Wanzole wa Tusansu 6:1-42
6 Muna diadi, Solomo ovovele vo: “Yave ovovele vo ozingila muna tombe kia matuti.+
2 Owau, mbanisi kutungila e nzo yambote, fulu kiaku kiasikila mûna ozingila yakwele mvu.”+
3 I bosi, o ntinu ovilukidi, oyantikidi sambula e nkutakani yawonso ya Isaele, ekolo nkutakani yawonso ya Isaele yakala yatelama.+
4 Ovovele vo: “Yambula Yave wa Nzambi a Isaele kakembelwa; muna moko mandi olungisi nsilu a nu’andi una kasila kwa Davidi wa se diame, oku vo,
5 ‘Tuka muna lumbu kina yavaikisa nkangu ame muna nsi ya Engipito, kiasola mbanza ko muna makanda mawonso ma Isaele yatungilwa mo e nzo kimana e nkumbu ame yakala mo,+ ngatu sola muntu kakala ntu muna nkangu ame Isaele.
6 Kansi nsolele Yerusaleme+ kimana mwakala nkumbu ame, nsolele Davidi kayala nkangu ame Isaele.’+
7 Davidi wa se diame wakala ye luzolo lwa nsi a ntima lwatunga e nzo mu kuma kia nkumbu a Yave wa Nzambi a Isaele.+
8 Kansi Yave ovovese Davidi wa se diame vo: ‘O luzolo luna muna ntim’aku i tunga nzo mu kuma kia nkumbu ame, diambote wau wina ye luzolo lwalu muna ntim’aku.
9 Kansi, ka ngeye ko otunga e nzo, mwan’aku ona owuta,* yandi otunga e nzo mu kuma kia nkumbu ame.’+
10 Yave olungisi o nsilu una kasia, kadi mvingidi va fulu kia Davidi wa se diame, mvuende va kunda kia kimfumu kia Isaele,+ wauna Yave kasila o nsilu.+ Ntungidi mpe e nzo mu kuma kia nkumbu a Yave wa Nzambi a Isaele,
11 nsidi mo Nkela ina yasiwa e kangu+ dina Yave kakanga yo nkangu a Isaele.”
12 I bosi, Solomo otelamene vana vena ziku dia Yave vana ntwal’a nkutakani yawonso ya Isaele, oyalumwini moko mandi.+
13 (Kadi Solomo ovangidi e vovelo kiansongo, osidi kio vana kati kwa yanzala.+ O lambuka kwandi yinkoso tanu,* o sanzuka yinkoso tanu, o lá yinkoso tatu; otelamene vâna.) Ofukamene vana ntwal’a nkutakani yawonso a Isaele, oyalumwini moko mandi kuna zulu,+
14 ovovele vo: “E Yave wa Nzambi a Isaele, kavena Nzambi ofwanane yaku ko, kuna zulu yovo ova ntoto, olundanga e kangu diaku yo songa walakazi kwa selo yaku, ana bekangalelanga vana ndose aku ye ntim’au wawonso.+
15 Olungisi nsilu aku una wasila selo kiaku Davidi wa se diame.+ Wasia nsilu muna nu’aku, o unu olungisidi wo muna koko kwaku.+
16 E Yave wa Nzambi a Isaele, owau lungisa nsilu una wasila selo kiaku Davidi wa se diame, vava wavova vo: ‘Avo wan’aku betoma sia e sungididi muna nzila zau muna diatila muna nsiku ame,+ wauna wadiatila vana ndose ame, muna luvila lwaku ke mukondwa muntu ko ovuanda vana kunda kia kimfumu kia Isaele.’+
17 Owau, e Yave wa Nzambi a Isaele, yambula o nsilu una wasila selo kiaku Davidi walungana.
18 “E Nzambi, nga ozingila kikilu kumosi yo wantu ova ntoto?+ Elo, e zulu, e zulu dia mazulu ke dilendi kufwana ko;+ e nzo yayi ntungidi ozevo nki!+
19 Owau, tamba o matu muna sambu ye ndodokela za selo kiaku, e Yave wa Nzambi ame, wá e kazu ye sambu kina selo kiaku kalombele kwa ngeye.
20 Yambula meso maku matemoka mwamu nzo yayi fuku yo mwini, va fulu kina wavova vo osia nkumbu aku,+ wá e sambu kina selo kiaku kesambanga va fulu kiaki.
