Wanzole wa Ntinu 23:1-37
23 O ntinu obokelese akuluntu awonso a Yuda ye Yerusaleme.+
2 I bosi, ntinu otombokele kuna nzo a Yave ye Ayuda awonso, ye nkangu a Yerusaleme ye anganga ye ngunza zawonso—nkangu wawonso, ambuta ye aleke. Otangidi muna matu mau o mambu mawonso ma nkanda+ wa kangu una wasololwa+ muna nzo a Yave.+
3 O ntinu otelamene vana ndambu a lunzi, okangidi e kangu* vana ndose a Yave+ vo olanda Yave yo lunda nkanikinu miandi, tuludiku ye mîna miandi ye nsi a ntim’andi yawonso ye kiwuntu kiandi kiawonso muna lungisa mambu ma kangu diadi mana masonama muna nkanda wau. O nkangu wawonso utambulwidi e kangu.+
4 O ntinu okanikini Kilekiya+ wa ngang’ambuta ye angang’a kamba kianzole ye alangididi a yelo ya tempelo, bavaikisa mu tempelo a Yave e salanganu yawonso ya Bale ye vindi diavauka*+ ye vu kiawonso kia zulu. Oyokele yo kuna mbazi a Yerusaleme kuna yana ya Kiderone, onete ntoto ampolo andi kuna Betele.+
5 Okatwidi nganga za nzambi zaluvunu ana ntinu mia Yuda batumbika kimana bayokanga ndumbu muna mabata ma mbanza za Yuda ye muna zunga kia Yerusaleme. Okatwidi mpe ana bayokelanga Bale ndumbu ye ntangwa ye ngonde ye buka kia ntetembwa kia zodiake ye vu kiawonso kia zulu.+
6 Okatwidi vindi diavauka*+ muna nzo a Yave, onete dio kuna mbazi a Yerusaleme, kuna Ndimb’a Kiderone, oyokele dio+ kuna Ndimb’a Kiderone. Ofumfumwini dio vana ziami kia mpasi wantu.+
7 Obangwidi mpe nzo za akembi amakala+ zina zakala muna nzo a Yave, muna akento bavangilanga ngoto zasadilwanga mu tunga nzo a vindi diavauka.*
8 I bosi, okatwidi nganga zawonso muna mbanza za Yuda, ofunzwini mabata mana anganga bayokelanga ndumbu, tuka kuna Ngeba+ yakuna Bere-seba.+ Obangwidi mpe mabata ma mavitu mana makala kuna vitu dia Yosua wa mfumu a mbanza, kuna lumonso lwa vitu dia mbanza.
9 E nganga za mabata ke basadilanga vana ziku dia Yave ko muna Yerusaleme,+ kansi badianga mbolo zakondwa mfuna ye mpangi zau.
10 Ofunzwini Tofete+ ina vana Ndimb’a Wan’a Inome*+ kimana valembi kala ona oyokela* vana tiya o mwan’andi a yakala yovo wa nkento kwa Moleke.+
11 Okanikini mpe vo e mvalu mina atinu a Yuda bavaula* kwa ntangwa ke mikotela diaka muna nzo a Yave ko vana suku* dia Natani-meleke wa mbanda-mbanda, dina diakala vana veta; oyokele mpe makalu ma vita mana mavaulwa kwa ntangwa.+
12 O ntinu obangwidi mpe maziku mana batunga ntinu mia Yuda vana nludi+ a suku dia ntandu dia Akazi, ye maziku mana katunga Manase muna yanzala yole ya nzo a Yave.+ Ofumfumwini mo, omwenge mfumfuta muna Ndimb’a Kiderone.
13 O ntinu ofunzwini mabata makala kuna ntwal’a Yerusaleme, kuna sude* ya Mongo a Lutumbuku,* mana Solomo wa ntinu a Isaele katungila Asetorete wa nzambi ankento angemi wa esi Sidone; ye Kemose wa nzambi a ngemi a Moabe; ye Milekome+ wa nzambi a ngemi a Aneyamone.+
14 Okosomwene malunzi mavauka, obwisidi mavindi mavauka,*+ ozadisi visi ya wantu vana fulu kiau.
15 Obangwidi mpe e ziku diakala kuna Betele ye bata dina katunga Yerobame wa mwan’a Nebate dina diasumukisa Isaele.+ Vava kabangwidi e ziku diadi ye bata, oyokele e bata, ofumfumwini dio, oyokele mpe vindi diavauka.*+
16 Yosiya vava kavilukidi, omwene ziami vana mongo, otumini wantu bakatula visi muna ziami, oyokele yo vana ziku, ofunzwini dio, mun’owu wa diambu dia Yave diavova muntu a Nzambi aludi, ona wasakula mambu mama.+
17 Yosiya oyuvuidi vo: “E ziami kiakina kia nani?” Esi mbanza bavutwidi vo: “I ziami kia muntu a Nzambi aludi, wa musi Yuda+ ona wasakula mambu mama ovangidi kwa ziku dia Betele.”
