Wanzole wa Samuele 13:1-39
13 Abesalome wa mwan’a Davidi wakala ye nsang’akento wambote-mbote, nkumbu andi Tama,+ Amenone wa mwan’a Davidi+ wanzolanga.
2 Amenone okendalele kikilu yo yela mu kuma kia Tama wa nsang’andi, kadi mwenze kakala, diampasi diakala kwa Amenone muna kumvanga konso diambu.
3 Amenone wakala yo nkundi mosi, nkumbu andi Yonadabe+ wa mwan’a Simea,+ mpangi a Davidi; Yonadabe nkwa ngangu zayingi kakala.
4 Yonadabe unyuvuidi vo: “E mwan’a ntinu, ekuma okendalelanga e lumbu yawonso? Unzayisa, nkia diambu dikutokanesanga?” Amenone umvutwidi vo: “Tama wa nsang’a Abesalome wa mpangi ame nzolele.”+
5 Yonadabe umvovese vo: “Leka vana mfulu aku, wakivunina vo yela oyela. Vava se diaku kekwiza kutala, umvovesa vo: ‘Dodokolo, yambula Tama wa nsang’ame keza kumpana madia. Avo okubikidi madia mevewanga kwa mbevo* vana ndose ame, se yadila mo vana moko mandi.’”
6 Amenone olele, ovunini vo oyelele, o ntinu wizidi kuntala. Amenone ovovese ntinu vo: “Dodokolo, yambula Tama wa nsang’ame keza kumpangila mbolo zole zavindumuka nze ntima ova meso mame, yadila zo vana moko mandi.”
7 Davidi otumini nsangu kwa Tama kuna nzo, oku vo: “Dodokolo, wenda kuna nzo a Amenone wa mpangi aku, wankubikila madia.”*
8 Tama wele kuna nzo a Amenone wa mpangi andi, waleka kakala. Obongele mfumfu, ovangidi mbumba, oniemene wo yo vanga mbolo vana meso mandi, oyokele zo.
9 I bosi, obongele mbolo muna kangwa, umvene zo. Kansi, Amenone kazolele dia ko, ovovele vo: “Yeno awonso nuvaika kuna mbazi!” Awonso bavaikidi vana kena.
10 Amenone ovovese Tama vo: “Twasa madia* mu suku kimana yadila mo vana moko maku.” Tama obongele mbolo zina kavangidi, onete zo kwa Amenone wa mpangi andi muna suku.
11 Vava kantwasidi mbolo kadia, umbakidi, umvovese vo: “E nsang’ame, wiza, leka yame.”
12 Tama umvovese vo: “Ke wau ko e mpangi ame! Kunkulula luzitu ko, kadi e diambu diadi ke divangamanga ko mu Isaele.+ Kuvangi diambu diadi diansoni ko.+
13 Akweyi isia e nsoni zame? Vo i ngeye okala nze zowa muna Isaele. Dodokolo, wenda vovesa ntinu, kadi ke vakulwila nkalu ko wa kumpana kwa ngeye.”
14 Kansi, Amenone kazolele kunwila ko, wau kansudidi e ngolo, unlele muna kingolo.
15 I bosi, Amenone oyantikidi menga Tama, e mbenga kamenga iviokele e nzola kanzola. Amenone umvovese vo: “Telama; ndá kwaku!”
16 Tama umvovese vo: “Ve, e mpangi ame, okunginga kusundidi e mbi ina umpangidi!” Kansi, kazolele kunwila ko.
17 Muna diadi, Amenone obokele selo kiandi, umvovese vo: “Dodokolo, katula nkento ndioyo ova ngina, i bosi kanga e kielo!”
18 (Tama mvuela yambote-mbote* kavuata, kadi i mpila yavuatilanga wan’amakento a ntinu, amienze.) Ozevo, selo kia Amenone umvaikisi kuna mbazi, ozikidi kielo.
19 Tama osidi ntoto ampolo vana ntu andi,+ otiazwini e mvuela ambote-mbote ina kavuata; osidi moko vana ntu, wele akazi yo dila.
20 Abesalome wa mpangi andi,+ unyuvuidi vo: “Nga mpangi aku Amenone uvangidi wo? E nsang’ame, vuena kwaku, kadi mpangi aku.+ Kusie ntim’aku muna diambu diadi ko.” I bosi, Tama ozingidi muna kinsona muna nzo a mpangi andi Abesalome.
