Wanzole wa Samuele 7:1-29
7 O ntinu vava kayantika zingila muna nzo andi,*+ Yave umvene e vundu muna mbeni zawonso zinzietele,
2 o ntinu ovovese Natani+ wa ngunza vo: “Tala, omono mu nzo a mabaya ma nsedele izingilanga,+ kansi e Nkel’a Nzambi aludi muna saba ina.”+
3 Natani ovutwidi kwa ntinu vo: “Vanga mawonso mena muna ntim’aku, kadi Yave una yaku.”+
4 Kansi muna fuku wauna, diambu dia Yave dizidi kwa Natani, oku vo:
5 “Wenda vovesa Davidi wa selo kiame vo: ‘I wau wuwu kavovele Yave: “Nga ngeye okuntungila e nzo ina ikala e?+
6 Kadi tuka lumbu kina yavaikisa nkangu a Isaele muna Engipito yamu unu,+ kikalanga mu nzo ko, kansi mu nzo a ngoto ye saba kaka ikalanga.*+
7 Ekolo kiawonso yakangalanga yo Aneyisaele* awonso, nga vakala ye lumbu kina yayuvula kwa mfumu za makanda ma Isaele ana yatumbika mu vungula e nkangu ame Isaele, oku vo: ‘Ekuma nualembi kuntungila nzo a mabaya ma nsedele?’”’
8 Owau vovesa kwa Davidi wa selo kiame vo: ‘I wau wuwu kavovele o Yave a vu: “Ikatwidi muna madilu, muna ovungulwilanga mameme+ kimana wakala se mfidi a nkangu ame Isaele.+
9 Ikala yaku konso kuna okwenda,+ fukisa ifukisa* e mbeni zaku zawonso vovo wina;+ tundidika itundidika nkumbu aku anene+ nze nkumbu za akwa tunda ova nza.
10 Vana ivana e fulu kwa nkangu ame Isaele yo kubasikidisa mûna, i muna bekala, ke betokaneswa diaka ko; ke bebangikwa diaka kwa yimpumbulu ko nze muna lumbu yavioka,+
11 tuka muna lumbu kina yatumbika afundisi+ muna nkangu ame Isaele. Ikuvundisa muna mbeni zaku zawonso.+
“‘“Vana ntandu, Yave uvovese vo Yave okutungila nzo.*+
12 Vava kilunga e lumbu yaku+ yo fwa nze mase maku, ivingisa e mbongo aku, i sia vo, mwan’aku,* vana fulu kiaku, isikidisa kintinu kiandi.+
13 Yandi otunga e nzo itwasa zitu muna nkumbu ame,+ isikidisa kunda kia kintinu kiandi yakwele mvu.+
14 Omono ikala se diandi, yandi okala mwan’ame.+ Avo ovangidi vilwa, ikuntumbila muna lubamba lwa wantu ye ngwanda za wan’a wantu.*+
15 Kikatula walakazi wame ko muna yandi, nze una yakatulwila wo kwa Saulu,+ ona yavempola ova ndose aku.
16 E nzo aku ye kintinu kiaku kisikila yakwele mvu vovo wina; e kunda kiaku kia kimfumu kisikidiswa yakwele mvu.”’”+
17 Natani osamwini mambu mama mawonso ye mona-meso kiawonso kwa Davidi.+
18 Muna kuma kiaki, Davidi wa Ntinu okotele yo vuanda vana ntadisi a Yave, ovovele vo: “E Mfumu Yave, omono i nani? E kanda diame i nki wau umpangidi mambu mama mawonso?+
19 Vana ntandu a mawonso mama, e Mfumu Yave, ovovele mpe vo e nzo a selo kiaku kolo kiayingi ikala kuna ntwala; e Mfumu Yave, owau i nsiku* kwa wantu awonso.
20 Adieyi diaka ikuvovesa omono selo kiaku Davidi? Kadi otomene kunzaya,+ e Mfumu Yave.
21 Muna diambu diaku ye mun’owu wa ntim’aku,* ovangidi mambu mama manene mawonso yo sengomona mo kwa selo kiaku.+
22 I dianu vo wanene kikilu,+ e Mfumu Yave. Ke vena mosi ko ofwanane yaku;+ ke vena Nzambi ko, ngeye kaka;+ mawonso tuwidi omu matu meto masongele ziku kia diambu diadi.
23 Nkia zula kiankaka ova nza kina nze nkangu aku Isaele?+ O Nzambi wabakûla se nkangu andi,+ wakivangila e nkumbu+ muna mambu manene ye mansisi wavanga muna wete diau.+ Wayinga e zula ye nzambi zau muna wete dia nkangu aku una wakikûdila muna Engipito.
24 Wakitula Isaele se nkangu aku akivuila yakwele mvu;+ ongeye Yave wakala se Nzambi au.+
25 “Owau, e Yave wa Nzambi, o nsilu una wasila selo kiaku ye nzo andi, lungisa wo yakwele mvu, vanga dina wasila o nsilu.+
26 Yambula nkumbu aku yatundidikwa yakwele mvu,+ kimana wantu bavova vo: ‘Yave a vu i Nzambi a Isaele,’ e nzo a selo kiaku Davidi yasikila ova ndose aku.+
27 Kadi ongeye Yave a vu wa Nzambi a Isaele, osengomwene wo kwa selo kiaku, oku vo, ‘Ikutungila nzo.’*+ Ekiaki i kuma o selo kiaku kakabukidi* mu lomba e sambu kiaki kwa ngeye.
28 E Mfumu Yave, ongeye i Nzambi aludi, o mambu maku maludi,+ ngeye wasia nsilu wa mambu mama mambote kwa selo kiaku.
29 I dianu vo, yambula diayangidika edi diasambula nzo a selo kiaku yazinga yakwele mvu ova ndose aku;+ kadi ngeye wasia nsilu, e Mfumu Yave, e nzo a selo kiaku yambula yasambulwa yakwele mvu muna nsambu zaku.”+
Mvovo vana yand'a lukaya
^ Yovo “lûmbu lwandi.”
^ Mvovo wa sina: “izietelanga.”
^ Mvovo wa sina: “wan’a Isaele.”
^ Mvovo wa sina: “dunguna idunguna.”
^ Yovo “kimfumu.”
^ Mvovo wa sina: “ndiona otuka muna nim’aku.”
^ Nanga, “Adami.”
^ Yovo “luludiku.”
^ Yovo “muna luzolo lwaku.”
^ Yovo “kimfumu.”
^ Mvovo wa sina: “omwene vo diambote mu ntim’andi.”
