Wanzole wa Tusansu 13:1-22
13 Muna mvu una wa 18 wa luyalu lwa Yerobame wa Ntinu, Abiya oyantikidi yala muna Yuda.+
2 Mvu tatu kayala muna Yerusaleme. E nkumbu a ngudi andi, Maka+ wa mwan’a Uriele wa musi Ngibeya.+ Vakala kaka vita vana vena Abiya yo Yerobame.+
3 Abiya ovaikidi ye makesa 400.000 matoma longwa.* Yerobame mpe ovaikidi ye makesa 800.000 matoma longwa,*+ bakiatamene mu nuana yo Abiya.
4 Abiya otelamene vana Mongo a Semaraime muna zunga kia miongo mia Eferaime, ovovele vo: “Ungwá, e Yerobame ye Isaele yawonso.
5 Nga ke nuzeye wo ko vo Yave wa Nzambi a Isaele wavana kimfumu kia Isaele kwa Davidi yakwele mvu,+ kwa yandi yo kwa wan’andi+ muna kangu dia mungw’e?*+
6 Kansi, Yerobame+ wa mwan’a Nebate wa ntaudi a Solomo wa mwan’a Davidi, otelamene kanuanisa mfumu andi.+
7 E miolo ye yimpumbulu banyikamene. Basundidi Rekabame wa mwan’a Solomo e ngolo, kadi Rekabame nleke kwandi ye nkwa unkuta, kalendele kubanuanisa ko.
8 “Owau nubenze vo nulenda nwanisa kintinu kia Yave vana moko ma wan’a Davidi wau vo nu ndong’ayingi, nuina ye wan’a ngombe a wolo ana Yerobame kanuvangila se nzambi zeno.+
9 Nga ka yeno ko nuayinga nganga za Yave,+ wan’a Arone, Anelevi yo tumbika nganga za yeno kibeni, nze nkangu mia nsi zankaka?+ Konso muntu watwasanga* mwan’a ngombe ye mameme nsambwadi ma makoko, olenda kituka se nganga a teke ina vo ke nzambi ko.
10 Vo i yeto, Yave i Nzambi eto,+ ke tunyambwidi ko; tuna ye nganga zeto, wan’a Arone besadilanga Yave, o Anelevi bekubasadisanga muna salu.
11 Bafutumunanga tukau twangioka kwa Yave konso mene ye konso masika+ kumosi ye ndumbu ya nsunga.+ E mbolo za lubakanisu*+ zina vana meza ma wolo walembi sangwa lekwa, konso fuku+ bekwikanga minda mia wolo muna zangikilwa+ yandi, kadi tulungisanga kiyekwa kieto kuna kwa Yave wa Nzambi eto; kansi yeno nunyambwidi.
12 Tala, Nzambi aludi una yeto, okutufilanga, e nganga zandi bena ye mpungi besika kimana twanuana yeno. E wan’a Isaele, ke nunuani yo Yave wa Nzambi a mase meno ko, kadi ke nusunda ko.”+
13 Kansi, Yerobame otumini makesa maswekama kuna nim’au, muna diadi makesa mandi makedi kuna ntwal’a Yuda ye kuna nim’au.
14 Ayuda vava bavilukidi, bamwene vo e vita ina oku nima y’oku ntwala. Dianu vo babokele Yave,+ anganga basikidi e mpungi ye zú diangolo.
15 Ayuda bakazidi kazu kia vita. Vava Ayuda bakazidi kazu kia vita, Nzambi aludi otufakese Yerobame ye Isaele yawonso vana vena Abiya ye Yuda.
16 Aneyisaele batinini vana vena Yuda, kadi Nzambi ubayekwele vana moko mau.
17 Abiya ye wantu andi bavondele ulolo muna yau, bavondele 500.000 ma Aneyisaele batoma longwa.*
18 Muna ntangwa yayina wan’a Isaele bakulwilu, Ayuda basundidi e ngolo, kadi babundidi e vuvu* muna Yave wa Nzambi a mase mau.+
19 Abiya okwamanene lakama Yerobame, okutumwini mbanza ye mavata mandi, Betele+ ye mavata mandi,* Yesana ye mavata mandi, Eferone+ ye mavata mandi.
20 Yerobame kasidi kala diaka ye ngolo ko muna lumbu ya Abiya; i bosi, Yave unwende, ofwidi.+
21 Kansi, Abiya okumamene. Kuna kwalanda osompele akento 14+ yo wuta wan’amakala 22 yo wan’amakento 16.
22 Mambu mankaka ma lusansu lwa Abiya, mana kavanga ye mana kavova, masonama muna nkand’a Ido+ wa ngunza.
Mvovo vana yand'a lukaya
^ Mvovo wa sina: “masolwa.”
^ Mvovo wa sina: “masolwa.”
^ I sia vo, kangu dia mvu ya mvu, ke disobakana ko.
^ Mvovo wa sina: “wazadisanga moko mandi ye.”
^ I sia vo, mbolo za lutambiku.
^ Mvovo wa sina: “basolwa.”
^ Mvovo wa sina: “bayekamene.”
^ Yovo “mavata mandi manzungidi.”
