Afundisi 21:1-25
-
E kanda dia Benyamini ke difukisu ko (1-25)
21 Aneyisaele badia e ndofi kuna Misepa,+ oku vo: “Ke mosi ko vava twina ovana mwan’andi ankento kwa musi Benyamini kakala se nkaz’andi.”+
2 O nkangu ulweke kuna Betele,+ bavuende vana ndose a Nzambi aludi yakuna masika, bakazidi yo bokomoka ye dilu.
3 Bavovele vo: “E Yave wa Nzambi a Isaele, ekuma ediadi divangamene muna Isaele? Ekuma o unu vakondelo kanda dimosi muna Isaele?”
4 Vava kuma kwakia, basikamene muna mene-mene, batungidi vo e ziku, batambikidi tukau twangioka ye tukau twa ungudi.+
5 Nkangu a Isaele uvovele vo: “Aki nani muna makanda mawonso ma Isaele ke batombokele ko mu lungalakana vana ndose a Yave?” kadi badia ndofi anene vo ndiona ke kuyisunzula ko vana ndose a Yave kuna Misepa, vondwa kevondwa.
6 Nkangu a Isaele bafwididi mpangi au Benyamini e nkenda. Bavovele vo: “O unu vafukisu kanda dimosi muna Isaele.
7 Awana basidi, adieyi tuvanga muna kubavavila akento, wau vo ndofi twadia vana ndose a Yave+ vo ke tukubavana wan’eto amakento ko bakala akazi au?”+
8 Bayuvuidi vo: “Muna makanda ma Isaele, nkia kanda ke ditombokele ko vana ndose a Yave kuna Misepa?”+ Bamwene vo ke mosi ko kuna Yabese-Ngiladi wayenda kuna ndo muna nkutakani.
9 Vava kiatangwa o nkangu, bamona vo ke mosi ko muna esi Yabese-ngiladi wakala vo.
10 I dianu vo e nkutakani itwikidi kwakuna, 12.000 ma mabamba-ngolo. Babakanikini vo: “Nuenda vonda esi Yabese-ngiladi muna nsosolo, ye akento ye yingiana-ngiana.+
11 I wau wuwu nuvanga: Konso yakala ozeye nkento yovo nkento ozeye yakala, numvonda.”
12 Basolwele muna esi Yabese-ngiladi 400 za ndumba bena vo mienze, ana ke bazeye yakala ko. Babatwese kuna ndo kuna Silo,+ ina muna Kenani.
13 E nkutakani yawonso itwikidi nsangu kwa Anebenyamini ana bakala kuna tadi dia Rimone+ yo kubalomba vo bavanga ungudi.
14 Muna kuma kiaki, wan’amakal’a Benyamini bavutukidi muna ntangwa yayina. Babavene akento ana basala o moyo muna akento a esi Yabese-ngiladi,+ kansi ke babafwana ko.
15 O nkangu umwene nkenda mu kuma kia dina diabwila Benyamini,+ kadi Yave watwasa mpambani muna makanda ma Isaele.
16 Akuluntu a nkutakani bavovele vo: “Adieyi tuvanga muna vava akento mu kuma kia awaya basidi, wau vo akento awonso a Benyamini bafukiswa?”
17 Bavovele vo: “Wan’a Benyamini ana basidi moyo, bafwete kala kaka muna vua diau kimana muna Isaele mwalembi fukiswa kanda dimosi.
18 Oyeto ka tulendi kubavana wan’eto amakento ko se akazi au, kadi wan’a Isaele badia ndofi vo: ‘Wasibwa ndiona ovana nkento kwa musi Benyamini.’”+
19 Bavovele vo: “Mvu ke mvu, kuna Silo+ kukalanga e lambu dia Yave, kuna node a Betele, muna nzil’a este itombokanga tuka kuna Betele yaku Sekeme yakuna sude a Lebona.”
20 I dianu bakanikini wan’a makala a Benyamini vo: “Nuenda swekamena muna mpatu za vinyu.
21 Vava numona wan’amakento a Silo bevaika bakina e kinzieta, ozevo nuvaika muna mpatu za vinyu, konso muntu kabaka nkento muna wan’amakento a Silo. I bosi, nuvutuka kuna nsi ya Benyamini.
22 Avo mase mau yovo mpangi zau bezidi kutuyidimina, oyeto tukubavovesa vo: ‘Nubasonga ntim’a mvevo mu kuma kieto, kadi ka tulendele baka akento afwana ko muna vita+ mu vana kwa konso muntu, oyeno kele vo nuabavana akento, nkanu nuadi nata.’”+
23 Wan’amakal’a Benyamini bavangidi wo, konso muntu obongele nkento muna awana bakinanga. I bosi, bavutukidi muna vua diau yo tungulula e mbanza zau+ yo kala mo.
24 Aneyisaele bamwangane tuka kwakuna, konso muntu wele kwa kanda diandi ye vumu kiandi, tuka kwakuna bele kwau konso muntu kuna vua diandi.
25 Muna lumbu yayina, ke mwakala ntinu ko muna Isaele.+ Konso muntu wavanganga dina kamonanga vo diansongi vana meso mandi.*
Mvovo vana yand'a lukaya
^ Yovo “dina kayindulanga vo diansongi.”
