+ e Yave wa Nzambi, umbwenene mpe nze muntu wafwana tundidikwa.
18 O selo kiaku Davidi adieyi kevova diaka ova ndose aku muna zitu umpene? Kadi otomene zaya selo kiaku.+
19 E Yave, muna kuma kia selo kiaku ye mun’owu wa ntim’aku,* ovangidi mambu mawonso mama manene muna sengomona o nene waku.+
20 E Yave, ke vena mosi ko ofwanane yaku,+ ke vena Nzambi ko, ngeye kaka;+ mawonso tuwidi mu matu meto masongele e ziku kia diambu diadi.
21 Nkia zula kiankaka ova nza kina nze nkangu aku Isaele?+ O Nzambi aludi wabakûla se nkangu andi.+ Wakivangila e nkumbu muna mavangu maku manene ye mansisi,+ muna yinga e zula vana vena nkangu aku+ una wakûla muna Engipito.
22 Wakitula Isaele se nkangu aku akivuila yakwele mvu;+ ongeye Yave wakala se Nzambi au.+
23 Owau, e Yave, yambula nsilu una wasila selo kiaku ye nzo andi wasikila yakwele mvu, vanga dina wasila o nsilu.+
24 Yambula nkumbu aku yasikila yo tundidikwa+ yakwele mvu, kimana wantu bavova vo: ‘Yave a vu wa Nzambi a Isaele, i Nzambi kwa Isaele,’ e nzo a selo kiaku Davidi yasikila ova ndose aku.+
25 Kadi ongeye, e Nzambi ame, osengomwene kani diaku kwa selo kiaku vo okuntungila nzo.* Ekiaki i kuma o selo kiaku kasambidi e sambu kiaki kwa ngeye ye vuvu kiawonso.
26 E Yave, ongeye i Nzambi aludi, ngeye wasia nsilu wa mambu mama mambote mu kuma kia selo kiaku.
27 I dianu vo, yambula diayangidika edi diasambula nzo a selo kiaku yazinga yakwele mvu ova ndose aku; e Yave, osambwidi yo, isambulwa yakwele mvu.”
Mvovo vana yand'a lukaya
^ Yovo “lûmbu lwandi.”
^ Nanga, “konso fulu kiasumikwanga e saba yakuna fulu kiakaka, tuka kalu eki yakuna kalu kina.”
^ Mvovo wa sina: “dunguna idunguna.”
^ Mvovo wa sina: “ke beyoya ko.”
^ Yovo “kimfumu.”
^ Yovo “muna luzolo lwaku.”
^ Yovo “kimfumu.”
