Wanzole wa Tusansu 18:1-34
18 Yosafate wakala ye kimvuama yo nkembo ayingi,+ kansi okangidi e kangu dia longo yo Akabi.+
2 Ke kiavioka mvu miayingi ko, Yosafate okulumukini kwa Akabi kuna Samaria,+ Akabi ovondele ulolo wa* mameme ye ngombe mu kuma kiandi ye nkangu wakala yandi. Osiatamene* kimana Yosafate katomboka yandi kuna Ramote-ngiladi.+
3 Akabi wa Ntinu a Isaele oyuvuidi Yosafate wa Ntinu a Yuda vo: “Nga okwenda yame muna nuanisa Ramote-ngiladi?” Umvutwidi vo: “Ikwenda yaku. O nkangu ame ukala yo nkangu aku, tukala yaku muna vita.”
4 Kansi, Yosafate ovovese ntinu a Isaele vo: “Dodokolo, teka yuvula diambu dia Yave.”+
5 Ozevo, o ntinu a Isaele okutakese ngunza, tezo kia 400, ubayuvuidi vo: “Nga twenda nuanisa Ramote-ngiladi yovo kiendi ko e?” Bavutwidi vo: “Tomboka, kadi Nzambi aludi oyekola yo vana moko ma ntinu.”
6 Yosafate ovovele vo: “Nga va fulu kiaki ke vena ngunz’a Yave ko?+ Yambula twanyuvula.”+
7 Muna diadi, o ntinu a Isaele ovovese Yosafate vo: “Vena ye muntu mosi+ ona tulenda yuvulwila Yave; kansi kikunzolanga ko, kadi ke sakulanga mambu mambote ko mu kuma kiame, mambu mambi kaka.+ I Mikaya wa mwan’a Yimela.” Yosafate ovovele vo: “E ntinu, kuvovi wowo ko.”
8 Muna kuma kiaki, ntinu a Isaele obokele mbanda-mbanda mosi, umvovese vo: “Untwasila Mikaya wa mwan’a Yimela mu nzaki.”+
9 O ntinu a Isaele yo Yosafate wa ntinu a Yuda bafongele konso muntu vana kunda kiandi kia kimfumu, bavuete mvuatu mia kintinu; bavuende vana bundilu diakala vana ndambu a vitu dia Samaria, ngunza zawonso zisakwidi vana bena.
10 Sedekiya wa mwan’a Kenana ukivangidi mpoka za sengwa, ovovele vo: “I wau wuwu kavovele o Yave, ‘Muna mpoka zazi obukumuna* Asuria yavana okubafukisa.’”
11 E ngunza zawonso zisakwidi diambu diau dimosi, oku vo: “Tomboka kuna Ramote-ngiladi, okubasunda;+ Yave oyekola yo vana moko ma ntinu.”
12 Muntu ona wayenda bokela Mikaya umvovese vo: “Tala, ngunza zawonso basakwidi diambu diambote kwa ntinu. Dodokolo, yambula mvovo miaku miakala mpe miambote+ nze mvovo miau.”+
13 Kansi, Mikaya ovovele vo: “Ndidi e ndofi muna Yave wa Nzambi amoyo, konso diambu kekumpovesa o Nzambi ame, i diau ivova.”+
14 I bosi, ukisunzwidi kwa ntinu, o ntinu unyuvuidi vo: “E Mikaya, nga twenda nuanisa Ramote-ngiladi yovo kiendi ko?” Vana vau, ovutwidi vo: “Tomboka, sunda osunda; yekolwa beyekolwa vana moko maku.”
15 O ntinu umvovese vo: “Nkumbu nkwa ikudisa e ndofi vo kumpovesa diambu diankaka ko, kansi umpovesa kaka e ludi muna nkumbu a Yave?”
16 Mikaya umvutwidi vo: “Mbwene Aneyisaele awonso bamwanganene muna miongo nze mameme makondwa mvungudi.+ Yave ovovele vo: ‘Awaya ke bena ye mfumu ko. Yambula konso muntu kavutuka kuna nzo andi kuna luvuvamu.’”
