Wanzole wa Samuele 10:1-19
-
Davidi osundidi Amone ye Suria (1-19)
10 I bosi, ntinu a Aneyamone+ ofwidi, o Kanuni wa mwan’andi oyantikidi yala vana fulu kiandi.+
2 Davidi ovovele vo: “Walakazi isonga kwa Kanuni wa mwan’a Nakasi nze una se diandi kansongela walakazi.” Muna kuma kiaki, Davidi otumini ntaudi zandi benda kumfiaulwisa mu kuma kia lufwa lwa se diandi. Kansi, ntaudi za Davidi vava balwaka muna nsi a Aneyamone,
3 akuluntu a Aneyamone bavovese Kanuni wa mfumu au vo: “Nga obenze vo Davidi se diaku kazitisi wau katumini afiaulwisi e? Davidi nga ke ntaudi zandi ko katumini muna fimpa e mbanza yo langa yo kimana bafwasa yo?”
4 Kanuni obakidi ntaudi za Davidi ubazengele ndambu a nzevo,+ ozengele mvuatu miau yamuna yand’a luketo,* i bosi ubasindikidi.
5 Vava bazayisi wo kwa Davidi, vana vau otumini wantu benda kubakika, kadi bafusulwisu kikilu e nsoni; o ntinu ubavovese vo: “Nukala muna Yeriko+ yavana nzevo zeno zimena, i bosi nuvutuka.”
6 Aneyamone vava bamona vo Davidi ubamengene, batumini anati a nsangu kwa Asuria a Bete-rekobe+ ye Asuria a Soba,+ babadevesa 20.000 ma makesa bediatilanga kia malu; badevele mpe ntinu a Maka+ ye 1.000 dia akala; kuna kwa esi Tobe* 12.000 ma akala.+
7 Davidi vava kawá wo, otumini Yoabe ye vu kiawonso kia makesa ye makesa mandi mana masunda nkuma.+
8 Aneyamone bavaikidi, bele kiatama muna vita vana vitu dia mbanza, ekolo Asuria a Soba yo Rekobe y’esi Tobe* yo Maka bakiatamene vana fulu kia yau kaka muna nzanza.
9 Yoabe vava kamona vo makesa ma atantu manlwakidi kuna ntwala ye kunima, osolele makesa masundidi o nkuma muna Isaele, bakiatamene mu nuanisa Asuria.+
10 Oyekekele makesa mankaka vana moko ma mpangi andi Abisai,+ bakiatamene banuanisa Aneyamone.+
11 I bosi, Yoabe ovovele vo: “Avo Asuria bekunsunda e ngolo, wiza kunsadisa; kansi avo Aneyamone bekusunda e ngolo, ikwiza kusadisa.
12 Tukumama, tukala yo unkabu+ twanuanina nkangu eto ye mbanza za Nzambi eto, Yave ovanga dina diambote vana meso mandi.”+
13 Yoabe yo makesa mandi bele nuanisa Asuria, batinini vana ndose andi.+
14 Aneyamone vava bamona vo Asuria batinini, yau mpe batinini Abisai, bakotele muna mbanza. Yoabe vava kamana nuana ye Aneyamone, i bosi ovutukidi kuna Yerusaleme.
15 Vava Asuria bamona vo batufakeso kwa Isaele, balungalakene diaka.+
16 Kadadeze+ obokelese Asuria ana bakala kuna nlambu a Nzadi,*+ bezidi kwa Kelame, o Sobake wa mfumu a vu kia makesa ma Kadadeze yandi wabavitanga o ntu.
17 Vava bazayisa e diambu diadi kwa Davidi, vana vau okutakese Isaele yawonso, osaukidi Yodani olweke muna Kelame. Asuria bakiatamène muna wanana yo Davidi yo kunuanisa.+
18 Asuria batinini Isaele; Davidi ovondele 700 za anati a makalu ma vita ye 40.000 ma Asuria badiatilanga muna mvalu, owende Sobake wa mfumu a vu kia makesa, ofwididi vâna.+
19 Vava atinu awonso ana bakala vo selo ya Kadadeze bamona vo batufakeso kwa Isaele, vana vau, bavangidi ungudi yo Isaele, bakitukidi se nkangu andi;+ Asuria bamwene wonga wa sadisa diaka Aneyamone.
Mvovo vana yand'a lukaya
^ Mvovo wa sina: “yamuna mataku.”
^ Yovo “akal’a Tobe.”
^ Yovo “akal’a Tobe.”
^ I sia vo, Uferate.