21 Wá e ndodokela za selo kiaku ye ndodokela za nkangu aku Isaele, vava besamba va fulu kiaki,+ yambula wawá vana fulu kiaku okalanga koko zulu;+ elo, yambula wawá yo loloka.+
22 “Avo muntu osumukini nkwandi, odisisu e ndofi,* vava kekala kuna nsi a ndofi,* wizidi va ziku diaku mwamu nzo yayi,+
23 wá kwaku koko zulu, kudingalala ko, fundisa selo yaku muna vutula e mbi kwa kimpumbulu, o mavangu mandi makala muna ntu andi,+ lungisa nkwa unsongi yo kunsendela mun’owu wa unsongi wandi.+
24 “Avo nkangu aku Isaele usundilu kwa mbeni, wau bakwamanene kusumukina,+ avo bavilukidi yo kembelela nkumbu aku+ yo samba+ yo kudodokela mwamu nzo yayi,+
25 wá kwaku koko zulu,+ loloka e sumu dia nkangu aku Isaele, ubavutula mu nsi ina wavana kwa yau ye kwa mase mau.+
26 “Avo zulu dikangamene, lembi noka diaka e mvula+ wau vo bakwamanene kusumukina,+ avo basambidi va fulu kiaki yo kembelela nkumbu aku yo yambula sumu diau vava okubamwesesa e mpasi,*+
27 wá kwaku koko zulu, loloka masumu ma selo yaku, ma nkangu aku Isaele, kadi okubalonga e nzila yambote ina bafwete diatila;+ wanokesa e mvula+ mwamu nsi aku eyi wavana kwa nkangu aku se vua.
28 “Avo mvengele ukotele mwamu nsi,+ yovo vuku,+ mbangazi yangolo, mbumbu,+ buka kia makonko+ yovo makonko mamfwasi yovo mbeni zibazungidi muna mbanza zau,*+ yovo konso vuku kiankaka yovo mayela,+
29 konso sambu,+ konso ndodokela idodokelwa+ kwa muntu yovo kwa nkangu aku wawonso Isaele (kadi konso muntu ozeye vuku ye mpasi zandi),+ avo bayalumwini moko mau mwamu nzo yayi,+
30 wá kwaku koko zulu, kuna fulu kiaku okalanga,+ yambula waloloka;+ senda konso muntu mun’owu wa nzila zandi, kadi ozeye ntim’andi (ngeye kaka otomene zaya e ntima mia wantu),+
31 kimana bavumina yo diatila muna nzila zaku e lumbu yawonso bezingila muna nsi ina wavana kwa mase meto.
32 “Muna diambu dia nzenza una vo ke nkangu aku a Isaele ko, ona watuka muna nsi yandá mu kuma kia nkumbu aku anene*+ ye koko kwaku kwankuma ye koko kwaku kwalambuka, vava kekwiza samba mwamu nzo yayi,+
33 wá kwaku koko zulu, e fulu kiaku kina okalanga, vanga mawonso kekulomba o nzenza kimana nkangu miawonso mia nza bazaya e nkumbu aku,+ bavumina wauna uvanganga nkangu aku Isaele, bazaya wo vo e nkumbu aku ivovelwanga mwamu nzo yayi ntungidi.
34 “Avo nkangu aku wele nuanisa mbeni zau muna nzila ina okubatuma+ yo samba+ kwa ngeye mwamu mbanza yayi wasola ye mwamu nzo yayi ntungidi mu kuma kia nkumbu aku,+
35 wá kwaku koko zulu e sambu kiau ye ndodokela zau, zenga e diambu muna wete diau.+
36 “Avo basumukini (kadi ke vena muntu ko olembi sumukanga)+ wabafungila makasi ye kubayekola kwa mbeni, babanata se abakami kuna vala yovo lukufi,+
37 avo bavilukidi o ntima muna nsi ina benatwa yo vutuka kwa ngeye yo kudodokela muna nsi ina bekala se abakami, oku vo: ‘Tusumukini, vilwa tuvangidi; diambu diambi kikilu tuvangidi,’+
38 avo bavutukidi kwa ngeye ye ntima wawonso+ ye moyo au wawonso muna nsi a kinkole,+ kuna benatwa, basamba yo tala nsi au ina wavana kwa mase mau, e mbanza ina wasola+ ye nzo yayi ntungidi mu kuma kia nkumbu aku,
39 wá kwaku koko zulu, e fulu kiaku kina okalanga, e sambu kiau ye ndodokela zau, zenga diambu muna wete diau,+ loloka nkangu aku una usumukini.
40 “E Nzambi ame, owau idodokele, yambula meso maku matemoka, e matu maku mawunikina e sambu kisambilwa mwamu* fulu kiaki.+
41 E Yave wa Nzambi tomboka, kota muna vundilu diaku,+ ngeye ye Nkel’a nkum’aku. E Yave wa Nzambi, songa vo luvuluzu kwa ngeye lutuka,* yambula minkwikizi miaku miayangalala muna wete waku.+
42 E Yave wa Nzambi, kubembola* kuswa kiaku ko.+ Sungamena walakazi wasonga kwa Davidi wa selo kiaku.”+
Mvovo vana yand'a lukaya
^ Mvovo wa sina: “mwan’aku ona otuka muna nim’aku.”
^ Yovo “osibilu.” I sia vo, odidi ndofi a luvunu yovo lembi lungisa ndofi ina kadidi, tumbwa ketumbwa.
^ Mvovo wa sina: “sibu.”
^ Yovo “okubakulula.”
^ Mvovo wa sina: “muna nsi za mavitu mau.”
^ Yovo “zitu waku.”
^ Yovo “mu kuma kia.”
^ Mvovo wa sina: “yambula nganga zaku zavuata luvuluzu.”
^ Mvovo wa sina: “kuvilula ndose a.”
