Wanzole wa Samuele 24:1-25
24 O makasi ma Yave mafusukidi diaka muna Isaele+ vava Davidi kavukumunua, oku vo: “Wenda tanga+ Isaele ye Yuda.”+
2 Muna kuma kiaki, ntinu ovovese Yoabe+ wa mfumu a makesa ona wakala yandi vo: “Wenda muna makanda mawonso ma Isaele, tuka kuna Dani yakuna Bere-seba,+ tanga nkangu kimana yazaya lutangu lwau.”
3 Yoabe ovovese ntinu vo: “Yambula Yave wa Nzambi aku kawokesa nkama-nkama muna nkangu, meso ma mfumu ame wa ntinu mamona wo. Kansi, e mfumu ame wa ntinu ekuma ozolele vangila diambu diadi?”
4 Kansi o mvovo wa ntinu usundidi o mvovo wa Yoabe ye mfumu za makesa. O Yoabe ye mfumu za makesa bavaikidi vana vena o ntinu muna tanga nkangu a Isaele.+
5 Basaukidi Yodani basikidisi e ndo kuna Arowa,+ kuna lunene* lwa mbanza ina vana kati kwa ndimba, bele kuna ndambu a Ngadi ye Yaze.+
6 I bosi bele kuna Ngiladi+ ye kuna nsi a Tatime-kodese, kwakuna bele kuna Dani-yani yakuna Sidone.+
7 Bele kuna mbanz’angolo ya Turo+ yamuna mbanza zawonso za Anekivi+ ye ezi za Anekenani, bele sukisila kuna Nengebe+ a Yuda kuna Bere-seba.+
8 Wau bamana zieta nsi yawonso, bavutukidi kuna Yerusaleme kuna nsuk’a ngonde vua ye lumbu 20.
9 Yoabe ovene kwa ntinu lutangu lwa nkangu una katangidi. Muna Isaele mwakala 800.000 ma makesa bakala ye nsosolo, muna Yuda mwakala 500.000 ma wan’amakala.+
10 Vava kamana tanga nkangu, o ntim’a Davidi uyangamene.*+ Davidi ovovele kwa Yave vo: “Nsumukini+ kikilu muna diambu diadi mpangidi. Owau, e Yave, dodokolo, loloka e sumu dia selo kiaku,+ kadi dia uzowa kikilu mpangidi.”+
11 Vava Davidi kasikamene muna mene, e diambu dia Yave dizidi kwa Ngadi+ wa ngunza, wa moni a Davidi, oku vo:
12 “Wenda vovesa Davidi vo, ‘I wau wuwu kavovele o Yave: “Mambu matatu isongele. Sola dimosi dina mfwete kuvanga.”’”+
13 Ngadi wizidi kwa Davidi, umvovese vo: “Nga mvengele a mvu nsambwadi ufwete kwiza mu nsi aku?+ Yovo watina atantu aku mu ngonde tatu wau bekulakama?+ Yovo mwakala vuku kia lumbu tatu mu nsi aku?+ Owau toma yindula, unzayisa e mvutu ndenda vana kwa Ndiona untumini.”
14 Davidi ovovese Ngadi vo: “Ediadi diampasi kwa mono. Dodokolo, yambula twabwila vana koko kwa Yave,+ kadi e nkenda zandi zingi;+ kansi kungiambula ko yabwa vana moko ma wantu.”+
15 I bosi, Yave otwikidi vuku+ muna Isaele tuka muna mene-mene yamuna ntangwa yasikidiswa, ozevo muna nkangu mufwidi+ 70.000 tuka kuna Dani yakuna Bere-seba.+
16 Vava mbasi kalambula koko muna fwasa Yerusaleme, Yave omwene ntantu mu kuma kia mpasi katwese,+ ovovese mbasi ona wafwasanga nkangu vo: “Sila vovo! Kulula koko kwaku.” O mbasi a Yave okedi vana ndambu a bundilu dia Arauna+ wa Nyebuse.+
17 Vava Davidi kamwene mbasi ona wavondanga nkangu, ovovele kwa Yave vo: “Mono nsumukini, mono mpangidi diambu diambi; vo i mameme mama+—adieyi mavangidi? Yambula koko kwaku kwakala omu mono yo mu nzo a se diame.”+
18 E lumbu kiakina Ngadi wizidi kwa Davidi, umvovese vo: “Tomboka kuna bundilu dia Arauna wa Nyebuse,+ watungila Yave e ziku.”
19 Davidi otombokele mun’owu wa diambu dia Ngadi, dina Yave kankanikina.
20 Arauna vava kamwene ntinu ye selo yandi bekwizanga vana kena, vana vau Arauna ovaikidi, ovumbamene vana vena ntinu.
21 Arauna oyuvuidi vo: “E mfumu ame wa ntinu, ekuma kezidi kwa selo kiandi?” Davidi ovutwidi vo: “Bundilu diaku ngizidi sumba yatungila Yave e ziku kimana e vuku kiafokoka muna nkangu.”+
22 Kansi Arauna ovovese Davidi vo: “Bonga yo kwaku e mfumu ame wa ntinu, ikuvana mpe konso kina ovuidi o mfunu.* Tala e ngombe za tukau twangioka, mabaya ma bundilu ye vangu ya ngombe ikala se nkuni.
23 E ntinu, yawonso yayi ikuvana yo.”* I bosi, Arauna ovovese ntinu vo: “Yambula Yave wa Nzambi aku kasonga e dienga.”
24 O ntinu ovovese Arauna vo: “Ke wau ko, sumba isumba yo kwa ngeye muna ntalu andi. Kizolele tambika tukau kwa Yave wa Nzambi ame ko tuna ndembele futila e nzimbu.” Muna kuma kiaki, Davidi osumbidi e bundilu ye ngombe muna 50 ma sekele* za palata.+
25 Davidi otungidi vo e ziku+ dia Yave, otambikidi tukau twangioka ye yimenga ya ungudi. I bosi Yave owidi ndodokela zau mu kuma kia nsi,+ e vuku kifokokele muna Isaele.
Mvovo vana yand'a lukaya
^ Yovo “kuna sude.”
^ Yovo “ntona za Davidi ziyangamene.”
^ Mvovo wa sina: “konso eki omwene vo kiambote muna meso maku.”
^ Mvovo wa sina: “Arauna ovene yo.”
