Wanzole wa Ntinu 24:1-20
24 Muna lumbu ya Yoyakime, Nebukandesa wa Ntinu+ a Babele otombokele kwa yandi, Yoyakime okedi se ntaudi andi mu mvu ntatu. Kansi, otelamene Nebukandesa ye kunkolamena.
2 O Yave untwikidi buka kia makesa ma Akaladi,+ ma Suria, ma Moabe ye buka kia makesa ma Aneyamone. Okwamanene kubatuma muna Yuda, kimana bafwasa yo mun’owu wa diambu dia Yave+ dina kavova kwa selo yandi, angunza.
3 Kieleka, ediadi diavangama muna Yuda muna lutumu lwa Yave kimana kabakatula vana meso mandi+ mu kuma kia masumu mawonso ma Manese,+
4 yo menga ma minkondwa-kuma mana kabungula+ yo zadisa mo muna Yerusaleme, i dianu Yave kazola kubalolokela ko.+
5 Vo i mambu mankaka ma lusansu lwa Yoyakime ye mawonso kavanga, nga ke masonama ko muna nkand’a lusansu lwa ntinu mia Yuda?+
6 I bosi, Yoyakime olele yo mase mandi;+ mwan’andi Yoyakine oyantikidi yala vana fulu kiandi.
7 O ntinu a Engipito kasidi vaika diaka muna nsi andi ko, kadi o ntinu a Babele wakutumuna yawonso yavuwa kwa ntinu a Engipito,+ tuka kuna Ndimb’a Engipito+ yakuna Nzadi a Uferate.+
8 Yoyakine+ mvu 18 kakala miau vava kayantika yala, ngonde tatu kayala muna Yerusaleme.+ E nkumbu a ngudi andi Nekuseta wa mwan’a Elenatane wa musi Yerusaleme.
9 Wavanganga mambu mambi vana meso ma Yave, wauna kavanga se diandi.
10 Muna ntangwa yayina, e ntaudi za Nebukandesa wa Ntinu a Babele batombokele kuna Yerusaleme, bazungidi e mbanza.+
11 Nebukandesa wa ntinu a Babele wizidi muna mbanza ekolo ntaudi zandi bazunga yo.
12 Yoyakine wa ntinu a Yuda ukitambikidi kwa ntinu a Babele+ kumosi yo ngudi andi, ntaudi zandi, amfumu ye mbanda-mbanda zandi;+ o ntinu a Babele unete kuna kinkole muna mvu wa nana wa luyalu lwandi.+
13 Nze una Yave kavova, o ntinu a Babele obongele lusalu lwawonso lwa nzo a* Yave ye lusalu lwa nzo a ntinu,+ owudidi salanganu yawonso ya wolo ina Solomo wa ntinu a Isaele kavanga muna tempelo a Yave.+
14 Onete Yerusaleme yawonso muna kinkole,+ mfumu zawonso, makesa mawonso, akwa umbangu awonso, ye avangi awonso a lekwa ya sengwa*+—onete 10.000 ma wantu muna kinkole. Ke mwasala wantu ko, nanga asukami a nsi kaka.+
15 I ndata kanete Yoyakine+ muna kinkole muna Babele;+ onete mpe kuna Babele awana bayalulwa muna Yerusaleme, ngudi a ntinu, akazi a ntinu, mbanda-mbanda zandi ye akwa tunda a nsi.
16 O ntinu a Babele onete mpe kuna kinkole muna Babele, 7.000 ma makesa ye 1.000 dia akwa umbangu ye avangi a lekwa ya sengwa,* awonso akwa ngolo, balongwa nuana e vita.
17 O ntinu a Babele otumbikidi Mataneya wa se diandi dia nleke+ se ntinu vana fulu kiandi, unsobele nkumbu vo Sedekiya.+
18 Sedekiya mvu 21 kakala miau vava kayantika yala, mvu 11 kayala muna Yerusaleme. E nkumbu a ngudi andi Kamutale+ wa mwan’a Yeremiya wa musi Libena.
19 Wakwamanana vanga mambu mambi vana meso ma Yave, mun’owu wa mawonso mana Yoyakime kavanga.+
20 Mambu mama mavangama muna Yerusaleme ye Yuda mu kuma kia makasi ma Yave, yavana kabayinga vana ndose andi.+ Sedekiya wakolamena ntinu a Babele.+
Mvovo vana yand'a lukaya
^ Yovo “lûmbu lwa.”
^ Nanga, “atungi a nzo zangolo.”
^ Nanga, “atungi a nzo zangolo.”
