Afundisi 6:1-40
6 Kansi, Aneyisaele bavangidi diaka mambu mambi vana meso ma Yave,+ muna kuma kiaki, Yave ubayekwele vana moko ma Midiani mu mvu nsambwadi.+
2 O moko ma Midiani masundidi Isaele e ngolo.+ Muna kuma kia Midiani, Aneyisaele bayivangidi fulu ya swamina* muna miongo, muna nduka ye muna fulu ina vo yampasi mu lwaka.+
3 Vava Isaele kakunanga e mbongo, esi Midiani ye esi Maleke+ ye esi Este+ babanuanisanga.
4 Bele kubalwakila yo fwasakesa mbongo a nsi yakuna Ngaza, ke basisidi madia ko muna Isaele ngatu mameme, ngombe yovo mabuluku.+
5 Kadi bayizanga ye twelezi yau ye nzo zau za ngoto nga ulolo wa makonko,+ oyau ye samo zau zilembi tangakana,+ bakotanga muna nsi yo fwasakesa yo.
6 Vo i Isaele yasukama kikilu mu kuma kia Midiani; Aneyisaele balombele lusadisu kwa Yave.+
7 Vava Aneyisaele baboka kwa Yave mu kuma kia Midiani,+
8 Yave otumini ngunza kwa Aneyisaele, ubavovese vo: “I wau wuwu kavovele o Yave wa Nzambi a Isaele: ‘Mono yanukatula muna Engipito yo kunuvaikisa muna nsi ya ubundu.*+
9 Mono yanuvuluza vana moko ma Engipito ye abangiki eno awonso, yabayinga vana ndose eno yo kunuvana e nsi au.+
10 Yanuvovesa vo: “Mono i Yave wa Nzambi eno,+ ke numoni wonga wa nzambi za Aneyamore ko, wau nukalanga omu nsi au.”+ Kansi, oyeno ke nuangwila ko.’”+
11 I bosi, mbasi a Yave wizidi, + ovuende kuna nsi a nti anene una wakala kuna Ofera ivuilu kwa Yoase wa musi kanda dia Abieze.+ O Ngidone wa mwan’andi+ wabundanga witi muna kaminu dia vinyu kimana kasweka yo mu kuma kia Anemidiani.
12 Mbasi a Yave omonekene kwa yandi, umvovese vo: “O Yave wina yaku,+ e ngeye kesa dia nkuma.”
13 Ngidone umvovese vo: “Undoloka, e mfumu ame, avo Yave wina yeto, ekuma mambu mama mawonso matulwakidi?+ Akweyi mena mavangu mandi masivi mana batuvovesa mase meto,+ oku vo: ‘Nga ke Yave ko watuvaikisa muna Engipito e?’+ Owau Yave utubembwele+ yo kutuyekola vana moko ma Midiani.”
14 Yave otadidi Ngidone yo kumvovesa vo: “Wenda wavuluza Isaele vana moko ma Midiani muna ngolo zaku.+ Nga ke mono ko itumini e?”
15 Ngidone umvutwidi vo: “Undoloka, e Yave. Aweyi ndenda vuluzila Isaele? E vumu kiame kilutidi* okeva muna kanda dia Manase, omono nsundidi sakalala muna nzo a se diame.”
16 Kansi, Yave umvovese vo: “Wau vo ikala yaku,+ otufakesa Midiani nga muntu mosi.”
17 Ngidone umvovese vo: “Avo mbweno e dienga ova ndose aku, unsonga sinsu vo ngeye omokene yame.
18 Dodokolo, kukatuki vava ko yavana itwasa lukau lwame, yasunzula lo ova ndose aku.”+ Umvutwidi vo: “Ikala vava yavana ovutuka.”
19 Ngidone okotele muna nzo, okubikidi mwan’a nkombo, obongele efa mosi* ya mfumfu ovangidi mbolo zakondwa mfuna.+ Osidi mbizi muna kitunga, ye supu muna nzungu; untwasidi yo kuna nsi a nti anene.
20 E mbasi a Nzambi aludi umvovese vo: “Bonga e mbizi ye mbolo zakondwa mfuna, wasia zo vana ntandu a tadi, yitila zo supu.” Ovangidi wo.
21 Mbasi a Yave olambwidi nkau una vana koko kwandi, oviakanese nsuk’a nkau muna mbizi ye mbolo zakondwa mfuna; o tiya tufutumukini muna tadi, tubomwene mbizi ye mbolo zakondwa mfuna.+ I bosi, mbasi a Yave ovididi vana meso mandi.
