Afundisi 18:1-31
18 Muna lumbu yayina ke mwakala ntinu ko muna Isaele.+ E kanda dia Anedani+ fulu kia zingila* bavavanga, kadi yamu lumbu yayina, ke batambula vua ko vana vena makanda ma Isaele.+
2 O Anedani batumini wantu tanu a kanda diau, makesa ma Sora ye Esetaole+ kimana benda langa yo fimpa e nsi. Babavovese vo: “Nuenda fimpa e nsi.” Vava balweke muna zunga kia miongo mia Eferaime, kuna nzo a Mika,+ balele mûna.
3 Vava bafinamena e nzo a Mika, bawidi nding’a toko dia Nlevi, bele kwa yandi, banyuvuidi vo: “Nani utwese kwaku? Nkia salu osalanga va fulu kiaki? Nki kisimbidi kwaku?”
4 Ubavovese vo: “Mika, owu y’owu kampangidi. Futa kamfutidi kimana yansadilanga se nganga.”+
5 I bosi, bamvovese vo: “Dodokolo, yuvula Nzambi, twazaya kana vo nkangalu eto usikila.”
6 O nganga ubavovese vo: “Nuendela kuna luvuvamu. Yave okala yeno muna nzila ina nukwendela.”
7 I dianu vo, wantu yau tanu bele, balweke kuna Laisi.+ Bamwene vo nkangu wakala mo, yau kibeni bakilunga-lunganga nze esi Sidone. Mu luvuvamu bazingilanga yo lembi mona o wonga,+ kadi muna nsi yayina ke mwakala nyadi ko wababangikanga ngatu kubatokanesa. Bavavukidi esi Sidone, ke bakalanga kintwadi ye konso muntu ko.
8 Vava bavutuka kwa mpangi zau kuna Sora ye Esetaole,+ e mpangi zau babayuvuidi vo: “Aweyi kaka kuna nutukidi?”
9 Bavutwidi vo: “Tutomboka twenda kubanuanisa, kadi tumwene vo e nsi yambote kikilu. Ekuma nukatikisilanga? Ke nuzingidi ko muna kwenda vua e nsi.
10 Vava nulwaka, nuwana o nkangu una mu luvuvamu,+ e nsi mpe yasanzuka. Nzambi oyekwele yo vana moko meno, e nsi ina ke ikondelo lekwa ko.”+
11 I bosi, 600 za akala muna kanda dia Dani ana bakala ye nuaninua, basimbidi e nzila tuka kuna Sora ye Esetaole.+
12 Batombokele yo sikidisa ndo kuna Kireyate-yarimi+ muna Yuda. I kuma e fulu kiaki kiayikilwa vo Makane-dani*+ yamu unu kiaki, ina kuna este ya Kireyate-yarimi.
13 Tuka kwakuna bele kuna zunga kia miongo mia Eferaime, balueke kuna nzo a Mika.+
14 Wantu tanu ana bayenda langa e nsi a Laisi,+ bavovese mpangi zau vo: “Nga nuzeye wo vo muna nzo zazi mwina ye kidukula ye teke* ye teke kiavalwa ye teke kia sengwa?*+ Nutoma yindula dina nuvanga.”
15 Dianu vo baningamene vavana, bakotele muna nzo a toko dia Nlevi,+ muna nzo a Mika, banyuvuidi o vimpi.
16 E 600 za akala muna Anedani,+ ana bakedi ye nuaninua, batelamene vana vitu.
17 O wantu yau tanu ana bayenda langa e nsi,+ bakotele muna nzo kimana babonga e teke kiavalwa, kidukula,+ teke*+ ye teke kia sengwa.*+ (O nganga+ otelamene vana vitu ye 600 za akala ana bakala ye nuaninua.)
18 Vava bakotele muna nzo a Mika, babonga e teke kiavalwa, kidukula, teke* ye teke kia sengwa,* o nganga ubayuvuidi vo: “Nki nusalanga?”
19 Bamvutwidi vo: “Sia pi-i! Kuvovi diambu ko.* Wenda yeto, wakala se* dieto ye nganga eto. Adieyi disundidi o wete—wakala ngang’a nzo a muntu mosi+ yovo wakala ngang’a kanda diamvimba ye nzo muna Isaele?”+
20 Nganga oyangalele, obongele kidukula, teke,* teke kiavalwa+ ye wele kumosi yo nkangu.
21 Basimbidi diaka e nzil’au, bavitisi yingiana-ngiana kuna ntwala, twelezi ye lekwa yantalu.
22 Vava bavavukidi nzo a Mika, wantu ana bakala muna nzo zafinama nzo a Mika bakutakene yo landa Anedani.
23 Vava babokele Anedani, bavilukidi kwa yau yo vovesa Mika vo: “Nkia diambu una diau? Ekuma okwizilanga ye ndonga yayi?”
24 Mika ovutwidi vo: “Oyeno nubongele nzambi zame zina yavanga yo nganga, nuele kweno. Nki diaka nsidi kiau? Ekuma lungiuvulwidi vo: ‘Nkia diambu una diau?’”
25 Anedani bavutwidi vo: “Kutumbula nding’aku kwa yeto ko, kimana akwa makasi balembi kunuanisa yo vidisa moyo aku ye mioyo mia esi nzo aku.”
26 Anedani basimbidi nzil’au; Mika wau kamwene vo bansundidi e ngolo, ovilukidi yo vutuka kuna nzo andi.
27 Anedani vava babongele e lekwa ina Mika kavanga, kumosi yo nganga, bele kuna Laisi+ kwa nkangu wazingilanga mu luvuvamu yo lembi mona o wonga.+ Babavondele muna nsosolo yo yoka mbanza muna tiya.
28 Ke mwakala mvuluzi ko, kadi Laisi yavavuka ye Sidone, ke bakala ye diambu ye konso muntu ko. Yakala vana ndimb’a Bete-rekobe.+ Batungulwidi e mbanza yo zingila mo.
29 Vana ntandu, bayikidi e mbanza vo Dani,+ bavene yo nkumbu a Dani wa se diau, ona wawutwa kwa Isaele.+ Entete, Laisi yayikilwanga.+
30 I bosi, Anedani bakivangila teke kiavalwa,+ Yonatane+ wa mwan’a Ngeresome+ wa mwan’a Mose, oyandi yo wan’andi bakedi se anganga muna kanda dia Dani yamuna lumbu kina nkangu wanatwa muna kinkole.
31 Batelamese teke kiavalwa kina Mika kavanga, ekolo kiawonso e nzo a Nzambi aludi yakala muna Silo.+
Mvovo vana yand'a lukaya
^ Mvovo wa sina: “vua.”
^ Ina ye nsasa vo: “Ndo a Dani.”
^ Yovo “nzambi za esi nzo.” Mvovo wa sina: “zumbi.”
^ Yovo “teke kiazunzwa.”
^ Yovo “teke kiazunzwa.”
^ Yovo “nzambi za esi nzo.” Mvovo wa sina: “zumbi.”
^ Yovo “nzambi za esi nzo.” Mvovo wa sina: “zumbi.”
^ Yovo “teke kiazunzwa.”
^ Mvovo wa sina: “Batika koko omo nu’aku.”
^ Yovo “nludiki.”
^ Yovo “nzambi za esi nzo.” Mvovo wa sina: “zumbi.”
