Wantete wa Yoane 3:1-24
3 Nutala e mpila nzola katuzolele o Se,+ yamu tezo kia kutuyikila vo wan’a Nzambi!+ I wau twina. Kiaki i kuma e nza ke ituzayidi ko,+ e kuma kadi ke yanzaya ko.+
2 Azolwa, owau tu wan’a Nzambi,+ kansi una tusinga kala ke wasengomweno ntete ko.+ Tuzeye wo vo vava kesengomoka tukala nze yandi, e kuma kadi tunkumona una kena.
3 Konso ona una ye vuvu kiaki muna yandi,+ okuyivelelesanga wauna oyandi kenena wavelela.
4 Konso ona okuyivananga muna sumu, nsiku kekululanga, e sumu i kulula o nsiku.
5 Nuzeye wo mpe vo oyandi wasengomonua kimana kakatula masumu meto,+ muna yandi ke muna sumu ko.
6 Konso ona okalanga yandi entwadi ke kuyivananga muna sumu ko;+ konso ona okuyivananga muna sumu kamona ko ngatu kunzaya.
7 E wan’ame anzolwa, ke nuyambula muntu ko kanuvuna; ndiona okuyivananga muna mambu mansongi, muntu ansongi, wauna oyandi kenena wansongi.
8 Ndiona okuyivananga muna sumu, kwa Nkadi ampemba katuka, e kuma kadi Nkadi ampemba osumukanga tuka kuna lubantiku.*+ Ekiaki i kuma Mwan’a Nzambi kasengomwenua, kimana kafwasa mavangu ma Nkadi ampemba.+
9 Konso ona wawutwa kwa Nzambi ke kuyivananga muna sumu ko,+ kadi e mbongo* a Nzambi muna yandi ikalanga, kalendi kuyivana muna sumu ko, kadi kwa Nzambi kawutwa.+
10 O wan’a Nzambi yo wan’a Nkadi ampemba bazayakene mu diambu edi: Konso ndiona olembi kuyivananga muna mambu mansongi ke wa Nzambi ko, ngatu ndiona olembi zolanga mpangi andi.+
11 Kadi ezazi i nsangu nuawá tuka kuna lubantiku: tufwete zolananga;+
12 ke tukadi nze Kaini ko, ona watuka kwa ndiona wambi yo vonda mpangi andi.+ Ekuma kamvondela? E kuma kadi mavangu mandi mambi,+ vo i mavangu ma mpangi andi mansongi.+
13 Ampangi, ke nusiviki ko wau vo e nza ikunumenganga.+
14 Tuzeye wo vo tukatukidi muna lufwa yo kwiza ku moyo,+ e kuma kadi mpangi zeto tuzolanga.+ Ndiona okondelo zola, wakinu muna lufwa.+
15 Konso ndiona omenganga mpangi andi, mumponda-muntu,+ nuzeye wo vo mumponda-muntu ke vua moyo a mvu ya mvu ko.+
16 I wau wuwu tuzayidi zola, oyandi wayekola moyo andi muna wete dieto,+ oyeto mpe tufwete yekola mioyo mieto muna wete dia mpangi zeto.+
17 Konso ndiona una ye mavua ma nza yayi yo mona mpangi andi okondelo, kansi unkangidi ntima,* aweyi o zola kwa Nzambi kukadila muna yandi?+
18 E wan’ame anzolwa, ke tufwete songelanga o zola muna mvovo kaka ko ngatu muna lubini,+ kansi muna mavangu+ ye ludi.+
19 Muna mpila yayi tuzayidi wo vo ku sambu dia ludi twina yo sikidisa* ntima mieto vana ndose andi,
20 muna konso diambu tulenda tumbilwa kwa ntima mieto, kadi Nzambi osundidi ntima mieto, ozeye mambu mawonso.+
21 Azolwa, avo ntima mieto ke mikututumbanga ko, tuna yo unkabu wavova kuna kwa Nzambi;+
22 tutambula konso dina tulomba kwa yandi,+ e kuma kadi nkanikinu miandi tulemvokelanga yo vanga oma mambote vana meso mandi.
23 Kieleka, i wau wuwu o nkanikinu andi: twakwikila muna nkumbu a Mwan’andi Yesu Kristu+ yo zolaziana,+ wauna katuvanina o nkanikinu.
24 Vana ntandu, ndiona olemvokelanga nkanikinu miandi una ntwadi yo Nzambi, o Nzambi mpe una yandi entwadi.+ Muna mwanda una katuvana tuzayidi wo vo una yeto entwadi.+
Mvovo vana yand'a lukaya
^ Yovo “tuka kayantikila.”
^ I sia vo, mbongo yafwana yima, yovo wuta e bundu.
^ Yovo “kazolele kumfwila nkenda ko.”
^ Yovo “kwikidisa.”
