Nkung’a Solomo 5:1-16
5 “Nkotele muna mpatu ame,+E nsang’ame, e nzitikil’ame.
Nzonzwene mô ame ye titi yame yansunga.+
Ndidi e sasala yame yo wiki wame;Nduini e vinyu ye kimvumina kiame.”+
“Nudia, akundi ame azolwa!
Nunua yo kolwa e mvovo mianzola!”+
2 “Yaleka ngina, kansi ntim’ame wasikama.+
Ngwidi e zú dia nzolw’ame ododelanga!”
“Unziulwila, e nsang’ame, e nzolw’ame,E yembe diame diakondwa e fu!
O ntu ame uzele ye lowa,E nzinga za nsuki zame ziyondalele yo matonsi ma fuku.”+
3 “‘Mvudidi kala e yunga kiame.
Nga mfwete kio vuata diak’e?
Nsukwidi kala malu mame.
Nga mfwete mo funzula diak’e?’
4 O nzolw’ame okatwidi koko kwandi vana vundu dia kielo,O ntim’ame uzakamene mu kuma kiandi.
5 Ntelamene yaziulwila o nzolw’ame;Moko mame mu sonsa mena e mô,E nlembo miame mu sonsa mina o mazi ma mô,Vana simbilwa ya bindikilwa.
6 Nziulwidi o nzolw’ame,Kansi o nzolw’ame ovilukidi, wele kwandi.
Ntokanene vava kele kwandi.*
Imvavidi, kansi kinsolwele ko.+
Imbokele, kansi kantambulwidi ko.
7 Ayingidi bazietanga muna mbanza bansolwele.
Bangwende, bandwekele.
Ayingidi a yaka bakatwidi e fukwa* kiame.
8 Inudisisi e ndofi, e wan’amakento a Yerusaleme:
Avo nusolwele nzolw’ame,Nusamunuina vo kimbevo kia nzola iyela.”
9 “O nzolw’aku mu nki kasundidi o wan’amakala ankaka,E nkento osundidi akento ankaka kimote?
O nzolw’aku mu nki kasundidi o wan’amakala ankaka,Muna kutudisa e ndofi ya mpila yayi e?”
10 “O nzolw’ame wavienga, wambwaki;Olutidi awonso vana vena mafunda kumi.
11 O ntu andi wolo, o wolo usundidi o wete.
E nzinga za nsuki zandi zina nze ndala za ba zinikukanga,*Zandombe nze ngono.
12 Meso mandi mena nze mayembe vana ndambu a nkoko,Meyowelanga muna kimvumina,Mabelele vana kumu dia yanga diazala yo maza.*
13 Mabundi mandi mena nze mpatu a lekwa yansunga,+Miongo mia titi yansunga.
E befo yandi ina nze lenge-lenge, isonsanga mazi ma mô.+
14 O moko mandi mena nze matutu ma wolo, masiwa e kerusolito.
E vumu kiandi i dinu dia nzamba diasekeswa diakuswa e safire.
15 O malu mandi i malunzi ma mâbele matensekwa vana telamesenua ya wolo usundidi o wete.
E mpw’andi ina nga Lebanone, ke ilendi tezaneswa ko nga nti a nsedele.+
16 O nu’andi* i nzenzo kibeni,Mawonso mu kuma kiandi mambote kaka.+
O ndioyu i toko diame, o ndioyu i nzolw’ame, e wan’amakento a Yerusaleme.”
Mvovo vana yand'a lukaya
^ Nanga, “O moyo ame unsisidi vava kavovele.”
^ I sia vo, nlele wa fukila mavembo.
^ Nanga, “nze kangi ya dinsongwa.”
^ Nanga, “vana ndambu a nto.”
^ Mvovo wa sina: “E ndambu yantandu ya kati kwa nu’andi.”
