Afundisi 3:1-31
3 Eyayi i zula kasisa Yave kimana yatonta Isaele yawonso, ana ke banuana vita za Kenani ko+
2 (mpasi vo mbandu za Aneyisaele zina zilanda bazaya e vita, i sia vo, awana ke bateka zo zaya ko):
3 awaya i mfumu tanu za Afelesetia+ ye Anekenani awonso, ye esi Sidone+ ye Anekivi+ ana bazingilanga muna Miongo mia Lebanone+ tuka kuna Mongo a Bale-kemone yakuna Lebo-Kamati.*+
4 Basala kimana wan’a Isaele batontelwa muna yau, mu zaya kana vo belemvokela nkanikinu mia Yave mina kavana kwa mase mau muna Mose.+
5 Dianu vo Aneyisaele bakala vana vena Anekenani,+ Anekete, Aneyamore, Aneperese, Anekivi ye Aneyebuse.
6 Basompa wana amakento a zula yayi, bavana mpe wan’au amakento kwa wan’amakala a zula yayi, bayantika sadila nzambi zau.+
7 Dianu vo Aneyisaele bavangidi mambu mambi vana meso ma Yave, bavilakene Yave wa Nzambi au yo sadila teke ya Bale+ ye mavindi mavauka.*+
8 I dianu makasi ma Yave mafusukidi muna Isaele, ubayekwele* vana moko ma Kusani-risataimi wa ntinu a Mesopotamia.* Aneyisaele basadidi Kusani-risataimi mvu nana.
9 Vava Aneyisaele baboka kwa Yave,+ o Yave obundumwini mvuluzi kimana kavuluza Aneyisaele,+ Oteniele+ wa mwan’a Kenaze wa nleke a Kalebe.
10 Mwand’a Yave wizidi muna yandi,+ okitukidi se mfundisi a Isaele. Vava kayenda nuana e vita, Yave oyekwele Kusani-risataimi wa ntinu a Mesopotamia* vana moko mandi, osundidi Kusani-risataimi e ngolo.
11 I bosi, e nsi yavuvama mu mvu 40. Oteniele wa mwan’a Kenaze ofwidi.
12 Aneyisaele bavangidi diaka mambu mambi vana meso ma Yave.+ O Yave oyambwidi vo Engelone wa ntinu a Moabe+ kasunda Isaele e ngolo, kadi bavangidi mambu mambi vana meso ma Yave.
13 Ubatwasidi diaka Aneyamone+ yo Aneyamaleke.+ Banuanisi Isaele yo baka mbanz’a maba.+
14 Aneyisaele mvu 18 basadila Engelone wa ntinu a Moabe.+
15 I bosi, Aneyisaele babokele Yave,+ dianu vo Yave ubabundumwini mvuluzi,+ Eude+ wa mwan’a Ngera wa Mbenyamini+ wa nkwa lumonso.+ I bosi, Aneyisaele batwikidi lukau kwa Engelone wa ntinu a Moabe vana moko ma Eude.
16 Muna kolo kiakina, Eude uyivangidi e nsosolo wa meno mole, o lambuka kwandi kinkoso kimosi,* osidi wo kuna nsi a mvuatu muna sina dia kulu kwalunene.
17 I bosi osunzwidi lukau kwa Engelone wa ntinu a Moabe. Engelone wanene kikilu kakala.
18 Vava Eude kamana tambika lukau, osindikidi wantu ana banata lukau.
19 Kansi, vava kalweke vana teke yavalwa* kuna Ngilengale,+ ovutukidi yo vova vo: “E ntinu, diambu dia mbumba ngina diau.” O ntinu ovovele vo: “Kal’e pi-i!” Muna diadi, selo yandi yawonso bavaikidi.
20 Eude umfinamene ekolo kavuende yandi mosi muna suku dia ntandu diazizima. Eude ovovele vo: “Nsangu zitukidi kwa Nzambi itwasidi.” Otelamene vana kunda kiandi kia kimfumu.
21 Eude olambwidi koko kwalumonso, ovolele nsosolo muna sina dia kulu kwalunene, unsukidi wo muna vumu.
22 E mbele ikotele kumosi yo mva,* o mazi mafukidi o nsosolo, kadi Eude kavolele nsosolo muna vumu kiandi ko, e mvindu a vumu ivaikidi.
23 Eude ovaikidi, ozikidi yo bindika e yelo ya suku dia ntandu.
24 Vava kavaikidi, selo yandi bavutukidi yo mona vo e suku dia ntandu diabindama. Bavovele vo: “Nanga vumu kevevolanga* muna suku diakati diazizima.”
25 Bavingidi yavana bayantikidi tokana. Kansi vava bamwene vo kaziudi e yelo ya suku dia ntandu ko, babongele nsabi yo ziula yo. Bamwene mfumu au obukamene vana ntoto, wafwa.
26 Ekolo bavingilanga, Eude otinini. Oviokele vana vena teke yavalwa*+ yo lwaka kuna Seyira.
27 Vava kalueke, osikidi mpungi+ muna zunga kia miongo mia Eferaime;+ Aneyisaele bakulumukini yandi tuka kuna zunga kia miongo, oyandi kuna ntwala.
28 Ubavovese vo: “Nundanda, kadi Yave oyekuele mbeni zeno Anemoabe vana moko meno.” Banlende, babakidi masau ma Yodani mu kakidila Anemoabe, ke bayambwidi muntu ko kasauka.
29 Muna ntangwa yayina, bavondele tezo kia 10.000 ma Anemoabe,+ awonso akwa ngolo ye makesa; ke vavuka kana nkutu mosi ko.+
30 Muna lumbu kiakina e Isaele yatufakesa Moabe; e nsi yavuvama mu 80 lwa mvu.+
31 Ona wanlandila i Sanga+ wa mwan’a Anati ona wavonda 600 za Afelesetia+ muna nzwadi a ngombe;+ yandi mpe wavuluza Isaele.
Mvovo vana yand'a lukaya
^ Yovo “fula dia Kamati.”
^ Tala Nsas’a Mvovo.
^ Mvovo wa sina: “ubatekele.”
^ Mvovo wa sina: “Arã-Naaraim.”
^ Mvovo wa sina: “Arã-Naaraim.”
^ Nanga, “fulu kia matadi.”
^ Yovo “mvini.”
^ Mvovo wa sina: “Nanga malu mandi kafukidi.”
^ Nanga, “fulu kia matadi.”
