Wanzole wa Tusansu 10:1-19
-
Nkangu a Isaele ukolamene Rekabame (1-19)
10 Rekabame wele kuna Sekeme,+ kadi Isaele yawonso bezidi kuna Sekeme kimana bantumbika se ntinu.+
2 Vava Yerobame+ wa mwan’a Nebate kawá wo, (kuna Engipito kakala, kadi i kuna katinina Solomo wa Ntinu),+ o Yorobame ovutukidi tuka muna Engipito.
3 Bambokelese, Yerobame ye Isaele yawonso bezidi kwa Rekabame, bavovele vo:
4 “O se diaku watubadisila e vangu.+ Avo ovevuele e salu kiabala ye vangu kiazitu* katuvana se diaku, tukusadila ntangwa zawonso.”
5 Ubavovese vo: “Nuenda kweno, nuvutuka vava kivioka lumbu tatu.” O nkangu wele kwandi.+
6 Rekabame wa Ntinu wele mokena ye ambuta* ana basadila se diandi Solomo vava kakala moyo, ubayuvuidi vo: “Nkia luludiku nulenda kumpana kimana yavana e mvutu kwa nkangu wau?”
7 Bamvutwidi vo: “Avo osongele ngemba kwa nkangu wau, wavanga dina balombele yo kubavana mvutu zambote, ozevo ntaudi zaku bekala e ntangwa zawonso.”
8 Kansi, obembwele luludiku lwa ambuta,* wele mokena ye matoko bakula yandi, ana bansadisanga.+
9 Ubayuvuidi vo: “Nkia luludiku nulenda kumpana kimana twavana e mvutu kwa nkangu wau umpovese vo: ‘Vevola e vangu kina katuvana o se diaku’?”
10 Matoko ana bakula yandi bamvovese vo: “Edi ofwete vutula kwa nkangu wau uvovese vo: ‘Se diaku wabadisa e vangu kieto, kansi ngeye utuvevolwela kio’; i wau wuwu ofwete kubavovesa, ‘O nlembo ame ansuka uluta luketo lwa se diame o vonga.
11 Se diame wanuvana e vangu kiazitu, omono ikudikila e zitu dia vangu kieno. Se diame wanutumbila muna lubamba, kansi omono ikunutumbila muna nzuadi mia nsende.’”
12 Yerobame ye nkangu awonso bezidi kwa Rekabame muna lumbu kina kiatatu, wauna ntinu kabavovesa vo: “Nuvutuka vava kivioka lumbu tatu.”+
13 Kansi, ntinu ubavene mvutu zabala. Rekabame wa Ntinu obembwele luludiku lwa ambuta.*
14 Ubavutwidi mun’owu wa luludiku lwa matoko, oku vo: “Badisa ibadisa e vangu kieno yo kudikila kio e zitu. Se diame wanutumbila muna lubamba, kansi mono ikunutumbila muna nzuadi mia nsende.”
15 Ozevo, o ntinu kawididi nkangu ko, kadi kwa Nzambi aludi diatuka,+ kimana dialungana e diambu kavova o Yave muna Akiya+ wa musi Silo kwa Yerobame wa mwan’a Nebate.
16 Avo i Isaele yawonso, wau vo ntinu kabawididi ko, o nkangu uvutwidi kwa ntinu vo: “Nkia kunku tuna kiau muna Davidi? Ke tuna ye vua ko muna mwan’a Yisai. E Isaele, nuenda kwa nzambi zeno. E Davidi,+ owau lunga-lunga e nzo aku!” Muna diadi, wan’a Isaele awonso bavutukidi muna nzo zau.*+
17 Kansi, Rekabame okwamanene yala Aneyisaele ana bazingilanga muna mbanza za Yuda.+
18 Rekabame wa Ntinu otumini Adorame+ ona wakala se nkengi awana basalanga e salu yangolo, kansi Aneyisaele bantubidi matadi yavana kafwa. Rekabame wa Ntinu, omente muna kalu diandi dia vita, otinini kuna Yerusaleme.+
19 Aneyisaele batelamena e nzo a Davidi yamu unu kiaki.
Mvovo vana yand'a lukaya
^ Yovo “kiampasi.”
^ Yovo “akuluntu.”
^ Yovo “akuluntu.”
^ Yovo “akuluntu.”
^ Mvovo wa sina: “saba yau.”
