Wanzole wa Tusansu 34:1-33
34 Yosiya+ mvu nana kakala miau vava kayantika yala, mvu 31 kayala muna Yerusaleme.+
2 Wavanga mambu mansongi vana meso ma Yave, wakangalela muna nzila za Davidi wa nkulu andi, kasidi vengomoka kulunene ko ngatu kulumonso.
3 Muna mvu wa nana wa luyalu lwandi, vava kakala nleke, oyantikidi tomba Nzambi a Davidi wa nkulu andi;+ muna mvu wa 12, oyantikidi velelesa Yuda ye Yerusaleme+ muna katula mabata+ ye mavindi mavauka,* teke yavalwa+ ye teke ya sengwa.*
4 Vana ntandu, obangwidi maziku ma teke ya Bale vana ndose andi, obangwidi mpe maziku ma ndumbu makala vana ntandu a teke ya Bale. Okosomwene mpe mavindi mavauka,* teke yavalwa ye teke ya sengwa,* okitwidi yo se mbundukutu, omwanganese yo muna ziami y’awana bakelelanga yo yimenga.+
5 Oyokele visi ya nganga muna maziku mau.+ I mpila yayi kavelelesela Yuda ye Yerusaleme.
6 Wele muna mbanza za Manase, Eferaime,+ Simeone yamuna Nafetali, muna fulu yafwasakana ya mbanza zazi,
7 obangwidi maziku yo kosomona mavindi mavauka* ye teke yavalwa,+ okitwidi yo se mbundukutu; obangwidi mpe maziku mawonso ma ndumbu muna nsi a Isaele,+ i bosi ovutukidi kuna Yerusaleme.
8 Muna mvu una wa 18 wa luyalu lwandi, vava kamanisa velelesa e nsi ye tempelo,* otumini Safani+ wa mwan’a Azaleya, Maseya wa nkuluntu a mbanza yo Yoake wa mwan’a Yoakaze wa nsoneki, benda vangulula e nzo a Yave wa Nzambi andi.+
9 Bele kwa Kilekiya wa ngang’ambuta, bamvene nzimbu zatwaswa muna nzo a Nzambi. Anelevi ana bayingilanga mavitu bakutika e nzimbu zazi muna mbanza za Manase, Eferaime ye awonso basala muna Isaele,+ Yuda, Benyamini ye kwa nkangu a Yerusaleme.
10 Bavene nzimbu zazi kwa akengi a salu kia nzo a Yave. Kuna diaka e sambu, asadi a nzo a Yave basadilanga nzimbu zazi muna londa yo vangulula e nzo.
11 E nzimbu zavewa kwa akwa umbangu ye atungi kimana basumbila matadi mavalwa, mabaya ma vangila mvuambu ye nkambikwa muna tungila e nzo zina ntinu mia Yuda bayambula vo zabwa.+
12 Asadi basadidi e salu kiau una ufwene.+ Batumbika kinkengi kwa Anelevi: Yakati yo Obadiya, Anemerare,+ Zakariya yo Mesulame, Anekoate.+ Anelevi awonso ana bazaya sika masikilu,+
13 bakala se akengi a anati a mazitu ye wantu awonso ana basalanga e salu ya mpila mu mpila; Anelevi akaka asoneki bakala, afidi ye ayingidi a mavitu.+
14 Vava bayenda bonga e nzimbu zatwaswa muna nzo a Yave,+ Kilekiya wa nganga osolwele nkand’a Nsiku a Yave+ una kavana kwa* Mose.+
