Wanzole wa Tusansu 11:1-23
11 Vava Rekabame kalweke kuna Yerusaleme, vana vau okutakese nzo a Yuda yawonso ye Benyamini,+ 180.000 ma makesa matoma longwa* banuanisa Isaele muna vutulwisa kintinu kwa Rekabame.+
2 Kansi, e diambu dia Yave dizidi kwa Semaya+ wa muntu a Nzambi aludi, oku vo:
3 “Vovesa Rekabame wa mwan’a Solomo wa ntinu a Yuda ye Isaele yawonso muna Yuda ye Benyamini,
4 ‘I wau wuwu kavovele o Yave: “Ke nutomboki ko, nuanuanisa mpangi zeno. Konso muntu kavutuka kuna nzo andi, kadi kwa mono ditukidi.”’”+ Muna diadi, balemvokele diambu dia Yave, bavutukidi, ke banuanisi Yerobame ko.
5 Rekabame okedi muna Yerusaleme, otungidi mbanza zangolo muna Yuda.
6 Otungidi* Beteleme,+ Etame, Tekoa,+
7 Bete-zuro, Soko,+ Adulami,+
8 Ngati,+ Maresa, Zifi,+
9 Adoraime, Lakisi,+ Azeka,+
10 Sora, Ayalone,+ Keberone,+ osiamisi mbanza zazi muna Yuda ye Benyamini.
11 Vana ntandu, osiamisi mbanza zangolo, osidi mo mfumu za makesa, wabavananga madia, mazi ye vinyu,
12 ovene ngubu zanene ye maswanga muna mbanza zazi zawonso; otomene zo siamisa. Yuda ye Benyamini ikedi muna lutumu lwandi.
13 Anganga ye Anelevi bakedi muna Isaele yawonso, batukidi muna zunga yau, bezidi yikama Rekabame.
14 Anelevi basisidi madilu ma twelezi yau ye mavua mau,+ bele kuna Yuda ye Yerusaleme, kadi Yerobame yo wan’andi babakatwidi muna kiyekwa kiau kia sala se nganga za Yave.+
15 Yerobame otumbikidi nganga zandi muna mabata,+ basadilanga nkuya mina nze nkombo+ yo wan’a ngombe kavanga.+
16 Awana bakala ye tima dia vava Yave wa Nzambi a Isaele muna makanda mawonso ma Isaele, balende anganga kuna Yerusaleme muna kela yimenga kwa Yave wa Nzambi a mase mau.+
17 Basiamisi kintinu kia Yuda yo yikama Rekabame wa mwan’a Solomo mu mvu tatu, bakangalela muna nzil’a Davidi yo Solomo mu mvu tatu.
18 Rekabame obongele nkento, Makalata wa mwan’a Yerimote wa mwan’a Davidi, wa mwan’a Abikaile wa mwan’ankento a Eliabe+ wa mwan’a Yisai.
19 Kuna kwalanda, wanwutila wan’amakala: Yusi, Semareya yo Zami.
20 I bosi, obongele diaka Maka wa ntekelo a Abesalome.+ Kuna kwalanda, wanwutila Abiya,+ Atai, Ziza yo Selomite.
21 Rekabame olutidi zola Maka wa ntekelo a Abesalome ke mu akento andi awonso ko ye makangu mandi,+ kadi akento 18 kakala yau ye makangu 60, wan’amakala 28 kawuta ye wan’amakento 60.
22 Rekabame otumbikidi Abiya wa mwan’a Maka se ntu ye mfidi vana vena mpangi zandi, kadi wakala ye kani dia kunkitula se ntinu.
23 Kansi, Rekabame okedi nkwa umbakuzi, omwanganisi akaka muna wan’andi muna mvivu miawonso mia Yuda ye Benyamini, yamuna mbanza zawonso zangolo,+ ubavene ulolo wa madia, ubavene akento ayingi.
