Wanzole wa Samuele 18:1-33
18 Davidi otangidi wantu kakala yau, ubatumbikidi mfumu za mafunda ye mfumu za nkama.+
2 Davidi ovambwidi wantu kakala yau mu buka tatu, e buka kiantete osidi kio muna lutumu lwa* Yoabe,+ e buka kianzole muna lutumu lwa Abisai+ wa mpangi a Yoabe wa mwan’a Seruya,+ e buka kiantatu muna lutumu lwa Itai+ wa Ngati. O ntinu ubavovese vo: “Mono mpe kwenda ikwenda yeno.”
3 Kansi, bamvovese vo: “Kwendi ko,+ kadi oyeto avo tutinini ke bekutusia sungididi* ko; avo ndambu muna yeto ifwidi, ke besia dio sungididi ko, kadi ngeye ofwanene ye 10.000 muna yeto.+ Muna kuma kiaki, diambote wasala mwamu mbanza watutwikila lusadisu.”
4 Ntinu ubavovese vo: “Konso edi numwene vo diambote i diau ivanga.” O ntinu otelamene vana vitu dia mbanza, kansi nkangu wawonso bavaikidi mu buka ya nkama-nkama ye mafunda.
5 O ntinu okanikini Yoabe, Abisai yo Itai vo: “Nusonga e ngemba kwa toko Abesalome muna kuma kiame.”+ Nkangu wawonso uwidi wo vava ntinu kakanikini mfumu zawonso mu diambu dia Abesalome.
6 O nkangu uvaikidi, wele kuna nzanza muna nuanisa Isaele, banuanini muna mfind’a Eferaime.+
7 Nkangu a Isaele+ utufakeso kwa selo ya Davidi,+ e lumbu kiakina ndong’ayingi yavondwa, 20.000 ma wantu bafwa.
8 E vita ilweke muna zunga kiawonso. E mfinda ivondele nkangu wayingi lutila awana bavondelwa mu nsosolo muna lumbu kiakina.
9 Abesalome owanane ye selo ya Davidi. Abesalome wele muna mula, e mula iviokele kuna nsi a tayi ya nti anene, o ntu wa Abesalome uvakamene muna tayi ya nti, dianu vo osangamene vana kati,* vo i mula ina kayendelenge iviokele kwandi.
10 Muntu mosi omwene dina divangamene, wele dio zayisa kwa Yoabe,+ oku vo: “Mbwene Abesalome osangamene muna nti anene.”
11 Yoabe umvovese vo: “Wau umwenenge, ekuma olembele kumvondela vana fulu kiakina? Yadi kuvana sekele kumi za palata ye mponda.”
12 Kansi, muntu ndiona ovovese Yoabe vo: “Kana nkutu bampene* 1.000 dia sekele za palata, kilendi lambula koko kwame ko muna mwan’a ntinu, kadi twawidi dina ntinu kakanikini kwa ngeye, kwa Abisai yo Itai vo, ‘Nutoma tala, ke nuvangi diambu ko kwa toko Abesalome.’+
13 Avo nkolamene yo katula moyo andi, ke diadi swekama kwa ntinu ko, ongeye kwadi kuntanina ko.”
14 Yoabe ovovele vo: “Kiviokesa diaka ntangw’ame ko yo ngeye!” Dianu vo, obongele nzanza* zitatu, osukidi zo muna ntim’a Abesalome ekolo kakala moyo, vana kati kwa ntayi ya nti anene.
15 I bosi, matoko kumi ana banatanga nuaninua ya Yoabe bezidi, banwende yavana kafwa.+
16 I bosi, Yoabe osikidi mpungi, makesa mandi bayambwidi landa Isaele; Yoabe ubasimini.
17 Babongele Abesalome bantubidi muna wulu dianene muna mfinda, i bosi, bankundikidi ulolo wa matadi.+ Nkangu wawonso a Isaele batinini muna nzo zau.
18 Abesalome vava kakala moyo, wakitelamesena lunzi vana Ndimb’a Ntinu,+ kadi wavova vo: “Kina ye mwana yakala ko olenda tatidila luyindulu lwa nkumbu ame.”+ I kuma vo ovene lunzi diadi e nkumbu andi, diyikilwanga vo Luyindulu lwa Abesalome yamu unu kiaki.
