Afundisi 8:1-35
8 Aneferaime bavovese Ngidone vo: “Nkia diambu diadi utuvangidi? Ekuma walembi kutubokelela vava wayele nuanisa Midiani?+ Batomene kuntantanesa.+
2 Ngidone ubavutwidi vo: “Nkia diambu mpangidi dilenda fwanana ye dina nuvangidi? E nsuvil’a uva za Eferaime,+ nga ke isundidi nsâlu wa uva za Abieze ko e?+
3 Muna moko meno o Nzambi i kayekwele mfumu za Midiani, Orebe yo Zebe;+ ozevo adieyi yadi vanga difwanana ye dina nuavangidi?” Vava kavovele diambu diadi, makasi mau makulukidi.*
4 Ngidone olweke kuna Yodani, osaukidi. Oyandi ye 300 za wantu bakala yandi, bayoya, kansi bakwamanana lakama mbeni zau.
5 Muna kuma kiaki, ovovese esi Sukote vo: “Dodokolo, nuvana madia* kwa wantu bekundandanga, kadi bayoyele, wau ndakamene Zeba yo Salemuna, ntinu mia Midiani.”
6 E mfumu za Sukote bavovele vo: “O moko ma Zeba yo Salemuna nga mena kala va moko maku, kimana twavana madia kwa makesa maku?”
7 O Ngidone ovutwidi vo: “O Yave vava keyekola Zeba yo Salemuna va moko mame, ozevo mu mvanga ye nsende za makanga ikunuwandila.”+
8 Tuka kwakuna, otombokele kuna Penuele, ubalombele mpe madia. Kansi esi Penuele bamvutwidi una bavutula esi Sukote.
9 Ovovese esi Penuele vo: “Vava ivutuka kuna luvuvamu, bangula ibangula nzo yandá yayi.”+
10 O Zeba yo Salemuna bakala kuna Kanko ye makesa mau, tezo kia 15.000 ma makesa. Awaya i yau basala muna vu kiawonso kia esi Este,+ kadi 120.000 ma makesa ana bakala ye nsosolo, bavondwa.
11 Ngidone otombokele muna nzila ya awana bakalanga muna saba kuna este a Noba ye Yongeba,+ otufakese ndo, kadi ke yakala yo lutaninu ko.
12 Zeba yo Salemuna batinini, ubalakamene. Obakidi ntinu miole mia Midiani, Zeba yo Salemuna yo zakamesa ndo yawonso.
13 Ngidone wa mwan’a Yoase otukidi kuna vita, oviokele muna mongo a Kerese.
14 Muna nzila obakidi toko dimosi dia musi Sukote, unyuvuidi. O toko unsonekene nkumbu za mfumu ye akuluntu a Sukote, awonso wantu 77.
15 Wele kuna kwa esi Sukote, ovovele vo: “Nutala o Zeba yo Salemuna, ana nuampezela vo: ‘O moko ma Zeba yo Salemuna, nga mena kala va moko maku, kimana twavana madia kwa nkangu aku ana bayoyele?’”+
16 Obakidi akuluntu a mbanza, olongele esi Sukote muna mvanga ye nsende za makanga.+
17 Obangwidi nzo yandá ya Penuele,+ yo vonda esi mbanza.
18 Oyuvuidi Zeba yo Salemuna vo: “Nkia mpila wantu nuavonda kuna Tabo?” Bavutwidi vo: “Bakala nze ngeye, awonso nze wan’a ntinu.”
19 Ngidone ovovele vo: “Mpangi zame bakala, wan’a ngudi ame. Ndidi e ndofi muna Yave wa Nzambi amoyo, kele vo nuabavuluza, nga kiadi kunuvonda ko.”
20 Ovovese Yete wa mwan’andi antete vo: “Telama wabavonda.” Kansi e nleke kavolele nsosolo ko; wonga kamwene, kadi nleke kwandi.
21 O Zeba yo Salemuna bavovele vo: “Avo u kesa kikilu, telama watuvonda ngeye kibeni.” O Ngidone otelamene, ovondele Zeba yo Salemuna,+ obongele nkembo* zina zakala muna nsingu za samo zau.
22 I bosi, Aneyisaele bavovese Ngidone vo: “Nutuyala, ongeye yo mwan’aku, yo ntekelo aku, kadi ngeye utuvuluzi vana koko kwa Midiani.”+
23 Ngidone ubavutwidi vo: “Kikunuyala ko, ngatu mwan’ame kanuyala. Yave kaka okunuyala.”+
24 Ngidone ubavovese diaka vo: “Lekwa nzolele kunulomba: konso muntu kampana lunga ya nzunu muna sanzu diandi.” (Kadi Aneyisemaele lunga ya wolo bavuatanga muna nzunu.)+
25 Bavutwidi vo: “Kuna mvevo tuvanina mio.” Bayalumwini mvuela, konso muntu otubidi vo lung’a nzunu kabongele muna sanzu diandi.
26 E zitu dia lunga yawonso ya nzunu ina kalombele, 1.700 za sekele* za wolo; lembi tanga nlunga mia nsingu, lunga ya matu, ye mvuatu miavangilwa muna mika mia se kia nduwa mia atinu a Midiani ye nsanga mia nsingu za samo zau.+
27 Ngidone ovangidi kidukula muna wolo wauna,+ osidi kio muna mbanz’andi, muna Ofera;+ Isaele yawonso yele kio sambila.*+ Kikitukidi se sokolo kwa Ngidone ye kwa esi nzo andi.+
28 E Midiani+ yasakidikwa vana vena Aneyisaele, ke babavumisa diaka ko.* Muna lumbu ya Ngidone e nsi yavuvama mu mvu 40.+
29 O Yerubale+ wa mwan’a Yoase ovutukidi kuna nzo andi, okedi mûna.
30 O Ngidone 70 lwa wana kawuta,* kadi akento ayingi kakala yau.
31 O makangu mandi mpe kuna Sekeme, wanwutila mwan’ayakala, wamvana nkumbu Abimeleke.+
32 Ngidone wa mwan’a Yoase ofwididi muna ununu wafwana, ozikilu muna ziami kia Yoase wa se diandi muna Ofera ya Aneyabieze.+
33 Vava Ngidone kafwa kaka, Aneyisaele bavutukidi sambila* teke ya Bale,+ basolele Bale-berite se nzambi au.+
34 Aneyisaele ke bayindula Yave wa Nzambi au ko,+ ona wabavuluza vana moko ma mbeni zau zawonso zabazunga;+
35 ngatu songa walakazi* kwa nzo a Yerubale, i sia vo, Ngidone, muna mawete mawonso kavanga kwa Isaele.+
Mvovo vana yand'a lukaya
^ Mvovo wa sina: “mwand’au ulembamene muna yandi.”
^ Mvovo wa sina: “mbolo.”
^ I sia vo, lekwa yavienga.
^ Yovo “Isaele yawonso yele kio tela e zumba kia mwanda.”
^ Mvovo wa sina: “ke bavumbula diaka ntu ko.”
^ Mvovo wa sina: “70 lwa wana kakala lwau, batuka muna nim’andi.”
^ Mvovo wa sina: “tá zumba kia mwanda ye.”
^ Mvovo wa Kiyibere una ye nsasa vo: “zola ye walakazi ulembi suka.” Tala Nsas’a Mvovo. “Zola kulembi suka.”
