Wanzole wa Ntinu 20:1-21
20 Muna lumbu yayina, Kizekeya oyelele, fioti fiasala nga wafwa.+ Yesaya wa ngunza wa mwan’a Amoze wizidi, umvovese vo: “I wau wuwu kavovele o Yave: ‘Vana luludiku kwa esi nzo aku; kadi fwa ofwa, kusasuka ko.’”+
2 Muna kuma kiaki, Kizekeya ovilwidi lose lwandi kuna yaka, oyantikidi samba kwa Yave, oku vo:
3 “E Yave, idodokele, sungamena e mpila ikangalelanga vana ntadisi aku ye kwikizi yo ntima wawonso ye mambu mambote ivanganga vana meso maku.”+ Kizekeya obokomokene ye dilu.
4 Yesaya una kalweke ko vana yanzala kia kati, e diambu dia Yave dizidi kwa yandi, oku vo:+
5 “Vutuka kwa Kizekeya wa mfidi a nkangu ame, umvovesa vo: ‘I wau wuwu kavovele o Yave wa Nzambi a Davidi wa nkulu aku: “Ngwidi e sambu kiaku. Mbwene mansanga maku.+ Sasula ikusasula.+ Muna lumbu kiantatu, otomboka kuna nzo a Yave.+
6 Ikudikila mvu 15 muna zingu kiaku,* vuluza ikuvuluza, ivuluza mpe mbanza yayi vana moko ma ntinu a Asuri,+ tanina itanina e mbanza yayi mu kuma kia nkumbu ame ye mu kuma kia Davidi wa selo kiame.”’”+
7 I bosi, Yesaya ovovele vo: “Nutwasa bundu ya nsanda yayuma yatutwa.” Batwese yo, basidi yo vana vumbu, Kizekeya malembe-malembe osasukidi.+
8 Kizekeya oyuvuidi Yesaya vo: “Nkia sinsu+ kisonga vo Yave sasula kekunsasula ye muna lumbu kiantatu itomboka kuna nzo a Yave?”
9 Yesaya ovutwidi vo: “Ekiaki i sinsu kitukidi kwa Yave muna kusonga e ziku vo Yave olungisa dina kavovele: Nga ozolele vo e kini* vana sikada* kiatomboka ntombokelo kumi yovo kiakulumuka ntombokelo kumi e?”+
10 Kizekeya ovovele vo: “Diasazu e kini kiatomboka ntombokelo kumi vana sikada ke mu kulumuka ntombokelo kumi ko.”
11 Yesaya wa ngunza ododokele Yave; o Nzambi oyambwidi vo e kini kina kiayikulumukina ntombokelo kumi vana sikada ya Akazi kiatomboka ntomboka kumi.+
12 Muna ntangwa yayina, o ntinu a Babele, Berodake-baladani wa mwan’a Baladani, otwikidi nkanda yo lukau kwa Kizekeya, kadi owidi wo vo Kizekeya yela kayelele.+
13 Kizekeya ubatambwidi* yo kubasonga e nzo ya tusalu+ twandi twawonso—palata, wolo, mazi ma balasamu yo mazi mankaka mantalu, nuaninua yandi ye lekwa yawonso yakala muna tusalu twandi. Ke mwakala lekwa ko muna nzo andi* ye muna luyalu lwandi lwawonso kina o Kizekeya kalembi kubasonga.
14 I bosi, Yesaya wa ngunza wizidi kwa Kizekeya wa Ntinu, unyuvuidi vo: “Nkia diambu bavovele o wantu awaya ye akweyi batukidi?” Kizekeya ovutwidi vo: “Ku nsi yandá batukidi, kuna Babele.”+
15 I bosi, Yesaya oyuvuidi vo: “Nki bamwene omu nzo aku?”* Kizekeya ovutwidi vo: “Bamwene lekwa yawonso ina omu nzo ame.* Ke muna lekwa ko muna tusalu twame kina ndembele kubasonga.”
16 I bosi, Yesaya ovovese Kizekeya vo: “Wá e diambu dia Yave,+
17 ‘Tala! Muna lumbu ikwiza, e lekwa yawonso ina omu nzo aku* ye yawonso yalunda akulu aku yamu unu kiaki, inatwa kuna Babele.+ Ke musala lekwa ko,’ u kavovele o Yave.
18 ‘Ankaka muna wan’aku ana owuta, natwa benatwa+ yo kituka se mbanda-mbanda muna lûmbu lwa ntinu a Babele.’”+
19 Muna diadi, Kizekeya ovovese Yesaya vo: “E diambu dia Yave dina ovovele diambote.”+ I bosi, okudikidi vo: “Diambote wau vo vekala ye luvuvamu yo lutaninu* muna kolo kia zingu kiame.”*+
20 Vo i mambu mankaka ma lusansu lwa Kizekeya ye nkum’andi ye zinga+ ye mvuila katimisa watwasanga maza muna mbanza,+ nga ke masonama ko muna nkand’a lusansu lwa ntinu mia Yuda?
21 I bosi, Kizekeya olele yo mase mandi,+ Manase+ wa mwan’andi oyantikidi yala vana fulu kiandi.+
Mvovo vana yand'a lukaya
^ Mvovo wa sina: “lumbu yaku.”
^ Yovo “ninga.”
^ Nanga sikada yayi yasadilwanga muna tadila ola, nze lolonzi ya ntangwa.
^ Yovo “lûmbu lwandi.”
^ Yovo “ubawididi.”
^ Yovo “lûmbu lwaku.”
^ Yovo “lûmbu lwame.”
^ Yovo “lûmbu lwaku.”
^ Mvovo wa sina: “muna lumbu yame.”
^ Yovo “ludi.”