21 Vava Davidi wa Ntinu kawá mambu mama mawonso, ofungidi kikilu makasi.+ Kansi kazola kendeleka Amenone wa mwan’andi ko, kadi zola kanzolanga, wau vo mwan’andi antete.
22 Abesalome kavova diambu ko kwa Amenone, diakala diambi yovo diambote; kadi Abesalome wamenga+ Amenone wau kakulula o zitu wa nsang’andi Tama.+
23 Vava kialunga mvu miole, asaki a mika mia mameme ma Abesalome bakala kuna Bale-kaso, ina kuna ndambu a Eferaime,+ Abesalome obokelese wana awonso a ntinu.+
24 Abesalome wele kwa ntinu, umvovese vo: “O ntaudi aku osakanga mika mia mameme mandi. Dodokolo, yambula ntinu ye selo yandi benda yame.”
25 Kansi, o ntinu ovovese Abesalome vo: “Ke wau ko, e mwan’ame. Avo yeto awonso twele, tukala se zitu kwa ngeye.” Kana una vo wakwamanana kundodokela, ntinu katambulwila ko, unsambwidi kaka.
26 I bosi, Abesalome ovovele vo: “Dodokolo, avo kukwenda ko, yambula mpangi ame Amenone kenda yeto.”+ O ntinu ovutwidi vo: “Ekuma kafwete kwendela yeno?”
27 Abesalome undodokele kaka, dianu vo osindikidi Amenone yo wana awonso a ntinu, benda yandi.
28 Abesalome okanikini selo yandi vo: “Nutoma tala, vava ntim’a Amenone uyangalala mu kuma kia vinyu, ikunuvovesa vo, ‘Nuvonda Amenone!’ Ozevo, numvonda. Ka numoni wonga ko. Nga ke mono ko inukanikini wo e? Nukumama, nukala yo unkabu.”
29 Selo ya Abesalome bavangidi kwa Amenone una Abesalome kabakanikina; i bosi, wana awonso a ntinu batelamene, konso muntu omente muna mula andi, batinini.
30 Vava bakala muna nzila, nsangu zilweke kwa Davidi, oku vo: “Abesalome ovondele wana awonso a ntinu, ke vavukidi kana mosi ko.”
31 Muna diadi, ntinu otelamene, otiazwini mvuatu miandi, olavalele vana ntoto, selo yawonso ana bakala yandi, batiazwini mpe mvuatu miau.
32 Kansi, Yonadabe+ wa mwan’a Simea+ wa mpangi a Davidi, ovovele vo: “E mfumu ame, kuyindula ko vo matoko mawonso ma wan’a ntinu mavondelo, Amenone kaka ofwidi.+ Ovondelo muna lutumu lwa Abesalome, kadi wabaka e nzengo za vanga diambu diadi+ tuka lumbu kina Amenone kakulula o zitu wa Tama+ wa nsang’andi.+
33 Dianu vo, e mfumu ame wa ntinu, kukwikila ko* wau bavovese vo: ‘Wan’awonso a ntinu bamene fwa;’ Amenone kaka ofwidi.”
34 I bosi, Abesalome otinini.+ O nyingidi a mbanza, wau katadidi muna nzila yakala kunim’andi, omwene wantu ayingi bekwizanga muna mbela-mbel’a mongo.
35 Yonadabe+ ovovese ntinu vo: “Tala, o wan’a ntinu bavutukidi wauna uvovele selo kiaku.”
36 Vava kamene vova, wan’a ntinu bakotele, batumbwidi e ndinga yo dila; o ntinu ye selo yandi yawonso mpe babokomokene ye dilu.
37 Abesalome otinini, wele kwa Talemai+ wa mwan’a Amiudi wa ntinu a Ngesu. Davidi odididi mwan’andi lumbu yayingi.
38 Abesalome otinini kuna Ngesu,+ kuna kakala mvu ntatu.
39 I bosi, Davidi wa Ntinu okedi ye luzolo lwa kwenda wanana diaka ye Abesalome, kadi e ntantu kakala zau mu kuma kia lufwa lwa Amenone zakuluka.
Mvovo vana yand'a lukaya
^ Yovo “mbolo a lufiaulwisu.”
^ Yovo “mbolo a lufiaulwisu.”
^ Yovo “mbolo a lufiaulwisu.”
^ Yovo “yatoma viengeswa.”
^ Mvovo wa sina: “kusie dio mu ntima ko.”
