Wanzole wa Ntinu 15:1-38
15 Muna mvu wa 27 wa luyalu lwa Yerobame* wa Ntinu a Isaele, Azareya*+ wa mwan’a Amaziya+ wa Ntinu a Yuda+ oyantikidi yala.
2 Mvu 16 kakala miau vava kayantika yala, mvu 52 kayala muna Yerusaleme. E nkumbu a ngudi andi Yekoleya wa musi Yerusaleme.
3 Wavanga mambu mambote vana meso ma Yave, wauna kavanga Amaziya wa se diandi.+
4 Kansi, mabata ke makatulwa ko,+ o nkangu wakelanga kaka yimenga yo yoka ndumbu muna mabata.+
5 Yave owende ntinu, okedi kaka ye wazi+ yamuna lumbu kia lufwa lwandi; wakala muna nzo yankaka,+ ekolo Yotame+ wa mwan’a ntinu kakala ye kiyekwa kia nzo* yo fundisa nkangu a nsi.+
6 Vo i mambu mankaka ma lusansu lwa Azareya+ ye mawonso kavanga, nga ke masonama ko muna nkand’a lusansu lwa ntinu mia Yuda?
7 I bosi, Azareya olele yo mase mandi,+ banzikidi vana vaziama mase mandi muna Mbanz’a Davidi; Yotame wa mwan’andi oyantikidi yala vana fulu kiandi.
8 O mvu una wa 38 wa luyalu lwa Azareya wa Ntinu+ a Yuda, Zakariya+ wa mwan’a Yerobame oyantikidi yala Isaele muna Samaria, ngonde sambanu kayala.
9 Wavanga mambu mambi vana meso ma Yave wauna bavanga mase mandi. Kasidi yambula ko masumu mana Yerobame wa mwan’a Nebate kasumukisina Isaele.+
10 Salumi wa mwan’a Yabese umvuandidi e mfulu, unwende+ kuna Yibelame.+ Umvondele, oyantikidi yala vana fulu kiandi.
11 Vo i mambu mankaka ma lusansu lwa Zakariya, masonama muna nkand’a lusansu lwa ntinu mia Isaele.
12 I ndungana dialungana e diambu dia Yave dina kavova muna Yeu, oku vo: “O wan’aku yamuna mbandu ina ya nyá,+ bevuanda vana kunda kia kimfumu kia Isaele.”+ I diau diavangama.
13 Salumi wa mwan’a Yabese oyantikidi yala muna mvu una wa 39 wa luyalu lwa Uziya wa Ntinu+ a Yuda, ngonde mosi kayala muna Samaria.
14 Menakeme wa mwan’a Ngadi otombokele tuka muna Tiresa,+ olweke muna Samaria, ovondele Salumi+ wa mwan’a Yabese muna Samaria. I bosi, oyantikidi yala vana fulu kiandi.
15 Vo i mambu mankaka ma lusansu lwa Salumi ye mfulu kavuanda, masonama muna nkand’a lusansu lwa ntinu mia Isaele.
16 O Menakeme vava kakatukidi kuna Tiresa, ofwasidi Tifesake ye awonso bakala mo yamuna zunga yandi, kadi ke banziwudidi mavitu ko. Ofwasidi yo, otiazwini vumu y’akento awonso ana bakala ye tukau.
17 Muna mvu una wa 39 wa luyalu lwa Azareya wa Ntinu a Yuda, Menakeme wa mwan’a Ngadi oyantikidi yala Isaele, mvu 10 kayala muna Samaria.
18 Wavanga mambu mambi vana meso ma Yave. Kasidi yambula ko masumu mawonso mana Yerobame wa mwan’a Nebate kasumukisina Isaele+ e lumbu yandi yawonso.
19 Pule wa ntinu+ a Asuri wizidi nuanisa e nsi, o Menakeme ovene 1.000 dia talanta* za palata kwa Pule kimana kansadisa muna siamisa kimfumu kiandi.+
20 Menakeme obongele palata ya Isaele wau kalombele yo kwa mvuama ye akwa tunda.+ Ovene 50 ma sekele* za palata kwa ntinu a Asuri muna konso muntu. I bosi, o ntinu a Asuri okatukidi muna nsi.
