Wanzole wa Tusansu 29:1-36
29 Kizekeya+ mvu 25 kakala miau vava kayantika yala, mvu 29 kayala muna Yerusaleme. E nkumbu a ngudi andi Abiya wa mwan’a Zakariya.+
2 Wavanga mambu mambote vana meso ma Yave,+ wauna kavanga o Davidi wa nkulu andi.+
3 Muna mvu una wantete wa luyalu lwandi, muna ngonde antete, oziwidi yelo ya nzo a Yave yo vangulula yo.+
4 I bosi, obokelese anganga ye Anelevi, ubakutakese vana yanzala, kuna este.
5 Ubavovese vo: “Nungwa, yeno Anelevi. Nuyivaula owau,+ nuvaula nzo a Yave wa Nzambi a mase meno, nukatula lekwa kiafunzuka vana fulu kiavauka.+
6 Kadi mase meto bakolama, bavanga mambu mambi vana meso ma Yave wa Nzambi eto.+ Bambembola, bavengomona ndose zau muna saba kia Yave, bamfila e nima.+
7 Bazikidi yelo ya nkotelo a tempelo,+ bazimini e minda miakala vo.+ Bayambwidi yoka ndumbu+ yo kela yimenga yangioka+ kwa Nzambi a Isaele vana fulu kiavauka.
8 Muna kuma kiaki, makasi ma Yave mafusukidi muna Yuda ye Yerusaleme,+ ubakitwidi se lekwa kia kenonokena, kuma kia mwena wonga ye kia tusevo,* nze una nulenda kukimwena muna meso meno.+
9 Mase meto babwila muna nsosolo,+ o wan’eto amakala ye amakento, ye akazi eto banatwa muna kinkole muna kuma kiaki.+
10 Owau ngina ye luzolo lwa nsi a ntima lwa kanga e kangu yo Yave wa Nzambi a Isaele+ kimana makasi mandi makatuka omu yeto.
11 E wan’ame, eyayi ke ntangwa ya zinga moko ko,* kadi Yave wanusola nuatelama vana ndose andi, nuansadila+ yo kunyokela e ndumbu.”+
12 Dianu vo, Anelevi batelamene: Muna Anekoate,+ Makati wa mwan’a Amasai yo Yoele wa mwan’a Azareya; muna wan’a Merare,+ Kisi wa mwan’a Abedi yo Azareya wa mwan’a Yalelele; muna Anengeresone,+ Yoake wa mwan’a Zima yo Edene wa mwan’a Yoake;
13 muna wan’a Elisafane, Simere yo Yuele; muna wan’a Asafi,+ Zakariya yo Mataneya;
14 muna wan’a Emane,+ Yekiele yo Simei; muna wan’a Yedutune,+ Semaya yo Uziele.
15 Bakutakese mpangi zau, bayivaudi, bele velelesa nzo a Yave,+ wauna kakanikina ntinu, mun’owu wa diambu dia Yave.
16 Anganga bakotele muna nzo a Yave muna velelesa yo, bavaikisi lekwa yawonso yafunzuka basolwele muna tempelo a Yave, banete yo vana yanzala+ kia nzo a Yave. Anelevi babongele yo, banete yo kuna mbazi kuna Ndimb’a Kiderone.+
17 Muna lumbu kiantete kia ngonde antete bayantikidi e salu kia vaula, muna lumbu kia nana kia ngonde, balweke vana nkotelo a tempelo a Yave.+ Bavelelese nzo a Yave lumbu nana, muna lumbu kina kia 16 kia ngonde antete, bamanisi.
18 I bosi bele kwa Kizekeya wa Ntinu bavovele vo: “Tuvelelese nzo a Yave yawonso ye ziku dia tukau twangioka+ ye salanganu yawonso+ ye meza ma mbolo za lubakanisu*+ ye salanganu yandi yawonso.
19 E salanganu yawonso ina kabonga Akazi wa Ntinu muna luyalu lwandi vava kakolamena Nzambi,+ tukubikidi yo, tuvawidi yo,+ ina vana ndambu a ziku dia Yave.”
