Wanzole wa Ntinu 12:1-21
12 O mvu una wa nsambwadi wa luyalu lwa Yeu,+ Yoase+ okitukidi se ntinu, mvu 40 kayala muna Yerusaleme. E nkumbu a ngudi andi Sibia wa musi Bere-seba.+
2 Yoase wavanga mambu mambote vana meso ma Yave e lumbu yawonso ina kalongwa kwa Yoyada wa nganga.
3 Kansi, e mabata+ ke makatulwa ko, o nkangu wakelanga kaka yimenga yo yoka ndumbu muna mabata.
4 Yoase ovovese anganga vo: “Nubonga e nzimbu zawonso za tukau twavauka zina zitwaswa muna nzo a Yave,+ nzimbu za mpaku a konso muntu,+ nzimbu za zengelwa kwa konso muntu ye nzimbu zawonso zitwaswa muna nzo a Yave kuna ntim’amvevo.+
5 Anganga betambula zo vana moko m’awana bevana zo,* basadila zo mu vangulula e nzo ye konso fulu kina kifwasukidi.”*+
6 Yamuna mvu una wa 23 wa luyalu lwa Yoase wa Ntinu, anganga ke basidi vangulula nzo ko.+
7 Muna kuma kiaki, Yoase wa Ntinu obokelese Yoyada+ wa nganga ye nganga zankaka, ubayuvuidi vo: “Ekuma nulembele vangulwila e nzo? Ke nutambula diaka nzimbu ko kw’awana bevananga zo, nanga za vangulula kaka e nzo.”+
8 Anganga batambulwidi vo ke betambula diaka nzimbu kwa nkangu ko, ngatu kala ye kiyekwa kia vangulula e nzo.
9 Yoyada wa nganga, obongele nkela+ oziudi e vundu vana fukwa, osidi yo vana ndambu a ziku kuna lunene lwa mwelo a nzo a Yave. Anganga ana balangidilanga mielo, basianga mo nzimbu zawonso zatwaswanga muna nzo a Yave.+
10 Vava bamonanga vo e nzimbu se zayingi muna nkela, o nsoneki a ntinu ye ngang’ambuta batombokanga yo katula* yo tanga e nzimbu zatwaswangwa muna nzo a Yave.+
11 E nzimbu zina zatangwanga bavananga zo kwa akengi a salu muna nzo a Yave. Oyau bafutanga avadi a nti ye awana basadilanga muna nzo a Yave,+
12 atungi ye awudi a matadi. Basumbanga mpe mabaya ye matadi mavalwa mu vangulula e nzo a Yave, basadilanga mpe nzimbu mu kuma kia salu yankaka yavangulula e nzo.
13 Kansi e nzimbu zatwaswanga muna nzo a Yave ke zasadilwanga ko mu vanga malonga ma palata, zengelwa ya nsing’a mwinda, pidi, mpungi,+ yovo konso salanganu kia wolo ngatu kia palata kia nzo a Yave.+
14 E nzimbu kwa akengi a salu kaka zavewanga, oyau mpe basadilanga zo muna vangulula e nzo a Yave.
15 Ke batanga mbalu ko ye akengi a salu ana batambulanga e nzimbu kimana bafuta asadi, kadi vuvu babundwanga.+
16 Kansi e nzimbu za tukau twa makuzuka+ ye za tukau twa sumu ke zanatwanga muna nzo a Yave ko; za anganga kaka.+
17 Muna kolo kiakina, Kazaele+ wa ntinu a Suria otombokele kanuanisa Ngati,+ obakidi yo, i bosi wele nuanisa* Yerusaleme.+
18 Yoase wa Ntinu a Yuda obongele tukau twawonso twavauka tuna twavaula mase mandi, Yosafate, Yorame yo Akaziya, atinu a Yuda, ye tukau twandi twavauka ye wolo wawonso wasoloka muna malundilu ma nzo a Yave ye muna nzo a* ntinu, otwikidi wo kwa Kazaele wa ntinu a Suria. + Muna kuma kiaki, Kazaele okatukidi muna Yerusaleme.
19 Vo i mambu mankaka ma lusansu lwa Yoase ye mawonso kavanga, nga ke masonama ko muna nkand’a lusansu lwa ntinu mia Yuda?
20 Kansi, ntaudi za Yoase bamvuandidi e mfulu,+ bamvondele kuna nzo ina vana Kundubulu,*+ muna nzil’a ikulumukanga kuna Sila.
21 E ntaudi zandi, Yozaka wa mwan’a Simati yo Yeozabade wa mwan’a Some, i yau banwanda yo kumvonda.+ Banzikidi yo mase mandi muna Mbanz’a Davidi, Amaziya wa mwan’andi oyantikidi yala vana fulu kiandi.+
Mvovo vana yand'a lukaya
^ Yovo “ana bazayakene.”
^ Yovo “konso fulu kiabakuka.”
^ Yovo “batulanga zo muna madila.” Mvovo wa sina: “bakanganga zo.”
^ Mvovo wa sina: “Kazaele ovilwidi o lose katomboka kuna.”
^ Yovo “lûmbu lwa.”
^ Yovo “kuna Bete-Milo.”