22 Ngidone obakwidi wo vo i mbasi a Yave.+
Vana vau Ngidone ovovele vo: “Ekwe, e Mfumu Yave, kadi mbwene mbasi a Yave mantalani!”+
23 Kansi, Yave umvovese vo: “Luvuvamu oko wina. Kumoni wonga ko;+ kufwa ko.”
24 Muna kuma kiaki, Ngidone otungidi vo e ziku mu kuma kia Yave, oyikidi dio vo Yave-salome.*+ Dina muna Ofera ya Aneyabieze yamu unu kiaki.
25 Muna fuku wauna Yave umvovese vo: “Bonga mwan’a ngombe a se diaku, ona wanzole wa mvu nsambwadi. Bangula e ziku dia Bale dia se diaku yo zenga e vindi diavauka* dina vana ndambu a ziku.+
26 Vava otungila Yave wa Nzambi aku e ziku vana ntandu a swekameno diadi diangolo muna matadi matoma kubikwa, bonga mwan’a ngombe wanzole untambika se lukau lwa ngioka muna nkesona za vindi diavauka* dina kazengele.”
27 Ngidone obongele kumi dia selo yandi, ovangidi una Yave kamvovese. Kansi, wau kamwene o wonga wa nzo a se diandi ye nkangu a mbanza, ovangidi wo mu fuku, ke mu mwini ko.
28 Vava nkangu a mbanza usikamene mu mene-mene, bamwene vo e ziku dia Bale dibangwilu, e vindi diavauka* dikedi vana ndambu dizengelo. O mwan’a ngombe wanzole otambikilu vana ziku dina ditungilu.
29 Bayuvuidi muntu yo nkwandi: “Nani ovangidi diambu diadi?” Vava batomene fimpa, bavovele vo: “Ngidone wa mwan’a Yoase ovangidi dio.”
30 O nkangu a mbanza uvovese Yoase vo: “Vaikisa mwan’aku oku mbazi, kafwete fwa, kadi obangwidi e ziku dia Bale yo zenga e vindi diavauka* dikalanga vana ndambu a ziku.”
31 Yoase+ ovovese awonso bantelamene vo: “Nga nuzolele tanina Bale? Nga yeno nukumvuluza? Ndiona ozolele kuntanina, vondwa kevondwa mu mene wau.+ Avo yandi nzambi, yambula yandi kibeni kakitanina,+ wau vo e ziku diandi dibangwilu.”
32 E lumbu kiakina, oyikidi Ngidone vo Yerubale,* ovovele vo: “Yambula Bale kakitanina, wau vo e ziku diandi dibangwilu.”
33 Anemidiani awonso+ ye Aneyamaleke+ ye esi Este balungalakene;+ basaukidi nkoko yo sikidisa ndo kuna Ndimb’a Yizerele.
34 I bosi, mwand’a Yave wizidi muna Ngidone,+ osikidi e mpungi,+ Anebieze+ banlende.
35 Otumini anati a nsangu kwa Manase yawonso, oyau mpe banlende. Otumini mpe anati a nsangu kwa Asere, Zebulune ye Nafetali, bele wanana yandi.
36 Ngidone ovovese Nzambi aludi vo: “Avo mu mono ovuluzila Isaele, wauna wasila o nsilu,+
37 i sia wika wa meme muna bundilu. Avo muna wika kaka mukala dime,* vo i ntoto wawonso wayuma, ozevo izaya wo vo mu mono ovuluzila Isaele, wauna wasia o nsilu.”
38 I diau mpe diavangama. Vava kasikamene muna mene-mene, okamini e mika, muvaikidi dime* dizadisi mbungwa anene a maza.
39 Ngidone ovovese Nzambi aludi vo: “Kumfungila makasi ko, yambula yalomba diaka diambu dimosi. Dodokolo, yambula yatonta diaka ntonta mosi muna mika mia meme. Yambula e mika miayuma, e dime* diakala kaka vana ntoto.”
40 I diau mpe kavangidi o Nzambi muna fuku wauna; mika kaka mikedi miayuma, kansi e dime* dikedi vana ntoto.
Mvovo vana yand'a lukaya
^ Nanga, “malundilu ma nsi a ntoto.”
^ Mvovo wa sina: “nzo a ubundu.”
^ Mvovo wa sina: “mafunda mame malutidi.”
^ Ina ye nsasa vo: “Yave i Luvuvamu.”
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Ina ye nsasa vo: “Yambula Bale Kayitanina.”
^ Yovo “lowa.”
^ Yovo “lowa.”
^ Yovo “lowa.”
^ Yovo “lowa.”
