Wanzole wa Samuele 21:1-22
21 Muna lumbu ya Davidi mukedi mvengele+ wa mvu ntatu mialandakana, muna kuma kiaki, Davidi oyuvuidi Yave, o Yave ovovele vo: “Nkanu a menga una muna Saulu ye nzo andi, wau kavonda esi Ngibone.”+
2 O ntinu otumisi esi Ngibone,+ omokene yau. (Esi Ngibone ke Aneyisaele ko, kansi ana basala muna Aneyamore.+ Aneyisaele babadila ndofi vo ke bevondwa ko,+ kansi muna kuma kia vema kwandi muna nkangu a Isaele ye Ayuda, Saulu wavava kubafwasa.)
3 Davidi oyuvuidi esi Ngibone vo: “Adieyi mfwete vanga muna wete dieno? Aweyi ndenda lombela luyambulwilu lwa masumu kimana nuasambula e vua dia Yave?”
4 Esi Ngibone bamvutwidi vo: “E diambu dieto yo Saulu ye nzo andi, ke diambu dia palata ko ngatu wolo;+ katulendi vonda muntu ko muna Isaele.” Davidi ovovele vo: “Konso dina nuvova, ikunuvangila dio.”
5 Bavovese ntinu vo: “O muntu ona watubukumuna yo vava kutufukisa emvimba muna mvivu miawonso mia Isaele+—
6 ututambika wan’andi nsambwadi. Twazembeleka mavimbu* mau+ vana vena Yave kuna Ngibeya+ a Saulu ona wasolwa kwa Yave.”+ Ntinu ovovele vo: “Ikubatambika.”
7 Kansi, o ntinu ovukisi Mefibosete+ wa mwan’a Yonatane wa mwan’a Saulu mu kuma kia ndofi badia Davidi yo Yonatane+ wa mwan’a Saulu vana vena Yave.
8 Ozevo, ntinu obongele Aremoni yo Mefibosete, wana wole amakala ana Resepa+ wa mwan’a Aya kawutila Saulu yo wana tanu amakala ana Mikale*+ wa mwan’a Saulu kawutila Andiele+ wa mwan’a Bazilai wa musi Mekola.
9 Ubayekwele kwa esi Ngibone, bazembekele mavimbu mau vana mongo vana vena Yave.+ Yau nsambwadi bafwila kumosi; bavondwa muna lumbu yantete ya nsungi a nkutika, kuna lubantiku lwa nkutik’a mbongo a bale.
10 Resepa+ wa mwan’a nkento a Aya obongele madila, oyalumwini mo vana tadi. Ovuende, oyantikidi yingila mavimbu tuka muna lubantiku lwa nkutika yavana mvula zanokena mavimbu; kayambula ko vo muna mwini e nuni za zulu zabela muna mavimbu ngatu bulu ya mfuta yabafinama o fuku.
11 Bazayisi kwa Davidi dina kavanga Resepa wa mwan’a Aya wa nkento a Saulu.
12 Davidi wele bonga e visi ya Saulu ye visi ya mwan’andi Yonatane ina yakala kwa mfumu* za Yabese-Ngiladi,+ ana babayiya vana yanzala kia Bete-sani, vana bazembelekwa kwa Afelesetia muna lumbu kina Afelesetia bavonda Saulu kuna Ngileboa.+
13 Tuka kwakuna, otwese visi ya Saulu ye visi ya mwan’andi Yonatane, bakutikidi mpe e visi y’awana bazembelekwa.*+
14 Bazikidi visi ya Saulu ye visi ya mwan’andi Yonatane muna nsi a Benyamini kuna Sela,+ muna ziami kia Kisi+ wa se diandi. Vava bavangidi mawonso kakanikina o ntinu, o Nzambi owidi ndomba zau mu kuma kia nsi.+
15 Afelesetia banuana diaka e vita ye Isaele.+ Dianu vo, Davidi ye ntaudi zandi bakulumukini, bele nuanisa Afelesetia, kansi Davidi oyoyele.
16 Yisebi-benobe wa Anerefa,+ wakala ye dionga dia nsongo diazitanga 300 za sekele*+ ye nsosolo wampa, wakala ye kani dia vonda Davidi.
17 Vana vau Abisai+ wa mwan’a Seruya wizidi kunsadisa,+ owende Mfelesetia, umvondele. Muna diadi, ntaudi za Davidi bandididi e ndofi vo: “Kuvaika diaka yeto mu vita ko,+ kimana walembi zima mwind’a Isaele!”+
18 I bosi, vakedi diaka e vita vana vena Aneyisaele ye Afelesetia+ kuna Ngobe. Muna ntangwa yayina, Sibekai+ wa musi Kusa ovondele Safe wa mwan’a Anerefa.+
19 Vakedi diaka e vita vana vena Aneyisaele ye Afelesetia+ kuna Ngobe, Elekanane wa mwan’a Yare-orengime wa musi Beteleme ovondele Ngoleyate wa Ngati, o mvini a dionga diandi wakala nze nti wa akubi a nlele.+
20 Vakedi diaka e vita kuna Ngati, kuna kwakala muntu wa ntel’andá, wakala ye nlembo 6 muna konso koko ye nlembo 6 muna konso kulu, miawonso nlembo 24; yandi mpe mwan’a Anerefa.+
21 Wau katiangunanga Isaele,+ o Yonatane wa mwan’a Simei+ wa mpangi a Davidi, umvondele.
22 Awaya yau ayá i Anerefa kuna Ngati ana bavondwa kwa Davidi ye ntaudi zandi.+
Mvovo vana yand'a lukaya
^ Mvovo wa sina: “twabasenzeka,” i sia vo, twabatolola moko yo malu.
^ Nanga, “Merabe.”
^ Nanga, “ana bavuidi e nsi.”
^ Mvovo wa sina: “basenzekwa.”
