Afundisi 9:1-57
9 Kuna kwalanda, Abimeleke+ wa mwan’a Yerubale wele kuna Sekeme kuna kwa mpangi za ngudi andi ye kwa vumu kiawonso kia nzo a se dia ngudi andi, ubavovese vo:
2 “Dodokolo, nuyuvula afidi* awonso a Sekeme, ‘Adieyi i diambote kwa yeno, nuayalua kwa 70 lwa wan’a Yerubale+ yovo mosi kaka kanuyala? Nusungamena wo vo mono i menga meno.’”*
3 Muna diadi, mpangi za ngudi andi bazayisi diambu diadi kwa afidi awonso a Sekeme, vo i yau, luzolo lwa landa Abimeleke bakala lwau muna ntima, kadi bavovele vo: “Oyandi i mpangi eto.”
4 Bamvene 70 lwa sekele za palata zatuka muna nzo* a Bale-berite,+ Abimeleke ofutidi zo kwa mazowa ye fwafwala ya wantu ana banlende.
5 I bosi wele kuna nzo a se diandi kuna Ofera,+ ovondele mpangi zandi,+ 70 lwa wan’a Yerubale vana tadi dimosi. Yotame kaka wa mwan’a nsuk’a Yerubale wavuluka, kadi swama kaswama.
6 Afidi awonso a Sekeme ye Bete-milo bakutakene, bayadikidi Abimeleke se ntinu,+ kuna ndambu a nti anene, vana lunzi diakala muna Sekeme.
7 Vava bazayisi wo kwa Yotame, vana vau wele telama vana ntandu a Mongo a Ngerezime,+ ubavovese mu nding’a ngolo, oku vo: “Nungwa, yeno afidi a Sekeme, o Nzambi mpe okunuwá.
8 “Lumbu kimosi, e nti miele yadika* o ntinu au. Mivovele kwa olive vo: ‘Utuyala.’+
9 Kansi, olive ubavovese vo: ‘Nga yasisa mazi* mame mevananga nkembo kwa Nzambi yo wantu, ngienda vuembela vana nti miankaka?’
10 E nti mivovese nsanda vo: ‘Wiza, watuyala.’
11 Kansi, o nsanda ubavovese vo: ‘Nga yasisa nzenzo ame ye bundu yame yambote, ngienda vuembela vana nti miankaka?’
12 E nti mivovese nsinga a vinyu vo: ‘Wiza, watuyala.’
13 Nsinga a vinyu ubavovese vo: ‘Nga yasisa vinyu ame yampa ina imwesanga Nzambi yo wantu e kiese, ngienda vuembela vana nti e?’
14 I bosi, nti miawonso mivovese mvanga vo: ‘Wiza watuyala.’+
15 O mvanga uvovese nti vo: ‘Avo nuzolele kieleka yanuyala,* ozevo nuiza tinina omu kini kiame. Avo ke wau ko, yambula mwavaika tiya muna mvanga yo bomona nsedele mia Lebanone.’
16 “Nga diansongi ye ziku nuvangidi wau nutumbikidi Abimeleke se ntinu e?+ Nga ngemba nuasonga kwa Yerubale ye nzo andi yo kumvanga o wete una umfwanukini e?
17 O se diame wanunuanina+ yo sia moyo andi mu vonza muna kunuvuluza vana moko ma Midiani.+
18 Kansi, o unu nutelamen’e nzo a se diame nuvondele wan’andi, 70 lwa wantu vana tadi dimosi.+ Nutumbikidi Abimeleke wa mwan’a ntaudi andi ankento+ se ntinu kuna kw’afidi a Sekeme wau vo mpangi eno.
19 O unu, avo diansongi ye ziku nuvangidi kwa Yerubale ye nzo andi, numwena Abimeleke e kiese, oyandi mpe kanumwena kiese.
20 Avo ke wau ko, yambula tiya twavaika muna Abimeleke twabomona afidi a Sekeme yo Bete-milo.+ Muna afidi a Sekeme yo Bete-milo mwavaika mpe tiya twabomona Abimeleke.”+
21 Yotame+ otinini mu kuma kia Abimeleke wa mpangi andi, wele zingila kuna Beya.
22 Abimeleke oyadidi Isaele mvu ntatu.
23 Nzambi otwese ntantani* vana vena Abimeleke ye afidi a Sekeme, esi Sekeme bayekwele Abimeleke.
24 Ediadi diavangama kimana 70 lwa wan’a Yerubale ana bavondwa balandilwa e kunda, menga mau makala vana ntu a Abimeleke wa mpangi au+ ye muna afidi a Sekeme wau bansadisa mu vonda mpangi zandi.
