Wanzole wa Samuele 14:1-33
14 Yoabe wa mwan’a Seruya+ ozeye wo vo ntinu wina ye viangi kia Abesalome.+
2 Dianu vo, Yoabe obokelese nkento mosi wa nkwa ngangu kuna Tekoa,+ umvovese vo: “Uyivunina kimfwidi; vuata mvuatu mia kimfwidi, kuyikusi mazi ko.+ Kala nze nkento odilanga mvumbi mu kolo kiayingi.
3 Wenda kwa ntinu, unzayisa mawonso ikuvovesa.” Yoabe osidi mvovo muna nu’andi.*
4 Nkento wa musi Tekoa wele kwa ntinu, ofukamene yo bukika lose vana ntoto, ovovele vo: “E ntinu, unsadisa!”
5 O ntinu unyuvuidi vo: “Nkia diambu?” O nkento umvutwidi vo: “I nkento ansona; o nkaz’ame ofwidi.
6 O ntaudi aku wana wole amakala kakala yau, yau awole batantana kuna mpatu. Ke kwakala muntu ko muna kubavambula, mosi owende nkwandi, umvondele.
7 Owau, e kanda diawonso ditelamène ntaudi aku, bevovanga vo: ‘Ututambika ndioyo ovondele mpangi andi kimana twamvonda, kafuta moyo a mpangi andi, kana una vo mvingidi e fwa tuvonda!’+ Bazolele zima e kala dia tiya nsidi diau,* bazolele vo nkaz’ame kalembi kala ye nkumbu ngatu muntu una moyo* ova nza.”
8 O ntinu ovovese nkento vo: “Wenda kuna nzo aku, se yatala e diambu diaku.”
9 Nkento wa musi Tekoa ovovele kwa ntinu vo: “E mfumu ame wa ntinu, yambula ngielele yakala kwa mono ye mu nzo a se diame, vo i ntinu ye kunda kiaku kia kimfumu, yambula kiakondwa kuma.”
10 O ntinu ovovele vo: “Avo muntu uvovese diaka diambu, untwasila yandi, ke kutokanesa diaka ko.”
11 Nkento ovovele vo: “Dodokolo, e ntinu yindula Yave wa Nzambi aku, o nlandi a kunda kia menga+ kalembi fwasakesa yo vonda mwan’ame.” O ntinu ovutwidi vo: “Ndidi e ndofi muna Yave+ vo kana nkutu lusuki lumosi lwa mwan’aku, ke lusotoka va ntoto ko.”
12 Nkento ovovele vo: “E mfumu ame wa ntinu, yambula ntaudi aku kavovesa diaka diambu.” Ntinu ovutwidi vo: “Vova kwaku!”
13 O nkento ovovele vo: “Ekuma okanini vanga diambu dia mpila yayi kwa nkangu a Nzambi?+ O ntinu wau kavovele diambu diadi, ukiyelese, kadi ntinu kazolele vutulwisa mwan’andi ko ona kayinga.+
14 Yeto awonso fwa tufwa, tukala nga maza matiamukini va ntoto, ke malendi kutikwa diaka ko. Nzambi ke vonda muntu* ko, ovavanga e kuma kimana ndiona wayingwa kalembi kala diaka nyungani kwa yandi.
15 Ngizidi vova diambu diadi kwa mfumu ame wa ntinu, kadi o nkangu umbwesese wonga. O ntaudi aku oyindwidi vo: ‘Yambula ngienda mokena yo ntinu. Nanga ntinu ovanga dina dilomba ntaudi andi.
16 Ntinu nanga owila yo vuluza ntaudi andi vana moko ma ndiona ovavanga kumponda yo mwan’ame mosi kaka ona twavewa kwa Nzambi se vua dieto.’+
17 Ntaudi aku ovovele vo: ‘Yambula diambu dia mfumu ame wa ntinu diamvuvika ntima,’ kadi o mfumu ame wa ntinu una nze mbasi a Nzambi aludi, ozeye swaswanesa mbote ye mbi. Yave wa Nzambi aku yambula kakala yaku.”
