Wanzole wa Paulu Kuna kwa Esi Tesalonika 3:1-18
3 Kuna diaka e sambu ampangi, nutusambidilanga+ kimana e diambu dia Yave* diamwangana mu nzaki+ yo kembelelwa wauna uvangamanga vana kati kweno,
2 twavuluzwa vana vena akwa nsoki ye yimpumbulu,+ kadi ke wantu awonso ko bena yo lukwikilu.+
3 Kansi, o Mfumu nkwa kwikizi, okunukumika yo kunutanina muna ndiona wambi.
4 Vana ntandu, vo i yeno, tuna ye vuvu muna Mfumu vo nusadilanga ye lukwamanana sadila nkanikinu mieto.
5 Yambula Mfumu kakwamanana fila e ntima mieno muna zola kwa Nzambi+ yo muna luzindalalu muna diambu dia Kristu.+
6 Tunukanikini ampangi muna nkumbu a Mfumu eto Yesu Kristu, nuvavuka konso mpangi okangalelanga mu mpila yambi,+ ke mun’owu wa lusansu luna nuatambula* kwa yeto ko.+
7 Kadi yeno kibeni nuzeye una nufwete kututanginina,+ e kuma kadi oyeto ke twakangalela mu mpila yambi ko vana kati kweno,
8 ngatu dia madia mangani e ngovo.*+ Kansi, twafuntukanga yo sala fuku yo mwini kimana twalembi kala se zitu diampwena kwa konso muntu mu yeno.+
9 Ke sia ko vo ke twakala yo nswa ko watambula konso lekwa,+ kansi twazola vo yeto kibeni twakala se mbandu ina nutanginina.+
10 Kieleka, vava twakala yeno, twanukanikina vo: “O muntu avo kazolele sala ko, kadie ko.”+
11 Kadi tuwidi wo vo ankaka vovo vuina mu mpila yambi bekangalelanga,+ ke besalanga nkutu ko, kansi ayakami a mambu mangani.+
12 Wantu awaya, tubakanikini yo kubawondelela muna Mfumu Yesu Kristu vo basadila kuna luvuvamu yo dia madia ma salu kia moko mau.+
13 Vo i yeno ampangi, ke nuyambula vanga edi diambote ko.
14 Kansi avo muntu kazolele lemvokela edi tuvovele mu nkanda wau ko, nunsia e dimbu, nuyambula kala yandi e ntwadi,+ kimana kamona e nsoni.
15 Ke numbadikila nga mbeni ko, kansi nukwamanana kunludika+ nze mpangi.
16 Yambula Mfumu a luvuvamu kanuvana luvuvamu ntangwa zawonso ye muna mambu mawonso.+ O Mfumu kakala yo yeno awonso.
17 I mavimpi mame mama, mono kibeni Paulu+ nsonekene wo muna koko kwame, mena vo i dimbu muna nkanda miawonso; eyayi i mpila isonekenanga.
18 Yambula e nsambu za Mfumu Yesu Kristu zakala yo yeno awonso.
