Wanzole wa Ntinu 9:1-37
9 Elesa wa ngunza obokele mosi muna wan’a ngunza, umvovese vo: “Kanga mvuatu aku muna luketo, nata bungwa kiaki kia mazi, wenda nzaki kuna Ramote-ngiladi.+
2 Avo olweke kwakuna, vava Yeu+ wa mwan’a Yosafate wa mwan’a Nimesi; kota, untelamesa vana vena e mpangi zandi, unata muna suku dia kati.
3 I bosi, bonga bungwa kia mazi yitila mo vana ntu andi yo vova vo, ‘I wau wuwu kavovele o Yave: “Ikusidi mazi wakala se ntinu a Isaele.”’+ I bosi, kuzingidi ko, ziula kielo watina.”
4 I bosi, selo kia ngunza osimbidi e nzila, wele kuna Ramote-ngiladi.
5 Vava kalweke, e mfumu za makesa bavuanda vana. Ovovele vo: “E mfumu, nsangu itwasidi.” O Yeu oyuvuidi vo: “Nani vava twina?” Ovovele vo: “E mfumu, ngeye.”
6 Yeu otelamene, okotele muna nzo; o selo oyitidi mazi vana ntu andi, umvovese vo, “I wau wuwu kavovele o Yave wa Nzambi a Isaele: ‘Ikusidi mazi wakala se ntinu a nkangu a Yave, muna Isaele.+
7 Fwatakesa nzo ya Akabi wa mfumu aku, ilandila menga ma ntaudi zame angunza e kunda ye ntaudi zawonso za Yave ana bafwila vana moko ma Izebele.+
8 E nzo yawonso ya Akabi ifukiswa; fukisa ifukisa wan’amakala* awonso a nzo ya Akabi kumosi yo ntovoki ye munkondwa nsadisi muna Isaele.+
9 Ikitula nzo ya Akabi nze nzo a Yerobame+ wa mwan’a Nebate ye nzo a Basa+ wa mwan’a Akiya.
10 Vo i Izebele, mbwa zikundia muna mpatu, kuna Yizerele,+ ke vena muntu ko okunzika.’” I bosi, oziudi kielo, otinini.+
11 Yeu vava kavutukidi kuna kwa ntaudi za mfumu andi, banyuvuidi vo: “Nkia diambu? Ekuma lau kiaki kezidi kwa ngeye?” Ubavutwidi vo: “Nuzeye e mpila muntu kena ye moko yandi.”
12 Bamvovese vo: “Luvunu lwaku! Dodokolo, utuvovesa.” Ovovele vo: “Owu y’owu kampovese, okudikidi vo, ‘I wau wuwu kavovele o Yave: “Ikusidi mazi wakala se ntinu a Isaele.”’”+
13 Konso muntu muna yau obongele mvuatu miandi mu nzaki, bayadidi mio vana tombokelwa vana ndose andi,+ basikidi e mpungi yo vova vo: “Yeu okitukidi se ntinu!”+
14 I bosi, Yeu+ wa mwan’a Yosafate wa mwan’a Nimesi ovuandidi Yorame e mfulu.
Yorame ye Isaele yawonso bakala kuna Ramote-ngiladi+ kimana batanina yo mu kuma kia Kazaele+ wa Ntinu a Suria.
15 I bosi, Yorame wa Ntinu ovutukidi kuna Yizerele+ kawukwa muna mputa zandi zina kalwekwa kwa esi Suria vava kanuanisa Kazaele wa Ntinu a Suria.+
Yeu ovovele vo: “Avo kusambu diame lwina, ke nuyambudi muntu ko kataya muna mbanza, kenda zayisa diambu diadi muna Yizerele.”
16 Yeu omente muna kalu diandi dia vita, wele kuna Yizerele, kadi Yorame i kûna kalavalala mu kuma kia mputa zandi, Akaziya wa Ntinu a Yuda wakulumuka kûna muna kingula Yorame.
17 O nyingidi ona otelamene vana yingidilu muna Yizerele, omwene Yeu ye ndong’a wantu bafinamanga. Vana vau ovovele vo: “Mbwene ndong’a wantu.” Yorame ovovele vo: “Bokela nkwa mvalu kenda wanana yau, kabayuvula vo: ‘Nga ngiz’eno ya luvuvamu?’”
18 O nkwa mvalu wele kunkika, ovovele vo: “I wau wuwu kavovele o ntinu, ‘Nga ngiz’eno ya luvuvamu?’” Yeu ovutwidi vo: “Nkia diambu una diau yo ‘luvuvamu’? Viluka oku nim’ame!”
O nyingidi ovovele vo: “O nati a nsangu owanane yau, kansi kavutukidi ko.”
