Wanzole wa Ntinu 16:1-20
16 Muna mvu una wa 17 wa luyalu lwa Pekake wa mwan’a Remaleya, Akazi+ wa mwan’a Yotame wa Ntinu a Yuda oyantikidi yala.
2 Akazi mvu 20 kakala miau vava kayantika yala, mvu 16 kayala muna Yerusaleme. Kavanga mambu mambote ko vana meso ma Yave wa Nzambi andi nze una kavanga o Davidi wa nkulu andi.+
3 Kansi, wakangalela muna nzila y’atinu a Isaele,+ wayoka nkutu mwan’andi vana tiya,*+ watanginina mavangu mangemi ma zula+ ina Yave kayinga vana vena Aneyisaele.
4 Wakelanga mpe yimenga yo yoka ndumbu muna mabata,+ muna kundubulu ye kuna nsi a nti miawonso miasavuka.+
5 Muna kolo kiakina, Resine wa Ntinu a Suria yo Pekake wa mwan’a Remaleya wa ntinu a Isaele batombokele mu nuanisa Yerusaleme.+ Bazungidi Akazi, kansi ke balendele kutumuna mbanza ko.
6 O Resine wa ntinu a Suria ovutwidi Elate+ kwa Edome, i bosi oyingidi Ayuda* bakala muna Elate. Esi Edome bakotele muna Elate, bakinu mûna yamu unu kiaki.
7 Muna kuma kiaki, Akazi otumini wantu kwa Tingelate-pilese+ wa ntinu a Asuri, oku vo: “I ntaudi aku, i mwan’aku. Tomboka wampuluza vana moko ma ntinu a Suria ye vana moko ma ntinu a Isaele, ana bezidi kundwanisa.”
8 Akazi obongele palata ye wolo wakala muna nzo a Yave ye muna lusalu lwa nzo a* ntinu, otwikidi wo se mbabu kwa ntinu a Asuri.+
9 O ntinu a Asuri unwididi, otombokele kuna Damaseke obakidi yo, onete nkangu kuna kinkole kuna Kire,+ ovondele Resine.+
10 Akazi wa Ntinu wele kika Tingelate-pilese wa Ntinu a Asuri kuna Damaseke. Vava kamwene e ziku dina muna Damaseke, Akazi wa Ntinu otwikidi fwaniswa kia ziku kwa Ureya wa nganga, e mbandu yasonganga una diakala ye mpila diatungilwa.+
11 Ureya+ wa nganga otungidi e ziku+ mun’owu wa luludiku katwikilwa kwa Akazi wa Ntinu tuka kuna Damaseke. Ureya wa nganga omanisi dio tunga vitila Akazi wa Ntinu kavutuka tuka kuna Damaseke.
12 O ntinu vava katukidi kuna Damaseke omwene e ziku, ofinamene, okelele yimenga vana ziku.+
13 Otambikidi tukau twangioka ye tukau twa mbwaza; oyitidi mpe tukau twa ndua, yo zazila menga ma yimenga yandi ya ungudi vana ziku.
14 Okatwidi ziku+ dia nsongo diakala vana vena Yave vana ntwal’a nzo, vana kati kwa ziku diandi ye nzo a Yave, osidi dio kuna sambu dia node ya ziku diandi.
15 Akazi wa ntinu okanikini Ureya+ wa nganga vo: “Futumuna lukau lwa ngioka lwa mene-mene vana ziku dianene+ ye lukau lwa mbwaza lwa masika,+ lukau lwa ngioka lwa ntinu, lukau lwandi lwa mbwaza kumosi ye lukau lwa ngioka, lukau lwa mbwaza ye lukau lwa ndua lwa nkangu wawonso. Ofwete vo zazila mpe menga mawonso ma tukau twangioka yo menga ma yimenga yankaka. Vo i ziku dia nsongo, mono izaya una disadilwa.”
16 Ureya wa nganga ovangidi mawonso kakanikinua kwa Akazi wa Ntinu.+
17 Vana ntandu, o Akazi wa Ntinu ozengonuene yaka ya makalu,+ okatwidi sukulwilwa yakala mo,+ okatwidi Kalunga vana ntandu a ngombe za nsongo+ zina zasikininanga ko, otensekele ko vana ntandu a matadi malelama.+
18 Akazi okatwidi muna nzo a Yave o nludi a nzila yakotela yatungwa muna nzo mu kuma kia Lumbu kia Vundu; ovangidi wo mu kuma kia ntinu a Asuri.
19 Vo i mambu mankaka ma lusansu lwa Akazi ye mawonso kavanga, nga ke masonama ko muna nkand’a lusansu lwa ntinu mia Yuda?+
20 I bosi, Akazi olele yo mase mandi, ozikilu vana vaziama mase mandi muna Mbanz’a Davidi; o Kizekeya*+ wa mwan’andi oyantikidi yala vana fulu kiandi.
Mvovo vana yand'a lukaya
^ Mvovo wa sina: “waviokesela mwan’andi vana tiya.”
^ Yovo “nkangu a Yuda.”
^ Yovo “lûmbu lwa.”
^ Ina ye nsasa vo: “Yave Okumikanga.”
