Wanzole wa Tusansu 31:1-21
31 Vava bamana dia lambu diadi, Aneyisaele awonso bele muna mbanza za Yuda, bakosomwene malunzi mavauka,+ babwisidi mavindi mavauka,*+ babwisidi mpe mabata+ ye maziku+ muna Yuda yawonso ye Benyamini, muna Eferaime ye Manase,+ yavana bafwasa mo emvimba, i bosi Aneyisaele awonso bavutukidi muna mbanza zau, konso muntu muna vua diandi.
2 Kizekeya osikidisi anganga muna buka yau+ ye Anelevi muna buka yau ya salu,+ anganga ye Anelevi konso buka muna salu kiau,+ muna tambika tukau twangioka ye yimenga ya ungudi, muna sala yo kembela yo vutula matondo muna mavitu ma yanzala ya* Yave.+
3 E kunku kia lusalu lwa ntinu kiavewanga muna tukau twangioka+ yo tukau twa mene-mene ye tukau twa masika,+ tukau twangioka twa Lumbu ya Vundu,+ twa nzangama za ngonde+ ye muna nkinzi+ nze una wasonama muna Nsiku a Yave.
4 Vana ntandu, okanikini nkangu wakala muna Yerusaleme bavana kunku kifwanukini anganga ye Anelevi+ kimana batoma tatidila* nsiku a Yave.
5 Vava kiavewa nkanikinu wau, Aneyisaele bavene ulolo wa mbongo antete ya masa, vinyu ampa, mazi,+ wiki ye mbongo yawonso ya mpatu;+ batwese tini kia kumi muna yawonso.+
6 Aneyisaele ye Ayuda ana bazingilanga muna mbanza za Yuda, batwese tini kia kumi kia ngombe ye mameme, tini kia kumi kia lekwa yavaulwa+ mu kuma kia Yave wa Nzambi au. Batwese yo, bakutakese yo muna mazudika mayingi.
7 Muna ngonde ina yatatu+ bayantikidi kutika tukau twau muna mazudika; bamanisi mo muna ngonde yansambwadi.+
8 Kizekeya ye amfumu vava balwaka yo mona mazudika mama, bakembele Yave yo sambula nkangu andi a Isaele.
9 Kizekeya oyuvuidi anganga ye Anelevi mu kuma kia mazudika,
10 Azareya wa mbut’anganga wa nzo a Sadoke umvutwidi vo: “Tuka bayantikila twasa tukau muna nzo a Yave,+ o nkangu udianga yo yukuta yo sisa ulolo wa madia, kadi Yave osambwidi nkangu andi, o ulolo wa madia mama i masuvidi.”+
11 I bosi, Kizekeya ubavovese vo bakubika malundilu*+ muna nzo a Yave, bakubikidi mo.
12 Bakwamanene mo twasa tukau, tini yakumi+ ye lekwa yavauka kuna ziku; Konaniya wa Nlevi otumbikilu kinkengi kia lekwa yayi yawonso, mpangi andi Simei, i landi kiandi.
13 Yekiele, Azaziya, Nakati, Asaele, Yerimote, Yozabade, Eleyele, Yisemakiya, Makati yo Benaya, bakala se akengi muna wisa kia Konaniya ye mpangi andi Simei muna lutumu lwa Kizekeya wa Ntinu; Azareya i nkengi a nzo a Nzambi aludi.
14 O Kore wa mwan’a Yimena wa Nlevi, wa nyingidi a vitu dia este,+ wasiwa kinkengi kia tukau twa mvevo+ twa nzo a Nzambi aludi, muna kaya tukau twa Yave+ ye lekwa isundidi ovauka.+
15 Muna wisa kiandi mwakala Edene, Mineyamine, Yesua, Semaya, Amareya yo Sekaneya muna mbanza z’anganga.+ Bavewa kiyekwa kiabundwanga e vuvu kia kayanesa kunku yafwanana kwa mpangi zau muna buka yau,+ ambuta ye aleke.
16 Bakayilanga mpe lekwa yayi kwa wan’amakala bakala ye mvu ntatu yovo vioka ana bakisonekesa mun’owu wa tuvila twau, basadilanga muna nzo a Yave lumbu ke lumbu, muna buka yau.
17 O tuvila twa anganga twasonamena muna nzo za mase mau,+ ye Anelevi ana bakala ye mvu 20 yovo vioka+ muna buka yau ya salu.+
18 Muna luvila lwau mwasonama mpe wan’au amakala ye amankento kumosi ye yingiana-ngiana yau yawonso, akazi au, ye nkutakani au yawonso—kadi bakivaulanga mu kuma kia lekwa yavauka ye kiyekwa kiau kia salu—
19 kumosi yo wan’a Arone, anganga ana bakala muna mpatu za zunga e mbanza zau.+ Muna mbanza zawonso mwakala ye akala ana basolwa muna nkumbu kimana bavananga kunku kwa wan’amakala awonso vana vena anganga ye awonso basonama muna tuvila twa Anelevi.
20 I wau kavanga o Kizekeya muna Yuda yawonso, wakwamanana vanga mambu mambote ye mansongi ye kwikizi vana vena Yave wa Nzambi andi.
21 Muna konso salu kasala muna tomba Nzambi andi, kiakala muna salu kia nzo a Nzambi aludi+ yovo muna Nsiku ye nkanikinu, wavangila mo ye nsi a ntima wawonso yo sikila.
Mvovo vana yand'a lukaya
^ Tala Nsas’a Mvovo.
^ Mvovo wa sina: “ndo za.”
^ Yovo “bakivana emvimba muna.”
^ Yovo “maseka ma dila.”
