Afundisi 16:1-31
16 Lumbu kimosi, Samesone wele kuna Ngaza, omwene ko nkembi,* okotele muna nzo andi.
2 Esi Ngaza bavoveso vo: “Samesone una mwamu.” Banzungidi yo kunlangidila vana vitu dia mbanza fuku wawonso. Fuku wawonso bakedi pi-i, yo yindula: “Vava kuma kukia, vonda tukumvonda.”
3 Samesone olele muna nzo a nkembi* yaku dingi-dingi. Oku dingi-dingi osikamene, osimbidi e vitu dia mbanza, ye malunzi mau mole, ovuzidi mo kumosi ye mbindi, osidi yawonso vana mavembo, onete yo vana ntandu a mongo utalanene ye Keberone.
4 I bosi, Samesone ozolele nkento mosi wakala kuna Ndimb’a Soreke, nkumbu andi Delila.+
5 E mfumu za Afelesetia bele kumvovesa vo: “Umvunginika,+ wazaya kuna kutukanga e ngolo zandi zayingi ye una tulenda kumbakila, twankanga yo kunsunda. Avo ovangidi wo, konso muntu vava twina okuvana 1.100 za sekele za palata.”
6 Delila ovovese Samesone vo: “Dodokolo, unzayisa kuna kutukanga e ngolo zaku, mu nki ofwete kangilwa muna kusunda?”
7 Samesone umvovese vo: “Avo bankangidi ye nsinga nsambwadi mia mpunga za nkunzu, zalembi yuma, itovoka yo kituka se mpasi muntu.”
8 Mfumu za Afelesetia bantwasidi nsinga nsambwadi mia mpunga za nkunzu, zalembi yuma, unkangidi mio.
9 O wantu baswekamene muna suku, Delila umvovese vo: “E Samesone, Afelesetia bena vava!” Ozatwini nsinga mia mpunga nga nsing’a vusu uviakane tiya.+ Ozevo, e mbumb’a ngolo zandi ke yazayakana ko.
10 Delila ovovese Samesone vo: “Tala, ongeye umpunginikini yo kumpovesa luvunu lwayingi. Owau unzayisa do, mu nki ofwete kangilwa.”
11 Umvovese vo: “Avo bankangidi muna nsinga miampa mina ke miasadilu ko, itovoka yo kituka se mpasi muntu.”
12 Delila obongele nsinga miampa, unkangidi mio, ovovele vo: “E Samesone, Afelesetia bena vava!” (Muna kolo kiakina wantu baswama bakala muna suku.) Ozevo, odanuini nsinga kakangilu muna moko nga mpusu.+
13 Delila ovovese Samesone vo: “Yamu wau, ongeye umpunginikini, yo kumpovesa luvunu.+ Unzayisa mu nki ofwete kangilwa.” Umvutwidi vo: “Kanga mvanda nsambwadi mia nsuki za ntu ame muna nsinga wa kubila nlele.”
14 Okangidi mio muna nsonso, ovovele vo: “E Samesone, Afelesetia bena vava!” Osikamene, ovuzidi nsonso muna nti wa kubila nlele.
15 Umvovese vo: “Aweyi olenda vovela vo, ‘Zola ikuzolanga’+ wau vo ntim’aku ke wina omu mono ko e? Nkumbu ntatu umpunini, kunzayisi e tuku dia ulolo wa ngolo zaku ko.”+
16 Wau vo wantokanesanga lumbu ke lumbu yo kunkomekena, oyoyele kikilu* yamu tezo kia fwa.+
17 I dianu vo, unziulwidi ntim’andi wawonso, oku vo: “E nsuki za ntu ame ke zisidi zengwa ko,* kadi i Mvambuki a Nzambi tuka muna luwutuku lwame.*+ Avo nsuki zame zizengelo, e ngolo zame zikunkatuka, itovoka yo kituka se mpasi muntu.”
18 Delila vava kamwene vo unziulwidi ntim’andi wawonso, vana vau otumisi mfumu za Afelesetia,+ oku vo: “Nuiza owau, kadi unziulwidi ntim’andi wawonso.” Mfumu za Afelesetia bele kwa yandi ye nzimbu vana moko.
19 Unlekese muna nkat’andi; obokele muntu, kanzenga e mvanda nsambwadi mia nsuki za ntu andi. I dianu vo, Delila olungisi kani diandi, kadi e ngolo za Samesone zikatukidi.
20 I bosi ovovele vo: “E Samesone, Afelesetia bena vava!” Osikamene kuna tulu,+ ovovele vo: “Ke bekumpanga diambu ko nze muna nkumbu miankaka, ikukivuluza.” Kansi kazaya wo ko vo Yave unyambwidi.
21 Afelesetia bambakidi, bantobwele meso. Bakulumukini yandi kuna Ngaza yo kunkanga muna tuvambu tole, okedi se nìki a mbwaza muna pelezo.
22 I bosi, e nsuki za ntu andi zina zazengwa, ziyantikidi diaka o mena.+
23 Mfumu za Afelesetia balungalakene batambikidi kimenga kianene kwa Dangone+ wa nzambi au, yo kembela, kadi bavovele vo: “O nzambi eto oyekwele Samesone wa mbeni eto ova moko meto!”
24 O nkangu vava bamwene Samesone, bakembelele nzambi au, bavovele vo: “O nzambi eto oyekwele mbeni eto ova moko meto, ona ofwasanga e nsi eto+ yo vonda ulolo wa nkangu eto.”+
25 Wau bakedi muna kiese, bavovele vo: “Tutumisa Samesone, twansakanena.” Batumisi Samesone muna pelezo kimana bansakanena; bansidi vana kati kwa malunzi.
26 Samesone ovovese nleke ona wansimba muna koko vo: “Ungiambula yasimba malunzi mana masimbinini e nzo, yayekama mo.”
27 (E nzo yazala ye akala ye akento. E mfumu zawonso za Afelesetia i mûna bakala, vana nludi vakala ye tezo kia 3.000 m’akala ye akento ana batalanga ekolo Samesone kabasevesanga.)
28 Samesone+ obokele kwa Yave, oku vo: “E Mfumu Yave, dodokolo diaku, ungindula yo kunkumika+ nkumbu wau kaka, e Nzambi, yalandila Afelesetia e kunda kana nkutu muna disu diame dimosi.”+
29 Samesone osimbidi malunzi mole ma kati mana masimbinini e nzo, oyekamene mo, dimosi kuna koko kwalunene, diankaka kuna lumonso.
30 Samesone ovovele vo: “Yambula yafwa kumosi ye Afelesetia!” Onungwini malunzi ye ngolo zawonso, e nzo ibwididi zimfumu yo nkangu wawonso wakala mo.+ Ana kavonda vava kafwa, basundidi ana kavonda vava kakala o moyo.+
31 I bosi, mpangi zandi, y’esi nzo a se diandi yau awonso, bakulumukini bambongele. Bele kunzika vana kati kwa Sora+ ye Esetaole, muna ziami kia Manoa+ wa se diandi. Samesone mvu 20 kafundisa Isaele.+
Mvovo vana yand'a lukaya
^ Yovo “nkento a ndumba.”
^ Yovo “nkento a ndumba.”
^ Yovo “o moyo andi usukidi.”
^ Mvovo wa sina: “vumu kia ngudi ame.”
^ Mvovo wa sina: “O ntu ame ke watelele vuayi ko.”