18 Yosiya ovovele vo: “Nunyambula kavunda. Ke nuyambula muntu kasimba visi yandi ko.” Ozevo, ke bayambwidi muntu ko kasimba e visi yandi ye visi ya ngunza ona watuka kuna Samaria.+
19 Yosiya okatwidi mpe masambilu mawonso muna mabata ma mbanza za Samaria,+ mana e ntinu mia Isaele batunga muna kendeleka Nzambi, ovangidi mo wauna kavanga kwa bata dia Betele.+
20 Ovondele muna maziku e nganga zawonso za mabata zikedi mûna, oyokele visi ya wantu muna maziku.+ I bosi, ovutukidi kwandi kuna Yerusaleme.
21 O ntinu okanikini kwa nkangu awonso vo: “Nudila Yave wa Nzambi eno e Nduta,+ nze una wasonama muna nkanda wau wa kangu.”+
22 Ke basidi dia Nduta nze yayi ko tuka muna lumbu ina afundisi bafundisanga Isaele yovo muna lumbu yawonso bayalanga e ntinu mia Isaele ye ntinu mia Yuda.+
23 Kansi, muna mvu wa 18 wa luyalu lwa Yosiya wa Ntinu, e Nduta a Yave kuna Yerusaleme yadilwa.
24 Yosiya okatwidi mpe nganga za matombola, nganga za ngombo,+ teke ya nzo,*+ teke yangemi,* ye lekwa yawonso yangemi yakala muna nsi a Yuda ye Yerusaleme, kimana kalungisa mambu ma Nsiku+ masonama muna nkanda una kasolola Kilekiya wa nganga muna nzo a Yave.+
25 Ke vakala ntinu ko ona wafwanana yandi muna awana bamvita yovo muna ana banlandila,+ ona wavutuka kwa Yave ye ntim’andi wawonso ye kiwuntu kiandi kiawonso ye ngolo zandi zawonso, mun’owu wa Nsiku wawonso wa Mose.
26 Kansi, o Yave kavilukidi ko muna makasi mandi mayingi muna Yuda, mu kuma kia mambu mawonso mangemi mana kavanga Manase muna kunkendeleka.+
27 Yave ovovele vo: “Katula ikatula Yuda va meso mame,+ wauna yakatulwila Isaele;+ bembola ibembola Yerusaleme, e mbanza ina yasola ye nzo ina yavovele vo: ‘E nkumbu ame ikala kaka mûna.’”+
28 Vo i mambu mankaka ma lusansu lwa Yosiya ye mawonso kavanga, nga ke masonama ko muna nkand’a lusansu lwa ntinu mia Yuda?
29 Muna lumbu yandi, Faro Neko wa ntinu a Engipito wizidi wanana yo ntinu a Asuri vana Nzadi a Uferate, Yosiya wa Ntinu ovaikidi kanuanisa Faro Neko; kansi vava Neko kamwene Yosiya, umvondele kuna Mengido.+
30 E ntaudi zandi basidi e vimbu diandi muna kalu, banete dio kuna Yerusaleme tuka kuna Mengido, banzikidi muna ziami kiandi. I bosi, o nkangu a nsi babongele Yoakazi wa mwan’a Yosiya bankusidi mazi, bantumbikidi se ntinu vana fulu kia se diandi.+
31 Yoakazi+ mvu 23 kakala miau vava kayantika yala, ngonde tatu kayala muna Yerusaleme. E nkumbu a ngudi andi Kamutale+ wa mwan’a Yeremiya wa musi Libena.
32 Wavanga mambu mambi vana meso ma Yave, wauna bavanga mase mandi.+
33 O Faro Neko+ unsidi muna pelezo kuna Rebela,+ muna nsi a Kamati mpasi vo kalembi yala muna Yerusaleme. Ozengele nsi e mpaku ya 100 talanta* za palata ye talanta imosi ya wolo.+
34 Vana ntandu, Faro Neko otumbikidi Eleyakime wa mwan’a Yosiya se ntinu vana fulu kia se diandi, unsobele nkumbu vo Yoyakime; kansi obongele Yoakazi unete kuna Engipito+ yavana kafwa.+
35 Yoyakime ovene palata ye wolo kwa Faro, kansi muna vana nzimbu zina Faro kalomba, ovakulwisi e mpaku kwa nkangu a nsi. Wavakulwisa palata ye wolo yasikidisilwa kwa konso muntu kimana kavana yo kwa Faro Neko.
36 Yoyakime+ mvu 25 kakala miau vava kayantika yala. Mvu 11 kayala muna Yerusaleme.+ E nkumbu a ngudi andi Zebida wa mwan’a Pedaya wa musi Ruma.
37 Wakwamanana vanga mambu mambi vana meso ma Yave,+ wauna bavanga mase mandi.+
Mvovo vana yand'a lukaya
^ Yovo “okangidi kangu diampa.”
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo, “Ngeena.”
^ Mvovo wa sina: “viokesela.”
^ Mvovo wa sina: “Bavana.”
^ Yovo “suku dia dila.”
^ Mvovo wa sina: “Kuna lunene.” I sia vo, kuna sude avo una kuna ntwala a este.
^ I sia vo, Mongo a Olive, una kuna sude, wazayakana mpe vo Mongo a Luvezo.
^ Tala Nsas’a Mvovo.
^ Tala Nsas’a Mvovo.
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Yovo “nzambi za esi nzo.” Mvovo wa sina: “zumbi.”
