Wanzole wa Tusansu 23:1-21
23 Muna mvu una wa nsambwadi, Yoyada okabukidi, okangidi kangu ye mfumu za nkama:+ Azareya wa mwan’a Yerokame, Yisemaele wa mwan’a Yekanane, Azareya wa mwan’a Obede, Maseya wa mwan’a Adaya yo Elesafate wa mwan’a Zikere.
2 I bosi, bele zieti muna Yuda, bakutakese Anelevi+ muna mbanza zawonso za Yuda ye ntu mia nzo za mase ma Isaele. Vava balwaka muna Yerusaleme,
3 e nkutakani yawonso bakangidi e kangu+ yo ntinu muna nzo a Nzambi aludi, i bosi ubavovese vo:
“Nutala, mwan’a ntinu, yandi oyala wauna Yave kasia nsilu mu kuma kia wan’a Davidi.+
4 I wau wuwu nuvanga: Anganga ye Anelevi ana bekala mu salu+ muna Lumbu kia Vundu, nubavambula mu buka tatu. E buka kiantete bekala se ayingidi a mavitu;+
5 e buka kiazole kikala kuna nzo a ntinu,+ e buka kiatatu kikala kuna Vitu dia Nkubilwa, o nkangu wawonso ukala muna yanzala ya nzo a Yave.+
6 Ke nuyambula muntu ko kakota muna nzo a Yave nanga vo nganga kaka yo Anelevi ana bekala mu salu.+ I yau bekota, kadi e buka kiau kiavauka, o nkangu wawonso belungisa e mbebe au kuna kwa Yave.
7 Anelevi bafwete zunga ntinu muna ndambu zawonso, konso muntu ye nuaninua yandi vana moko. Ndiona okota muna nzo kafwete vondwa. Nukala yo ntinu konso fulu kakwenda.”*
8 Anelevi ye Ayuda awonso bavanga una bakanikinu kwa Yoyada wa nganga. Muna kuma kiaki, konso muntu okutakese akwandi ana bakala mu salu muna Lumbu kia Vundu, kumosi y’awana ke bakala mu salu ko muna Lumbu kia Vundu,+ kadi Yoyada wa nganga kasindika buka+ ko.
9 Yoyada wa nganga ovene kwa mfumu za nkama,+ madionga ye ngubu zakete* ye ngubu zavindumuka za Davidi wa Ntinu,+ zina zakala muna nzo a Nzambi aludi.+
10 Osidi nkangu wawonso muna fulu yau, konso muntu ye nuaninua yandi vana moko, tuka kuna lunene yakuna lumonso lwa nzo, vana ndambu a ziku ye vana ndambu a nzo, yau awonso bazungidi o ntinu.
11 I bosi, bavaikisi mwan’a ntinu,+ bamvuikidi kolowa* ye Kimbangi,*+ bantumbikidi se ntinu, Yoyada yo wan’andi bankusidi mazi. Bavovele vo: “Zinga kwaku e ntinu!”+
12 Vava Ataleya kawa mazu ma nkangu utikunanga yo sanisina ntinu, vana vau wizidi kwa nkangu muna nzo a Yave.+
13 Omwene ntinu otelamene vana ndambu a lunzi diandi, vana mwelo. Amfumu+ ye asiki a mpungi bakedi yo ntinu, nkangu wawonso wa nsi ukembelanga+ yo sika mpungi, ayimbidi basikanga masikilu yo vita ntu* muna yimbila nkunga. Muna kuma kiaki, Ataleya otiazwini mvuatu miandi, okazidi oku vo: “Ntelameno! Ntelameno!”
14 Kansi, Yoyada wa nganga watuma e mfumu za nkama ana bakala se akengi a makesa, wabavovesa vo: “Nunkatula vana kati kwa makesa. Konso ona okunlanda kafwete vondwa muna nsosolo!” Kadi nganga wavova vo: “Ke vondelwa muna nzo a Yave ko.”
15 Dianu vo, bambaka yo kunata, vava balwaka vana Vitu dia Mvalu dia nzo a* ntinu, bamvondele vâna.
16 Yoyada okangidi e kangu, oyandi yo nkangu wawonso yo ntinu vo bekwamanana kala nkangu a Yave.+
17 I bosi, nkangu wawonso a nsi wele kuna nzo* a Bale, babangwidi yo,+ bakosomwene maziku mandi ye teke yandi,+ bavondele Matane wa ngang’a Bale+ vana ntwal’a maziku.
18 I bosi, Yoyada oyekekele kinkengi kia nzo a Yave kw’anganga ye Anelevi, ana Davidi kasia muna buka kimana basadila muna nzo a Yave, bayokanga tukau kwa Yave,+ wauna wasonama muna Nsiku a Mose,+ kuna kiese ye nkunga, una Davidi kakanikina.*
19 Osidi mpe ayingidi+ muna mavitu ma nzo a Yave, kimana mwalembi kota konso muntu wafunzuka.
20 Obongele mfumu za nkama,+ azitu, ayadi a nkangu, ye nkangu wawonso wa nsi bakulumwini ntinu tuka kuna nzo a Yave yakuna nzo a* o ntinu muna nzil’a vitu dia ntandu, bavuandisi ntinu vana kunda+ kia kimfumu.+
21 O nkangu wawonso muna nsi uyangalele, e mbanza ivuvamene, kadi bavondele Ataleya muna nsosolo.
Mvovo vana yand'a lukaya
^ Mvovo wa sina: “vava kekota yovo vaika.”
^ E ngubu zakete zisadilwanga kwa akwa mfumba.
^ Nanga nkanda wakala ye Nsiku a Nzambi.
^ Yovo “banda.”
^ Yovo “bavanganga e sinsu.”
^ Yovo “lûmbu lwa.”
^ Yovo “tempelo.”
^ Mvovo wa sina: “muna moko ma Davidi.”
^ Yovo “lûmbu lwa.”
