Wanzole wa Ntinu 6:1-33
6 O wan’a ngunza+ bavovese Elesa vo: “Tala, e fulu tuzingilanga yaku kiabatakana.
2 Dodokolo, utuyambula twenda kuna Yodani. Konso muntu mu yeto, kakesa nti yo tunga fulu tulenda zingila.” Elesa ovutwidi vo: “Nuenda.”
3 Mosi ovovele vo: “Nga kwenda okwenda ye ntaudi zaku e?” Ovutwidi vo: “Kwenda ikwenda.”
4 Wele yau, balweke kuna Yodani, bayantikidi kesa e nti.
5 Ngunza mosi vava kakesanga nti, e sengele* kisotokele muna maza, okazidi, oku vo: “Ekwe mfumu ame, e sengele kiansompa!”
6 O muntu a Nzambi aludi ovovele vo: “Aveyi kisotokele?” Unsongele e fulu. Elesa ozengele tayi kia nti, otubidi kio vana kiabwila, e sengele kitensamene vana ntandu a maza.
7 Elesa ovovele vo: “Bonga kio.” Olambwidi koko kwandi, obongele kio.
8 O ntinu a Suria wele nuanisa Isaele.+ Ovuende mfulu ye ntaudi zandi, oku vo: “Kuna fulu kingandi tusikidisila e ndo.”
9 I bosi, o muntu a Nzambi aludi+ otwikidi nsamu kwa ntinu a Isaele, oku vo: “Keba kwaku, kuviokela va fulu kingandi ko kadi i kwakuna bekulumukina Asuria.”
10 O ntinu a Isaele olukisi nkangu andi una wakala vana fulu kina kanlukisila o muntu a Nzambi aludi. Elesa wakwamanana lukisa ntinu, dianu vo nkumbu miayingi* katinanga viokela vana fulu kiakina.+
11 Ediadi diafungisa kikilu ntinu a Suria makasi,* obokelese ntaudi zandi, ubayuvuidi vo: “Numpovesa, nani vava twina una kuna sambu dia ntinu a Isaele?”
12 Mosi muna ntaudi zandi ovovele vo: “E mfumu ame wa ntinu, ke mosi ko mu yeto! I Elesa wa ngunza ona wina muna Isaele, yandi ozayisanga o ntinu a Isaele mana ovovanga muna suku diaku.”+
13 Ovovele vo: “Nuenda vava e fulu kena, kimana yatuma wantu benda kunkanga.” I bosi, banzayisi vo: “Kuna Dotane kena.”+
14 Vana vau, ntinu otwikidi ko mvalu ye makalu ma vita ye makesa mayingi; balweke muna fuku, bazungidi e mbanza.
15 E selo kia muntu a Nzambi aludi vava kasikamene muna mene-mene yo vaika kuna mbazi, omwene makesa mazungidi e mbanza ye mvalu miau ye makalu ma vita. Vana vau, o selo ovovele vo: “Tuladidi kweto e mfumu ame! Aweyi tuvanga?”
16 Elesa umvutwidi vo: “Kumoni wonga ko!+ Kadi ana bena yeto engi ke awana bena yau ko.”+
17 I bosi, Elesa oyantikidi samba, oku vo: “E Yave do, temona meso mandi kimana kamona.”+ Vana vau, Yave otemwene meso ma selo, omwene zunga kia miongo kiazala ye mvalu ye makalu ma vita ma tiya,+ mawonso mazungidi Elesa.+
18 Vava Asuria bakulumukini kwa yandi, Elesa osambidi kwa Yave, oku vo: “Dodokolo, vonda meso ma zula kiaki.”+ Muna diadi, ubavondele meso wauna Elesa kalomba.
19 Elesa ubavovese vo: “Eyayi ke yau ko i nzila, eyayi mpe ke yau ko i mbanza. Nundanda yalufila kwa muntu nuvava.” Kansi, ubanete kuna Samaria.+
20 Vava balweke muna Samaria, Elesa ovovele vo: “E Yave ubatemona o meso bamona.” O Yave ubatemwene meso, bamwene vo va kati kwa Samaria bena.
21 O ntinu a Isaele vava kabamwene, ovovese Elesa vo: “E tata, nga yabavonda, nga yabavonda?”
22 Kansi, Elesa ovutwidi vo: “Kubavondi ko. Kele vo obakidi wantu muna nsosolo ye tá, nga vonda wadi kubavonda? Ubavana mbolo badia yo maza banua, i bosi bevutuka kwa mfumu au.”+
23 O ntinu ubalambisidi e lambu diampwena, badidi yo nua, i bosi ubasindikidi bavutuka kwa mfumu au. Asanzi a Suria+ ke bavutuka diaka ko muna nsi a Isaele.
24 I bosi, Benadadi wa ntinu a Suria okutakese vu kia makesa mandi mawonso, otombokele kuna Samaria,+ ozungidi yo.
25 Mwakala mvengele angolo+ muna Samaria, Asuria bazunga yo yavana buluku dimosi+ diatekelwa muna 80 lwa sekele za palata, e tini kia yá kia nzongo* a nkal’a mayembe, kiatekelwa mu palata tanu.
26 O ntinu a Isaele vava keviokanga vana ntandu a yaka, o nkento mosi umvovese vo: “E mfumu ame wa ntinu, unsadisa!”
27 Umvovese vo: “Avo Yave ke kusadisa ko, omono akweyi ndenda bakila lusadisu ikuvana? Nga vana bundilu e? Yovo vana kaminu dia vinyu ngatu dia mazi?”
28 O ntinu oyuvuidi nkento vo: “Nkia diambu una diau?” Umvutwidi vo: “O nkento ndioyo umpovese vo: ‘Vana mwan’aku twandia o unu, mbazi mwan’ame tudia.’+
29 Dianu vo, tulambidi mwan’ame, tundidi.+ E lumbu kialanda, imvovese vo, ‘Vana mwan’aku twandia.’ Kansi, oswekele mwan’andi.”
30 O ntinu vava kawidi mvovo mia nkento, otiazwini mvuatu andi.+ Vava keviokanga vana ntandu a yaka, o nkangu bamwene vo ovuete ngoto kuna nsi a mvuatu miandi.*
31 I bosi, ntinu ovovele vo: “Yambula Nzambi kantumba yo sakisa wo vanga, avo ntu a Elesa wa mwan’a Safati usala yandi o unu.”+
32 Elesa ovuende muna nzo andi, ambuta bavuende yandi. O ntinu otumini muntu kenda viti kuna ntwal’andi, kansi vitila kalwaka, Elesa ovovese ambuta vo: “Nga lumwene una mwan’a mvondi+ ndioyo katumini vo banzenga o ntu? Nutoma tala, vava nati a nsangu kelwaka, nuzika kielo, numbaka kimana kalembi kota. Nga ke nuwidi nsindu mia mfumu andi ko kuna nima e?”
33 Ekolo kevovananga yau, nati a nsangu unlwakidi, o ntinu ovovele vo: “E mpasi zazi kwa Yave zitukidi. Ekuma mfwete vingidila diaka muna Yave?”
Mvovo vana yand'a lukaya
^ Yovo “soka.”
^ Yovo “ke nkumbu mosi kaka ko yovo nkumbu miole.”
^ Mvovo wa sina: “O moyo wa ntinu uyangamene mu kuma kia diambu diadi.”
^ Yovo “kuna nsi, vana nkand’a nitu.”