19 Akimasi+ wa mwan’a Sadoke ovovele vo: “Yambula ngienda ntinu kimana yanata nsangu kwa ntinu, kadi Yave umvangidi unsongi muna kumvuluza kwa mbeni zandi.”+
20 Kansi, Yoabe umvovese vo: “O unu kunata nsangu ko. Lumbu kiankaka onata zo, ke unu ko, kadi mwan’a ntinu ofwidi.”+
21 Yoabe ovovese Nkuse+ mosi vo: “Wenda zayisa kwa ntinu oma omwene.” Muna diadi, o Nkuse ovumbamene Yoabe, wele ntinu.
22 Akimasi wa mwan’a Sadoke ovovese diaka Yoabe vo: “Dodokolo, kana nkutu nkia diambu dibwa, yambula ngienda landi o Nkuse.” Yoabe umvovese vo: “E mwan’ame, ekuma okwendela? Kadi kavena diaka nsangu ko okwenda samuna.”
23 Kansi, Akimasi okwamanene kumvovesa: “Kana nkutu nkia diambu dibwa, yambula yatikuna.” Yoabe umvovese vo: “Tikuna!” Akimasi wele ntinu muna nzil’a mvivu a Yodani, i bosi oviokele Nkuse.
24 Davidi wavuanda kakala vana kati kwa mavitu mole ma mbanza,+ o nyingidi+ otombokele vana nludi a vitu. Wau kasengwele meso, omwene muntu okwizanga ntinu yandi mosi.
25 O nyingidi okazidi, ovovese ntinu. O ntinu ovovele vo: “Avo yandi mosi kena, nsangu kekwizanga zau.” Ekolo kefinamanga,
26 o nyingidi omwene diaka muntu ankaka okwizanga ntinu. O nyingidi okazidi nlangididi a mwelo vo: “Tala, muntu ankaka diaka okwizanga ntinu yandi mosi!” O ntinu ovovele vo: “Ndioyo mpe nsangu kekwizanga zau.”
27 O nyingidi ovovele vo: “Wauna mbwenene, ona wantete e mpil’andi ya tikunuina ina nze ya Akimasi+ wa mwan’a Sadoke,” o ntinu ovovele vo: “Oyandi muntu ambote, nsangu zambote kekwizanga zau.”
28 Akimasi ovovele kwa ntinu muna nding’angolo vo: “Kavena diambu ko!” Ovumbamene ntinu. Ovovele vo: “Yambula Yave wa Nzambi aku kakembelwa, kadi oyekwele ana betelamenanga* mfumu ame wa ntinu!”+
29 Kansi, o ntinu oyuvuidi vo: “Nga toko Abesalome una kiambote?” Akimasi ovutwidi vo: “Mvuanga ayingi mbwene vava Yoabe katuminingi selo kia ntinu yo mono, kansi kizeye ko kana nkia diambu dibwidi.”+
30 O ntinu umvovese vo: “Vingila, telama ova ndambu.” Otelamene, ovingidi vana ndambu.
31 Nkuse olweke,+ o Nkuse ovovele vo: “Yambula e mfumu ame wa ntinu katambula nsangu zazi: O unu Yave umvangidi unsongi muna kuvuluza vana moko ma awonso ana bekutelamenanga.”+
32 Kansi, o ntinu oyuvuidi kwa Nkuse vo: “Nga toko Abesalome una kiambote?” Nkuse ovutwidi vo: “Yambula mbaninu a mbeni zawonso za mfumu ame wa ntinu ye awonso batelamene mu kuvanga e mbi, yakala nze ya toko!”+
33 Ntinu okendalele, otombokele kuna suku dia ntandu, diakala vana ntandu a vitu, wele didingi, oku vo: “E mwan’ame Abesalome, e mwan’ame, e mwan’ame Abesalome! Kele vo yafwa vana fulu kiaku, e Abesalome, e mwan’ame, e mwan’ame!”+
Mvovo vana yand'a lukaya
^ Mvovo wa sina: “vana moko ma.”
^ Mvovo wa sina: “ke bekutusia ntima.”
^ Mvovo wa sina: “muna kati kwa zulu yo ntoto.”
^ Mvovo wa sina: “kana bantezele ova koko kwame.”
^ Nanga, “madionga.” Mvovo wa sina: “nkau.”
^ Mvovo wa sina: “balambula moko kwa.”
