Wanzole wa Tusansu 25:1-28
25 Amaziya mvu 25 kakala miau vava kayantika yala, mvu 29 kayala muna Yerusaleme. E nkumbu a ngudi andi Yoyadane wa musi Yerusaleme.+
2 Wavanga mambu mambote vana meso ma Yave, kansi ke mu ntim’asikila ko.
3 Vava kintinu kiandi kiasikila, ovondele selo yandi ana bavonda se diandi wa ntinu.+
4 Kansi, kavonda wan’au ko, kadi wavanga una wasonama muna Nsiku, muna nkand’a Mose, muna Yave kakanikina vo: “Mase ke bafwete fwila mu kuma kia wan’au ko, o wana ke bafwete fwila mu kuma kia mase mau ko; konso muntu ofwila muna sumu diandi.”+
5 Amaziya okutakese Ayuda, ubatelamese mun’owu wa nzo za mase mau, mfumu za mafunda ye mfunu za nkama muna Yuda yawonso ye Benyamini.+ Otangidi awana bakala ye mvu 20 yovo vioka,+ omwene vo vakala 300.000 ma makesa matoma longwa,* ana balenda kota muna vu kia makesa yo sadila maswanga ye ngubu zanene.
6 Vana ntandu, wasonekesa 100.000 ma makesa muna Isaele yo kubafuta 100 talanta* za palata.
7 Kansi, o muntu a Nzambi aludi, wizidi kwa yandi umvovese vo: “E ntinu kuyambula ko vo makesa ma Isaele benda yaku, kadi Yave kena ye Isaele ko,+ ngatu konso muntu muna wan’a Eferaime.
8 Wenda kaka ngeye, vanga diambu, kala yo unkabu muna vita. Avo ke wau ko, o Nzambi aludi olenda kubwisa vana vena mbeni, kadi Nzambi ovuidi nkuma wasadisa+ yo bwisa.”
9 Muna kuma kiaki, Amaziya ovovese muntu a Nzambi aludi vo: “Aweyi mfwete vanga muna talanta 100 zina mpene kwa makesa ma Isaele?” Muntu a Nzambi aludi ovutwidi vo: “Yave olenda kuvana zina zisundidi ezazi.”+
10 Amaziya osindikidi makesa mayiza kwa yandi tuka kuna Eferaime, ubavutwidi kuna nsi au. Kansi, bafungidi kikilu Yuda makasi, dianu vo bavutukidi kuna nsi au yo makasi mayingi.
11 Amaziya okabukidi, wele yo makesa mandi kuna Ndimb’a Mungwa,+ ovondele 10.000 ma makesa ma Seyire.+
12 Ayuda babakidi kimoyo 10.000 ma makesa. Babanete vana ntandu a tadi babanengomwene tuka vana ntandu a tadi, yau awonso bamene tiazuka.
13 Makesa mana kavutulwisa Amaziya balembi kwenda yandi kuna vita,+ banuanisi mbanza za Yuda, tuka Samaria+ yakuna Bete-korone;+ bavondele mo 3.000 ma wantu, basanzidi ulolo wa sanzu.
14 Kansi, Amaziya vava katukidi kuna kavondele Anedome, otwese nzambi za wan’a Seyire, otongekele zo se nzambi zandi,+ ovumbamene zo, oyokèle zo ndumbu.
15 Muna kuma kiaki, Yave ofungidi kikilu Amaziya makasi, untumini ngunza, ona umvovese vo: “Ekuma otombele nzambi za nkangu zina zalembi vuluza nkangu au vana moko maku?”+
16 Ekolo kavovanga, o ntinu umvovese vo: “Nga twatumbikidi se nludiki a ntinu e?+ Sia pi-i!+ Nga fwa ozolele?” O ngunza osidi pi-i, kansi ovovele diaka vo: “Nzeye wo vo Nzambi okanini kufwasa wau ovangidi diambu diadi yo lembi lemvokela luludiku lwame.”+
17 Amaziya wa Ntinu a Yuda vava kamokena ye aludiki andi, watuma e nsangu kwa Yoase wa mwan’a Yoakaze wa mwan’a Yeu wa ntinu a Isaele, oku vo: “Wiza twanuana.”*+
18 Yoase wa Ntinu a Isaele otumini e nsangu zazi kwa Amaziya wa Ntinu a Yuda, oku vo: “E nkek’a mfinda muna Lebanone ivovese nti a nsedele muna Lebanone vo: ‘Vana mwan’aku ankento kwa mwan’ame ayakala kakala se nkaz’andi.’ Kansi, vaviokele bulu kia mfuta kia Lebanone kidiatakese nkek’a mfinda.
19 Ngeye ovovele vo: ‘Mono ngwende Edome.’+ Dianu vo, ntim’aku utundalele, ozolele tambula nkembo. Kansi owau, kala kaka muna nzo aku.* Ekuma ozolele twasila mpasi yo bwa kumosi ye Yuda e?”
20 Kansi, Amaziya kawidi ko;+ kadi i luzolo lwa Nzambi aludi lwa kubayekola vana moko ma mbeni zau,+ kadi balende nzambi za Edome.+
21 Muna kuma kiaki, Yoase wa Ntinu a Isaele otombokele, oyandi yo Amaziya wa Ntinu a Yuda banuene kuna Bete-semese,+ mbanz’a Yuda.
22 Yuda otufakeso kwa Isaele, konso muntu otinini kuna nzo andi.*
23 Yoase wa Ntinu a Isaele obakidi Amaziya wa Ntinu a Yuda wa mwan’a Yoase wa mwan’a Yoakaze,* kuna Bete-semese. I bosi unete kuna Yerusaleme, obangwidi yaka kia Yerusaleme tuka kuna Vitu dia Eferaime+ yakuna Vitu dia Konko,+ 400 za yinkoso.*
24 Obongele wolo wawonso ye palata ye salanganu yawonso yakala muna nzo a Nzambi aludi, ye* Obede-edome yo lusalu lwa nzo a* ntinu+ ye abakami. I bosi ovutukidi kuna Samaria.
25 Amaziya+ wa mwan’a Yoase wa ntinu a Yuda, mvu 15 kazinga kuna nim’a lufwa lwa Yoase+ wa mwan’a Yoakazi wa ntinu a Isaele.+
26 Vo i mambu mankaka ma lusansu lwa Amaziya tuka kuna lubantiku yakuna mbaninu, nga ke masonama muna Nkanda wa Ntinu mia Yuda ye Isaele ko e?
27 Tuka muna ntangwa ina Amaziya kayambula landa Yave, bamvuandila mfulu+ muna Yerusaleme, watinina kuna Lakisi, kansi batwika wantu banlanda kuna Lakisi yo kumvondela kûna.
28 Batwasa e vimbu diandi muna mvalu yo kunzika vana fulu kiaziama mase mandi muna mbanz’a Yuda.
Mvovo vana yand'a lukaya
^ Mvovo wa sina: “masolwa.”
^ Mvovo wa sina: “twatalan’e ndose.”
^ Yovo “lûmbu lwaku.”
^ Mvovo wa sina: “saba kiandi.”
^ Oyikilwanga mpe vo Akaziya.
^ Yovo “yakala muna lutumu lwa.”
^ Yovo “lûmbu lwa.”