18 O ntinu ovutwidi kwa nkento vo: “Kunsweki konso diambu ko ikuyuvula.” O nkento ovutwidi vo: “Dodokolo e mfumu ame wa ntinu, vova kwaku.”
19 O ntinu oyuvuidi vo: “Nga Yoabe osidi mambu mama mawonso muna nu’aku?”+ Nkento ovutwidi vo: “Kieleka, e nkal’aku kaka, e mfumu ame wa ntinu, wauna* e mfumu ame wa ntinu ovovele, kadi Yoabe wa ntaudi aku undongele yo sia mambu mama mawonso muna nu’a ntaudi aku.
20 O ntaudi aku Yoabe ndekwa kasadidi muna soba e mpila ina mambu mena, kansi, wau vo mfumu ame nkwa ngangu nga mbasi a Nzambi aludi, ozeye mawonso mavangamene muna nsi.”
21 Ntinu ovovese Yoabe vo: “Ke diambu ko, se yavanga wo.+ Wenda yo twasa Abesalome wa toko.”+
22 Muna diadi, Yoabe ofukamene yo bukika lose vana ntoto, okembelele ntinu. Yoabe ovovele vo: “O unu ntaudi aku ozeye wo vo mbweno e dienga va meso maku, e mfumu ame wa ntinu, kadi ovangidi dina ntaudi aku kalombele.”
23 Yoabe otelamene wele kuna Ngesu,+ otwese Abesalome kuna Yerusaleme.
24 Ntinu ovovele vo: “Yambula kavutuka kuna nzo andi, kansi kezi mona ndose ame ko.” Abesalome ovutukidi kuna nzo andi, kamona ndose a ntinu ko.
25 Muna Isaele yawonso ke mwakala muntu ko waluta sanisinuanga muna mpw’andi ambote nze Abesalome. Tuka kuna mband’a ntu yamuna tambi yandi kakala ye fu ko.
26 Vava kazenganga nsuki zandi, 200 za sekele* zazitanga muna tezelwa kia ntinu.* (Wau vo zita zazitanga wazenganga zo kuna mfoko a konso mvu.)
27 Abesalome wawuta wana tatu amakala+ yo mwana mosi ankento, nkumbu andi Tama, wambote-mbote kakala.
28 Abesalome mvu miole kakala muna Yerusaleme, kamona ndose a ntinu ko.+
29 Abesalome obokelese Yoabe kimana kantuma kwa ntinu, kansi Yoabe kezidi ko. Umbokelese mu nkumbu anzole, kansi, kazolele kwiza ko.
30 I bosi, Abesalome ovovese ntaudi zandi vo: “E via dia Yoabe diafinama ye via diame, mbongo a bale ina mo. Nuenda dio yoka.” Ntaudi za Abesalome bayokele e via.
31 Muna diadi, Yoabe otelamene, wele kuna nzo a Abesalome, umvovese vo: “Ekuma ntaudi zaku bayokele e via diame?”
32 Abesalome ovutwidi Yoabe vo: “Tala, yatwikidi nsangu vo, ‘Wiza yatuma wenda yuvula ntinu vo: “Ekuma yakatukidi kuna Ngesu?+ Diambote kele vo yakala kwame kaka kûna. Owau, yambula yamona ndose a ntinu, avo ngielele ngina yau, yambula kamponda.”’”
33 Dianu vo, Yoabe wele wo zayisa kwa ntinu. Ntinu otumisi Abesalome, wizidi kwa ntinu, ofukamene yo bukika lose vana ntoto vana vena ntinu. O ntinu ofibidi Abesalome.+
Mvovo vana yand'a lukaya
^ Yovo “unzayisi mana kafwete vova.”
^ I sia vo, vuvu kia kala ye mbongo.
^ Mvovo wa sina: “nsadiswa.”
^ Yovo “moyo.”
^ Yovo “ke vena ona oviluka kuna lunene ko ngatu kuna lumonso mu dina.”
^ Nanga kiaki i tezelwa kiasikidiswa, kialundilwanga kuna lûmbu lwa ntinu yovo sekele ya “ntinu” kiaswaswana ye sekele ya nkangu wawonso.
