Wanzole wa Paulu Kuna kwa Esi Korinto 9:1-15
9 Vo i diambu dia salu kieno kia* sadisa avauki,+ ke dina kwandi mfunu ko dia kunusonekena,
2 kadi nzeye luzolo lweno, luna ikuyisaninanga kwa esi Makedonia, se mvu amvimba uviokele kala tuka esi Akaya bakubamene, o vema kweno kuyangumwini ayingi muna yau.
3 Kansi ntumini ampangi, kimana o lusanu lweto mu kuma kieno lwa lembi kala lwankatu muna diambu diadi, nukala kaka nuakubama wauna yavova.
4 Nkwa kala vo, esi Makedonia avo bezidi yame yo kunuwana vo ke nuakubama ko, tuka oyeto yo yeno, nsoni tufusuka wau tukunubundanga e vuvu.
5 Dianu ngindulwidi vo diambote yakasakesa ampangi bateka kwiza kunukingula, kimana nuakubika lukau lwa mvevo luna nuateka sila o nsilu, kimana lwakala se lukau lwa mvevo, ke lwa komekenua ko.
6 Muna diambu diadi, konso ona okuna mbongo yakete, yakete mpe kekutika, konso ona okuna yayingi, yayingi mpe kekutikila.+
7 Yambula konso muntu kavanga wauna kakanini muna ntim’andi, ke mu lukendalalu* ko ngatu komekenua,+ kadi Nzambi mvani amvevo kezolanga.+
8 Vana ntandu, Nzambi wafwana kunuwokesela e nsambu zandi zawonso kimana konso ntangwa nuavua yawonso nuvuidi o mfunu, nuakala ye lekwa yayingi muna sala e salu yawonso yambote.+
9 (Wauna wasonama vo: “Okayidi lekwa yayingi;* okayidi kwa asukami. O unsongi wandi ukala yakwele mvu.”+
10 Ndiona owokesanga mbongo kwa nkuni ye mbolo kwa ndie, osinga kunuvana yo kunuwokesela mbongo kimana nuakuna, owokesa mpe mbongo a unsongi weno.)
11 Nzambi okunusambulanga muna mawonso kimana nuavanina kuna mvevo wawonso, ediadi dikutufilanga mu vutula matondo kwa Nzambi;
12 kadi e salu kiaki* ke kilungisanga kaka nsatu za avauki ko,+ kansi muna kuma kia salu kiaki wantu ayingi besinga vutula matondo kwa Nzambi.
13 Oyau bekembelelanga Nzambi, kadi lusadisu lweno lusonganga vo oyeno nsangu zambote mu kuma kia Kristu nulemvokelanga, wauna nusamunanga kwa wantu awonso yo ntim’a mvevo nusonganga muna lukau lweno kuna kwa yau ye kw’awonso.+
14 Badodokele Nzambi mu kuma kieno yo kunusonga o zola mu kuma kia ulolo wa nsambu za Nzambi zina nuavewa.
15 Matondo kwa Nzambi muna lukau lwandi lwangovo lulembi tangakana.
Mvovo vana yand'a lukaya
^ Yovo “uselo weno wa.”
^ Yovo “lukatikisu.”
^ Yovo “Okayidi kuna mvevo.”
^ Yovo “uselo wau.”
