Wanzole wa Ntinu 7:1-20
7 Elesa ovovele vo: “Nuwá diambu dia Yave. I wau wuwu kavovele o Yave: ‘O mbazi muna ntangwa yayi vana vitu* dia Samaria, e sea mosi* ya mfumfu, sekele* imosi itekelwa, e sea zole za mbongo a bale, sekele imosi zitekelwa.’”+
2 E mbanda-mbanda ona ntinu kabundanga e vuvu, ovovese muntu a Nzambi aludi vo: “Kana nkutu Yave oziwidi mielo mia zulu, nga diadi* vangama divangama e?”+ Elesa umvutwidi vo: “Mona omona dio muna meso maku,+ kansi kudia ko.”+
3 Vana vitu dia mbanza vafonga wantu ayá bakala yo wazi,+ bavovazianene vo: “Nga tufonga kaka vava yavana tufwa?
4 Avo tuvova vo, ‘Yambula twakota muna mbanza,’+ i mûna tufwila, kadi mvengele wakinu muna mbanza. Avo tuvuende vava, fwa kaka tufwa. Dianu vo, yambula twakota muna ndo ya Asuria. Avo bekutuyambula moyo, tuzinga kweto, kansi, avo batuvondele, tufwidi kweto.”
5 Vava kuma kwafwa batelamene, bakotele muna ndo ya esi Suria. Vava balwaka vana fula dia ndo ya esi Suria, ke vawanuka muntu ko.
6 Kadi Yave owisisi makesa ma esi Suria e zú dia makalu ma vita, mvalu ye mazu ma makesa mayingi.+ Muna kuma kiaki, bavovazianene vo: “Tala, o ntinu a Isaele ofutidi atinu a Anekete ye atinu a Engipito beza kutunuanisa!”
7 Vana vau, batelamene, batinini vava kuma kwayantika fwa, basisidi saba yau, mvalu, mabuluku ye ndo yawonso wauna yakala. Batinini muna vukisa e mioyo miau.
8 Akwa wazi vava balweke kuna fula dia ndo, bakotele muna saba kimosi, bayantikidi dia yo nua. Babongele palata, wolo ye mvuatu, baswekele mio. Bavutukidi, bakotele muna saba kiankaka babongele mo diaka e lekwa, bele yo sweka.
9 I bosi bavovaziane vo: “Edi tuvangidi ke diambote ko. Ekiaki i lumbu kia nsangu zambote! Avo tubutamene yavana kuma kukiá, tumbwa tutumbwa. Yambula twenda samuna diambu diadi kuna nzo a ntinu.”
10 Bele, babokele alangididi a mavitu ma mbanza, babazayisi vo: “Tukotele muna ndo ya Asuria, kansi ka mukedi muntu ko, ngatu wá nding’a muntu. Mvalu ye mabuluku makangwa kaka makedi mo ye saba una basisidi yo.”
11 Alangididi a mavitu bamwenge nsangu, e diambu disamwinu muna nzo a ntinu.
12 Vana vau, o ntinu otelamene muna fuku, ovovese ntaudi zandi vo: “Dodokolo, yambula yanuzayisa dina batuvangidi Asuria. Bazeye wo vo tufwidi nzala,+ dianu bavaikidi muna ndo au, bele swama muna kiana, kadi bavovele vo: ‘Vava bevaika muna mbanza, oyeto tukubabaka kimoyo yo kota muna mbanza.’”+
13 Ntaudi andi mosi ovovele vo: “Dodokolo, yambula akaka babonga mvalu tanu muna mvalu misidi mu mbanza. E mbaninu au ikala nze mbaninu a nkangu awonso a Isaele una vava. E mbaninu au ikala nze nkangu awonso a Isaele una ufwidi kala. Yambula twabatuma benda tala dina dibwidi.”
14 Babongele makalu mole ma vita ye mvalu, o ntinu ubatumini benda kuna ndo ya Asuria, ubavovese vo: “Nuenda tala.”
15 Babalende yakuna Yodani, e nzila yawonso yazala ye mvuatu ye salanganu bavetele Asuria ekolo batinanga yo wonga. Anati a nsangu bavutukidi, basamwini dio kwa ntinu.
16 O nkangu uvaikidi, bele sanza e ndo ya esi Suria, e sea mosi* ya mfumfu ifwidi sekele mosi, e sea zole za mbongo a bale zifwidi sekele mosi wauna o Yave kavova.+
17 O ntinu otumbidi mbanda-mbanda ona kabundanga e vuvu e kinkengi kia vitu, kansi nkangu bandiatakese vana vitu, ofwidi nze una muntu a Nzambi aludi kavova kwa ntinu vava kakulumuka mu wanana yandi.
18 Diavangama wauna muntu a Nzambi aludi kavova kwa ntinu, oku vo: “O mbazi muna ntangwa yayi, e sea mosi* ya mfumfu, sekele mosi ifwa, e sea zole za mbongo a bale, sekele mosi zifwa vana vitu dia Samaria.”+
19 Kansi, mbanda-mbanda wavovesa muntu a Nzambi aludi vo: “Kana nkutu Yave oziwidi mielo mia zulu, nga diadi* vangama divangama e?” Muna kuma kiaki, Elesa umvutwidi vo: “Mona omona dio muna meso maku, kansi kudia ko.”
20 I diau kikilu divangamene kwa yandi, kadi nkangu undiatakese vana vitu, ofwidi.
Mvovo vana yand'a lukaya
^ Yovo “zandu.”
^ Mvovo wa sina: “nga diambu dia mpila yayi.”
^ Mvovo wa sina: “nga diambu dia mpila yayi.”