15 Kilekiya ovovese Safani wa nsoneki vo: “Nsolwele nkand’a Nsiku muna nzo a Yave.” Kilekiya ovene wo kwa Safani.
16 Safani onete nkanda kwa ntinu, umvovese vo: “E ntaudi zaku bevanganga mawonso batuminu.
17 Bakutikidi e nzimbu zikedi muna nzo a Yave, bavene zo kwa akengi y’awana besalanga e salu.”
18 I bosi, Safani wa nsoneki ovovele mpe kwa ntinu vo: “Tala nkanda kampene o Kilekiya wa nganga.”+ Safani oyantikidi wo tanga vana vena o ntinu.+
19 O ntinu vava kawidi mvovo mia Nsiku, otiazwini mvuatu miandi.+
20 I bosi, o ntinu okanikini Kilekiya, Akikami+ wa mwan’a Safani, Abedone wa mwan’a Mika, Safani wa nsoneki yo Asaya wa selo kia ntinu, oku vo:
21 “Nuenda yuvula Yave mu kuma kiame, mu kuma ki’awana basala muna Isaele ye Yuda muna diambu dia mvovo mia nkanda wau usolwelo; kadi o makasi ma Yave mekutulwakila mengi kikilu, o mase meto ke balemvokela mvovo mia Yave ko muna vanga mawonso masonama mu nkanda wau.”+
22 Muna kuma kiaki, Kilekiya y’awana batumwa kwa ntinu, bele kwa Kuleda wa ngunz’a nkento.+ Kuleda i nkaz’a Salumi wa mwan’a Tikeva wa mwan’a Karase, wa nlundi a mvuatu. Kuleda muna Yerusaleme kazingilanga, kuna Belo Kiazole; bele mokena yandi kûna.+
23 Ubavovese vo: “I wau wuwu kavovele o Yave wa Nzambi a Isaele, ‘Nuvovesa ndiona unutumini kwa mono vo:
24 “I wau wuwu kavovele o Yave: ‘Mpasi itwasa va fulu kiaki ye muna nkangu andi,+ e sibu yawonso yasonama muna nkanda+ una batangidi vana ndose a ntinu a Yuda.
25 Wau vo bangiambwidi,+ bayokele ndumbu kwa nzambi zankaka kimana bankendeleka+ muna salu yawonso ya moko mau, makasi mame melwakila e fulu kiaki, ke memana ko.’”+
26 Kansi, nuvovesa ntinu a Yuda ona unutumini nuayuvula Yave: “I wau wuwu kavovele o Yave wa Nzambi a Isaele: ‘Muna kuma kia mambu mana owidi,+
27 wau vo ntim’aku ulemvokele, uyisakidikidi vana ndose a Nzambi vava owidi e mvovo miandi mu kuma kia fulu kiaki ye nkangu andi, uyikulwidi vana ndose ame yo tiazuna mvuatu miaku yo dila ova ngina, omono mpe iwidi,+ u kavovele o Yave.
28 Muna kuma kiaki, ikuvundisa vamosi yo mase maku,* ovunda kuna luvuvamu muna ziami kiaku, meso maku ke memona mpasi zawonso itwasa va fulu kiaki ko ye nkangu andi.’”’”+
I bosi, banete mvutu kwa ntinu.
29 Muna kuma kiaki, ntinu obokelese akuluntu awonso a Yuda ye Yerusaleme.+
30 I bosi, ntinu otombokele kuna nzo a Yave ye Ayuda awonso, nkangu a Yerusaleme, anganga, Anelevi—nkangu wawonso, ambuta ye aleke. Otangidi muna matu mau o mambu mawonso ma nkand’a kangu una wasoloka muna nzo a Yave.+
31 O ntinu otelamene vana fulu kiandi, okangidi kangu+ vana ndose a Yave vo olanda Yave yo lunda nkanikinu miandi, mîna miandi ye nzengo zandi ye nsi a ntim’andi yawonso ye kiwuntu kiandi kiawonso+ muna lungisa mambu ma kangu masonama muna nkanda wau.+
32 Vana ntandu, okasakese awonso ana bakala muna Yerusaleme ye Benyamini batambulwila e kangu diadi. Nkangu a Yerusaleme bavangidi mun’owu wa kangu dia Nzambi, wa Nzambi a mase mau.+
33 Yosiya okatwidi lekwa yawonso y’angemi muna nsi zawonso za Aneyisaele,+ osadisi awonso muna Isaele basadila Yave wa Nzambi au. Vava kakala moyo* ke bayambula landa Yave wa Nzambi a mase mau ko.
Mvovo vana yand'a lukaya
^ Tala Nsas’a Mvovo.
^ Yovo “teke yazunzwa.”
^ Tala Nsas’a Mvovo.
^ Yovo “teke yazunzwa.”
^ Tala Nsas’a Mvovo.
^ Mvovo wa sina: “nzo.”
^ Mvovo wa sina: “vana moko ma.”
^ E kingana kiaki lufwa kiyikanga.
^ Mvovo wa sina: “lumbu yawonso ya zingu kiandi.”