21 Vo i mambu mankaka ma lusansu lwa Menakeme+ ye mawonso kavanga, nga ke masonama ko muna nkand’a lusansu lwa ntinu mia Isaele?
22 Menakeme olele yo mase mandi; Pekakeya wa mwan’andi oyantikidi yala vana fulu kiandi.
23 Muna mvu wa 50 wa luyalu lwa Azareya wa Ntinu a Yuda, Pekakeya wa mwan’a Menakeme oyantikidi yala Isaele muna Samaria, mvu miole kayala.
24 Wavanga mambu mambi vana meso ma Yave. Kasidi yambula ko masumu mawonso mana Yerobame wa mwan’a Nebate kasumukisina Isaele.+
25 Pekake+ wa mwan’a Remaleya wa mbanda-mbanda andi umvuandidi e mfulu, umvondele kumosi ye Arengobe yo Areye muna Samaria, vana nzo yandá yangolo muna nzo a* ntinu. Okedi ye 50 ma esi Ngiladi; vava kamvodele, oyantikidi yala vana fulu kiandi.
26 Vo i mambu mankaka ma lusansu lwa Pekakeya ye mawonso kavanga, masonama muna nkand’a lusansu lwa ntinu mia Isaele.
27 Muna mvu una wa 52 wa luyalu lwa Azareya wa Ntinu a Yuda, Pekake+ wa mwan’a Remaleya oyantikidi yala Isaele muna Samaria, mvu 20 kayala.
28 Wavanga mambu mambi vana meso ma Yave, kasidi yambula ko masumu mawonso ma Yerobame wa mwan’a Nebate mana kasumukisina Isaele.+
29 Muna lumbu ya Pekake wa Ntinu a Isaele, Tingelate-pilese wa Ntinu+ a Asuri, onuanisi yo baka Iyone, Abele-bete-maka,+ Yanoka, Kedese,+ Kaso, Ngiladi+ ye Ngalili, nsi yawonso ya Nafetali,+ onete nkangu kuna Asuri+ se abakami.
30 I bosi, Oseya+ wa mwan’a Ela ovuandidi Pekake wa mwan’a Remaleya e mfulu, unwende yo kumvonda; oyantikidi yala vana fulu kiandi muna mvu wa 20 wa luyalu lwa Yotame+ wa mwan’a Uziya.
31 Vo i mambu mankaka ma lusansu lwa Pekake ye mawonso kavanga, masonama muna nkand’a lusansu lwa ntinu mia Isaele.
32 Muna mvu una wazole wa luyalu lwa Pekake wa mwan’a Remaleya wa ntinu a Isaele, Yotame+ wa mwan’a Ntinu Uziya+ oyantikidi yala Yuda.
33 Mvu 25 kakala miau vava kayantika yala, mvu 16 kayala muna Yerusaleme. E nkumbu a ngudi andi Yerusa wa mwan’a Sadoke.+
34 Wavanga mambu mambote vana meso ma Yave wauna kavanga Uziya wa se diandi.+
35 Kansi, mabata ke makatulwa ko, o nkangu wakelanga kaka yimenga yo yoka ndumbu muna mabata.+ Yandi wavanga vitu dia ntandu dia nzo a Yave.+
36 Vo i mambu mankaka ma lusansu lwa Yotame ye mana kavanga, nga ke masonama ko muna nkand’a lusansu lwa ntinu mia Yuda?
37 Muna lumbu yayina, Yave otumini Resine wa ntinu a Suria yo Pekake+ wa mwan’a Remaleya banuanisa Yuda.+
38 I bosi, Yotame olele yo mase mandi, ozikilu vana vaziama mase mandi muna Mbanz’a Davidi wa nkulu andi. Akazi wa mwan’andi oyantikidi yala vana fulu kiandi.
Mvovo vana yand'a lukaya
^ I sia vo, Yerobame wanzole.
^ Ina ye nsasa vo: “Yave Osadisi.” Oyikilwanga vo Uziya muna 2 Ntinu 15:13; 2 Tusansu 26:1-23; Yesaya 6:1 ye Zakariya 14:5.
^ Yovo “lûmbu.”
^ Yovo “lûmbu lwa.”