17 O ntinu a Isaele ovovese Yosafate vo: “Kivovese wo ko vo, ‘Ke sakula mambu mambote ko mu kuma kiame, kansi mambu mambi kaka’?”+
18 Mikaya ovovele vo: “Nuwá diambu dia Yave: Mbwene Yave ovuende vana kunda kiandi kia kimfumu,+ e vu kiawonso kia zulu+ kitelamene vana lunene lwandi ye vana lumonso lwandi.+
19 Yave ovovele vo: ‘Nani ovuna Akabi wa Ntinu a Isaele kimana katomboka yo bwila kuna Ramote-ngiladi?’ Mosi ovovele edi, mosi ovovele diankaka.
20 Vezidi mwanda umosi,*+ otelamene vana vena Yave, ovovele vo: ‘Mono ikumvuna.’ Yave unyuvuidi vo: ‘Aweyi okumvunina?’
21 Ovutwidi vo: ‘Ivaika yo kituka se mwand’a luvunu muna nua mia ngunza zandi zawonso.’ Ovovele vo: ‘Vuna okumvuna yo kunsunda. Wenda wo vanga.’
22 Yave osidi mwand’a luvunu muna nua mia ngunza zaku,+ kansi Yave ovovele vo mpasi omona.”
23 Sedekiya+ wa mwan’a Kenana ofinamene, owende Mikaya+ e mbata vana bundi,+ ovovele vo: “Mu nkia nzila mwand’a Yave umpiokele muna vovana yaku?”+
24 Mikaya umvutwidi vo: “Ozaya nzila yayi muna lumbu kina okota muna suku dia kati yo swekama.”
25 I bosi, o ntinu a Isaele ovovele vo: “Nubonga Mikaya nuamvutula kwa Amone wa mfumu a mbanza ye kwa Yoase wa mwan’a ntinu.
26 Ubavovesa vo: ‘I wau wuwu kavovele o ntinu: “Nusia muntu ndioyu muna pelezo,+ nundikila muna fimbolo yo maza yavana ivutuka kuna luvuvamu.”’”
27 Kansi, Mikaya ovovele vo: “Avo ovutukidi kuna luvuvamu, ozevo Yave kavovane yame ko.”+ Okudikidi vo: “Nuwá, yeno nkangu wawonso.”
28 Kansi, ntinu a Isaele yo Yosafate wa ntinu a Yuda batombokele kuna Ramote-ngiladi.+
29 O ntinu a Isaele ovovese Yosafate vo: “Ivuata mvuatu miankaka, ngienda kuna vita, kansi ngeye vuata mvuatu miaku mia kintinu.” Ozevo, ntinu a Isaele ovuete mvuatu miankaka, bakotele muna vita.
30 Ntinu a Suria okanikini afidi a makalu mandi ma vita vo: “Ke lunuanisa muntu ankaka ko, kakala nleke yovo mbuta, ntinu a Isaele kaka.”
31 Vava afidi a makalu ma vita bamona Yosafate, bavovele vo: “Ndioyu i ntinu a Isaele.” Ozevo, banlende banuanisa; Yosafate oyantikidi kaza yo lomba lusadisu,+ o Yave unsadisi. Vana vau o Nzambi ubavengomwene vana kena.
32 Vava afidi a makalu ma vita bamona vo ke ntinu a Isaele ko, bayambwidi kunlanda.
33 Kansi, muntu mosi lembi wo kana otelese ntinu a Isaele nzanza muna mayikilu ma kinkutu kiandi kia sengwa.* O ntinu ovovese nati a kalu diandi dia vita vo: “Viluka, umpaikisa muna vita* kadi ndwele.”+
34 E vita ikedi kikilu yangolo muna lumbu kiakina, o ntinu a Isaele otelameso kaka muna kalu dia vita, okedi mantalani ye Asuria yakuna masika; ofwidi muna ndimuk’a ntangwa.+
Mvovo vana yand'a lukaya
^ Mvovo wa sina: “okelele ulolo wa yimenga ya.”
^ Yovo “Owondelele.”
^ Yovo “onungunuina; otudila.”
^ Yovo “mbasi mosi.”
^ Kinkutu kivuatanga makesa muna kuyitanina muna vita.
^ Mvovo wa sina: “ndo.”