20 Kizekeya wa Ntinu otelamene muna mene-mene, okutakese akuluntu a mbanza, i bosi, batombokele kuna nzo a Yave.
21 Batwese ngombe nsambwadi za makoko ye vaka nsambwadi ya mameme yo wan’a mameme nsambwadi a makoko ye vaka nsambwadi ya nkombo se lukau lwa sumu mu kuma kia kintinu, nzo avauka ye Yuda.+ Ovovese anganga wan’a Arone batambika yo vana ziku dia Yave.
22 Bavondele ngombe,+ anganga babongele menga, bazazidi mo vana ziku;+ i bosi bavondele vaka ya mameme, bazazidi menga vana ziku, bavondele wan’a mameme, bazazidi menga vana ziku.
23 I bosi, batwese vaka ya nkombo ya lukau lwa sumu vana vena ntinu ye nkutakani, batensekele yo moko.
24 Anganga bavondele yo, batambikidi yo se lukau lwa sumu, basidi menga mau vana ziku muna luyambulwilu lwa masumu ma Isaele, kadi ntinu wavova vo lukau lwa ngioka ye lukau lwa sumu lwavanua mu kuma kia Isaele yawonso.
25 Muna kolo kiakina, osidi Anelevi muna fulu yau muna nzo a Yave ye yimbalu, nsambi, kokolo+ wauna kakanikina Davidi+ yo Ngadi+ wa moni a ntinu yo Natani+ wa ngunza, kadi Yave wavana nkanikinu wau muna ngunza zandi.
26 Muna diadi, Anelevi batelamene ye masikilu ma Davidi, anganga mpe ye mpungi.+
27 I bosi, Kizekeya watuma vo batambika kimenga kia ngioka vana ziku.+ Vava bayantikidi yoka lukau, e nkung’a Yave uyantikidi yimbilwa ye mpungi zilandanga masikilu ma Davidi wa Ntinu a Isaele.
28 E nkutakani yawonso yavumbama ekolo kiayimbilwanga e nkunga, e mpungi zisikilu—bakwamanana wo vanga yavana bamana yoka lukau.
29 Vava bamene tambika lukau, ntinu ye awonso bakedi yandi, bavumbamene yo fukama.
30 Kizekeya wa Ntinu ye akuluntu bavovese Anelevi bakembelela Yave muna mvovo mia Davidi+ ye mia Asafi+ wa moni. Bakembelele ye kiese kiawonso, bavumbamene yo fukama.
31 Kizekeya ovovele vo: “Owau nuvawilu* muna salu kia Yave, nuiza, nutwasa yimenga ye tukau twa matondo mu nzo a Yave.” Dianu vo, e nkutakani yiyantikidi twasa yimenga ye nkayilu a matondo, awonso bakala yo ntim’a mvevo batwese tukau twangioka.+
32 Olwalu i lutangu lwa tukau twangioka twatwaswa kwa nkutakani: 70 lwa ngombe, 100 vaka ya mameme, 200 za wan’a mameme a makoko—twawonso twatu i tukau twangioka twa Yave+—
33 o tukau twavauka: 600 za ngombe ye 3.000 ma mameme.
34 Wau vo ke vakala nganga zafwana ko muna katula nkanda mia bulu yawonso ya tukau, e mpangi zau Anelevi babasadisa+ yavana salu kiamanisa ye nganga bamana kukivaula,+ kadi Anelevi balutidi sia e sungididi* muna diambu dia kukivaula ke mu anganga ko.
35 Vakala mpe ye tukau twayingi twangioka+ ye mazi ma yimenga ya ungudi+ ye tukau twa ndua twavewanga kumosi ye tukau twangioka.+ I mpila yayi bavutukila* e salu kia nzo a Yave.
36 Kizekeya ye nkangu wawonso bamwene kiese mu kuma kia mana kavangidi o Nzambi aludi kwa nkangu,+ kadi mawonso mama ku kinsalukisa mavangamena.
Mvovo vana yand'a lukaya
^ Yovo “lusembo.”
^ Yovo “vunda.”
^ I sia vo, mbolo za lutambiku.
^ Mvovo wa sina: “Owau nuzadisi moko.”
^ Mvovo wa sina: “ntima miansongi.”
^ Yovo “yakubamena.”
