Wanzole wa Yoane 1:1-13
1 Mono mbuta muntu,* kuna kwa mfumu ankento* ona wasolwa yo wan’andi ana yitoma zolanga, ke mono kaka ko kansi awonso mpe ana bazeye ludi,
2 mu kuma kia ludi kikalanga omu yeto, kikala yeto yakwele mvu.
3 Nsambu ye nkenda yo luvuvamu lutuka kwa Nzambi wa Se ye kwa Yesu Kristu wa Mwan’a Se, zakala yeto kumosi ye ludi yo zola.
4 Ntomene yangalala wau mbwene vo ankaka muna wan’aku bekangalelanga muna ludi,+ wauna twatambula nkanikinu kwa Se.
5 Owau idodokele, e mfumu ankento (kisonekene nkanikinu wampa ko, kansi una kaka tukalanga wau tuka kuna lubantiku) vo tuzolananga.+
6 I yau yiyi e nsas’a zola: tukangalelanga mun’owu wa nkanikinu miandi.+ I wau wuwu o nkanikinu, wauna nuawa tuka kuna lubantiku, i mûna nufwete kangalelanga.
7 Kadi akwa luvunu ayingi bavaikidi omu nza,+ ana ke betambulwilanga ko vo Yesu Kristu muna nitu kayizila.+ Awaya i akwa luvunu ye antikristu.+
8 Nutoma kuyikenga kimana nualembi vidisa lekwa ina twafuntukila, kansi nuatambula kaka o nsendo alunga.+
9 Konso ona olutakananga muna malongi ma Kristu yo lembi mo sikila, kena yo Nzambi ko.+ Ndiona osikilanga muna malongi mandi, i yandi una yo Se yo Mwana.+
10 Avo muntu wizidi kwa yeno yo lembi longa longi diadi, ke nuntambula muna nzo zeno+ ko ngatu kunkayisa.
11 Kadi ndiona okunkayisa okala yandi e ntwadi muna mavangu mandi mambi.
12 Kana una vo mambu mayingi ngina mau mu kunusonekena, kizolele mo soneka mu papela ye tinta ko, kansi ngina ye vuvu kia kwiza kwa yeno twamokena mantalani, kimana e kiese kieno kialunga.
13 O wan’a nleke aku ankento, ona wasolwa, batumini mavimpi.
