Wanzole wa Samuele 17:1-29
17 Akitofele ovovese Abesalome vo: “Dodokolo, umpana nswa kimana yasola 12.000 ma wantu twenda landa Davidi mu fuku wau.
2 Ikunlwakila vava keyoya yo tovoka,*+ ikunzakamesa; nkangu wawonso una yandi utina, ntinu kaka ivonda.+
3 I bosi, ivutula nkangu wawonso kwa ngeye. Avo muntu ona ovavanga ofwidi, o nkangu wawonso uvutuka. I bosi, nkangu wawonso ukala mu luvuvamu.”
4 Luludiku lwalu luyangidikidi Abesalome ye akuluntu awonso a Isaele.
5 Kansi, Abesalome ovovele vo: “Nubokela mpe Kusai+ wa Nyareka, twawa kana adieyi kevova.”
6 Kusai wele kwa Abesalome. Abesalome umvovese vo: “O lwalu i luludiku kavene Akitofele. Nga tufwete sadila luludiku lwandi? Avo ke wau ko, utuzayisa dina tuvanga.”
7 Kusai ovovese Abesalome vo: “O luludiku kavene Akitofele ke lwambote ko mu ntangwa yayi!”+
8 Kusai ovovele vo: “Otomene wo zaya vo o se diaku ye awana bena yandi, mabamba-ngolo,+ bena ye nganzi nga use ovidisi wan’andi muna nzanza.+ Vana ntandu, e se diaku kesa,+ ke leka vana vena nkangu ko.
9 Owau oswekamene muna nduka yovo vana fulu kiankaka;+ avo yandi utunuanisi ntete, awana bewá wo bevova vo, ‘O nkangu uyikamene Abesalome utufakeso!’
10 Kana nkutu nkwa unkabu ona wina ye ntima nze wa nkosi,+ oyoya mu kuma kia wonga, kadi Isaele yawonso bazeye wo vo se diaku kesa kwandi,+ o wantu bena yandi akwa unkabu.
11 O lwalu i luludiku lwame: Kutakesa nkangu wawonso a Isaele ova wina, tuka kuna Dani yakuna Bere-seba,+ nze senge vana kumu dia kalunga,+ ongeye ovita kuna ntwala muna vita.
12 Tukunlwakila konso kuna kekala, tukumbwila nze una e dime* dibwilanga vana ntoto; ke kuvuka muntu ko, yandi yo wantu kena yau.
13 Avo oswekamene muna mbanza mosi, Isaele yawonso benata ngonzi kuna mbanza yayina, tukoka e yaka ya mbanza yakuna ndimba yavana ke musala kana fitadi ko.”
14 Abesalome ye nkangu wawonso a Isaele bavovele vo: “Luludiku lwa Kusai wa Nyareka lusundidi+ luludiku lwa Akitofele!”+ Kadi Yave wakana fungisa luludiku lwambote lwa Akitofele kimana Yave katwasa mpasi kwa Abesalome.+
15 I bosi, Kusai ovovele kwa anganga, Sadoke yo Abiata+ vo: “Akitofele owu kaludikidi Abesalome ye akuluntu a Isaele, omono owu inludikidi.
16 Owau twika nsamu kwa Davidi mu nswalu, unlukisa vo: ‘O fuku wau kuleki muna masau* ma makanga ko, kansi sauka kuna simu dia nkoko, avo ke wau ko o ntinu yo nkangu wawonso kena wau fukiswa ufukiswa.’”*+
17 Yonatane+ yo Akimasi+ bavingilanga kuna Ene-rongele;+ ntaudi mosi ankento wayenda kubazayisa e nsangu, oyau mpe bele zo samuna kwa Davidi wa Ntinu, kadi ke bazola kuyisia mu vonza kia kota muna mbanza ko yo moneka kwa wantu.
18 Kansi, toko dimosi ubamwene, wele wo zayisa kwa Abesalome. Yau awole bele mu nzaki, balweke kuna nzo a muntu mosi muna Bakurimi+ ona wakala ye sima vana yanzala kiandi. Baswekamene mûna,
19 nkaz’a muntu ndioyo obongele fukwa, oyalumwini kio vana nua a sima, oyanikini vo mbwaza zatutwa; ke vakala muntu ko wazaya wo.
20 E selo ya Abesalome balweke kuna nzo ankento, banyuvuidi vo: “Akimasi yo Yonatane akweyi bena?” Nkento ovutwidi vo: “Basaukidi nkoko.”+ Babavavidi, kansi ke babasolwele ko, dianu vo bavutukidi kuna Yerusaleme.
21 Vava selo bayenda, Akimasi yo Yonatane batombokele muna sima, bele zayisa e nsangu kwa Davidi wa Ntinu. Bamvovese vo: “Nutelama, nuenda mu nzaki nusauka nkoko, kadi Akitofele owu y’owu kaludikidi mu kuma kieno.”+
22 Vana vau Davidi yo nkangu wawonso wakala yandi batelamene, basaukidi Yodani. Vava kuma kwakia, ke vasala muntu ko walembi sauka Yodani.
23 Akitofele vava kamona vo luludiku lwandi ke lusadilu ko, omente muna buluku, wele kuna nzo andi, kuna mbanz’andi.+ Okubikidi esi nzo andi,+ i bosi uyizembelekele.+ Ofwidi, banzikidi muna ziami kia mase mandi.
24 Muna kolo kiakina, Davidi wele kuna Makanaimi,+ Abesalome osaukidi Yodani yo wan’amakala awonso a Isaele.
25 Abesalome otumbikidi Amasa+ se mfumu a makesa vana fulu kia Yoabe;+ Amasa i mwan’a Yitera wa Nyisaele, ona waleka yo Abingaile+ wa mwan’a Nakasi wa nsang’a Seruya, wa ngudi a Yoabe.
26 Abesalome yo Isaele basikidisi e ndo muna nsi a Ngiladi.+
27 Vava Davidi kalwaka kuna Makanaimi, Sobi wa mwan’a Nakasi wa musi Raba+ ya Aneyamone yo Makire+ wa mwan’a Amiele, wa musi Lo-deba yo Bazilai+ wa Ngiladi a Rongelimi
28 batwese mfulu, malonga manene, yinzu ya tuma, mbongo a witi, mbongo a bale, mfumfu, masa mayokwa ye nkasa yo wandu ye mbwaza zayokwa,
29 wiki, manteka, mameme ye kezio. Batwese yawonso yayi kuna kwa Davidi yo nkangu andi badia,+ kadi bavovele vo: “O nkangu uyoyele, nzala bemona ye vuina muna makanga.”+
Mvovo vana yand'a lukaya
^ Yovo “moko mandi mau mole meyoya.”
^ Yovo “lowa.”
^ Mvovo wa sina: “minua uminua.”
^ Nanga, “ndimba mia makanga.”