19 O ntinu otumini nkwa mvalu wanzole, vava kalweke vana bena ovovele vo: “I wau wuwu kavovele o ntinu, ‘Nga ngiz’eno ya luvuvamu?’” Yeu ovutwidi vo: “Nkia diambu una diau yo ‘luvuvamu’? Viluka oku nim’ame!”
20 O nyingidi ovovele vo: “O nati a nsangu owanane yau, kansi kavutukidi ko.” E ndiatisa kediatisanga e kalu ina nze ndiatisa a Yeu wa ntekelo* a Nimesi, kadi kuna kilau kediatisilanga e kalu.
21 Yorame ovovele vo: “Kubika e kalu diame dia vita.” Ozevo, bakubikidi e kalu diandi, o Yorame wa Ntinu a Isaele yo Akaziya+ wa Ntinu a Yuda bavaikidi konso muntu muna kalu diandi bele kika Yeu. Bawananini yandi muna mpatu a Nabote,+ wa Nyizerele.
22 Vava Yorame kamwene Yeu, ovovele vo: “E Yeu, nga ngiz’aku ya luvuvamu?” Umvutwidi vo: “Nkia luvuvamu, ekolo vakinu e zumba ya ngudi aku Izebele+ ye yindoki yandi yayingi?”+
23 Vana vau, Yorame ovilwidi kalu diandi dia vita katina, ovovese Akaziya vo: “Akaziya, tubwidi mu ntambu!”
24 Yeu ofumbikidi mfumb’andi, otelese Yorame vana nim’andi, e nzanza ivaikidi muna ntim’andi, obwidi muna kalu diandi dia vita.
25 Yeu ovovese Bideka wa mbanda-mbanda andi, oku vo: “Umbaka, wantuba muna mpatu a Nabote wa Nyizerele.+ Sungamena dio vo mono yo ngeye twadiatisanga makalu ma vita* kunima Akabi wa se diandi vava Yave kavova mu kuma kiandi vo:+
26 ‘“Kieleka, o menga ma Nabote+ ye menga ma wan’andi yamwene o zono,” u kavovele o Yave, “kwa ngeye ilandila+ mo e kunda mwamu mpatu yayi,” u kavovele o Yave.’ Umbaka yo kuntuba muna mpatu, mun’owu wa diambu dia Yave.”+
27 Akaziya wa ntinu+ a Yuda vava kamwene wo, otinini muna nzil’a nzo a mpatu. (I bosi Yeu unlakamene, ovovele vo: “Numvonda mpe!” Bantelese muna kalu diandi dia vita vana ntomboka ya Ngura, ina muna Yibelame.+ Akaziya okwamanene tina yakuna Mengido yo fwila kûna.
28 E ntaudi zandi banete Akaziya kuna Yerusaleme muna kalu dia vita, banzikidi muna ziami kiandi yo mase mandi muna Mbanz’a Davidi.+
29 O mvu una wa 11 wa luyalu lwa Yorame wa mwan’a Akabi, Akaziya+ oyantikidi yala muna Yuda.)
30 Izebele+ owidi vo Yeu olweke muna Yizerele.+ Muna kuma kiaki, olengwele meso mandi ye se kia ndombe, oviengese ntu, otadidi vana zianela.
31 Vava Yeu kakotele muna vitu, Izebele ovovele vo: “Adieyi diabwila Zimere ona wavonda mfumu andi?”+
32 Yeu osengwele meso kuna zianela, ovovele vo: “Nani una ku sambu diame? Nani?”+ Vana vau, mbanda-mbanda zole yovo zitatu bantadidi vana nsi.
33 Ovovele vo: “Nuntuba ova nsi!” Bantubidi vana nsi, o menga mandi mamwangane muna yaka yo muna mvalu, o Yeu undiatakese.
34 I bosi, okotele, odidi yo nua. Ovovele vo: “Nubonga nkento ndioyo wasibwa, nunzika, kadi mwan’a ntinu.”+
35 Kansi, vava bayenda muna kunzika, ke basolwele lekwa ko, valanganza kia ntu andi kaka ye tambi ye kandazi ya moko.+
36 Vava bavutukidi, bamvovese vo: “Ediadi dilungisi diambu dia Yave+ dina kavova muna selo kiandi Eliya wa Ntesebe, oku vo: ‘Kuna mpatu a Yizerele, e mbwa zidia nitu a Izebele.+
37 E vimbu dia Izebele dikituka nga mbole muna mpatu a Yizerele, kimana balembi vova vo: “Ndioyo i Izebele.”’”
Mvovo vana yand'a lukaya
^ Mvovo wa sina: “ndiona osubilanga muna yaka.” Mvovo a luvezo muna Kiyibere, wan’amakala uyikanga.
^ Mvovo wa sina: “mwana.”
^ Mvovo wa sina: “twadiatisa mvalu.”