25 Ozevo, afidi a Sekeme batumini wantu benda swekama vana mbata za miongo mu nuanisa Abimeleke. Bayiyanga awonso baviokelanga mu nzila ina bakala. Kuna kwalanda, e diambu disamwinu kwa Abimeleke.
26 Ngale wa mwan’a Ebede ye mpangi zandi bele kuna Sekeme,+ afidi a Sekeme bambundidi e vuvu.
27 Bele kuna yana, bakutikidi uva muna mpatu zau za vinyu, bakamini zo, bakubikidi e lambu, bele muna nzo a nzambi au,+ badidi, banuini, basibidi Abimeleke.
28 Ngale wa mwan’a Ebede ovovele vo: “Nani i Abimeleke, nani i Sekeme, ona tufwete sadila? Ke yandi ko i mwan’a Yerubale?+ O Zebule ke yandi ko i nsunzudi andi? Nusadila nkangu a Kamo wa se dia Sekeme! Ekuma tufwete sadila Abimeleke?
29 Kele vo nkangu wau wakala mu wisa kiame, yadi katula Abimeleke.” I bosi ovovese Abimeleke vo: “Wokesa makesa maku, wiza twanuana.”
30 Vava Zebule wa mfumu a mbanza kawidi e mvovo mia Ngale wa mwan’a Ebede, ofungidi kikilu makasi.
31 Otumini wantu kwa Abimeleke kuna kinsweki,* oku vo: “Tala, Ngale wa mwan’a Ebede ye mpangi zandi bezidi oku Sekeme, bafididi wantu muna mbanza banutelamena.
32 Owau wiza omu fuku wau, ngeye ye makesa maku, swekama muna nzanza.
33 Vava ntangwa ivaika muna mene, vaika wanuanisa e mbanza; vava Ngale yo makesa mandi kekwiza kunuanisa, vanga mawonso wantufakesa.”*
34 Abimeleke yo nkangu wawonso kakala wau batelamene muna fuku, bele swekama mu buka yá mu nuanisa Sekeme.
35 Vava Ngale wa mwan’a Ebede kavaikidi yo telama vana vitu dia mbanza, Abimeleke yo nkangu andi bavaikidi mu fulu ina bakala.
36 Ngale vava kamwene nkangu, ovovese Zebule vo: “Tala! Wantu bekulumukanga muna mbata za miongo.” Zebule umvovese vo: “Kini* kia miongo omwene kina oyindwidi vo wantu.”
37 Ngale ovovele diaka vo: “Tala, nkangu ukulumukanga muna kati kwa nsi, e buka kimosi kikwizanga muna nzil’a nti anene a Meonenime.”
38 Zebule umvovese vo: “Akweyi luna lulendo lwaku luna wavovela vo: ‘Nani i Abimeleke, ndioyu tufwete sadila?’+ Owau ke wau ko i nkangu una wabembol’e? Vaika owau, wabanuanisa.”
39 Ngale ovitidi afidi a Sekeme kuna ntwala, onuene yo Abimeleke.
40 Abimeleke unlakamene, Ngale untinini; wantu ayingi bavondelo muna nzila yakuna vitu dia mbanza.
41 Abimeleke okedi kuna Aruma, Zebule+ oyingidi Ngale ye mpangi zandi muna Sekeme.
42 Muna lumbu kialanda, o nkangu uvaikidi muna nzanza, dizayisu kwa Abimeleke.
43 Obongele nkangu ovambwidi wo mu buka tatu, basweme muna nzanza. Vava kamona nkangu uvaikidi muna mbanza, ubanuanisi yo kubatufakesa.
44 Abimeleke ye buka kakala yau, bavaikidi yo kiatama vana vitu dia mbanza, e buka yole yanuanisa awana bakala muna nzanza yo kubatufakesa.
45 Abimeleke onuanisi e mbanza lumbu kiakina kiawonso, obakidi yo. Ovondele nkangu wakala mo, obangwidi e mbanza+ yo mwanginina yo mungwa.
46 Vava mfumu zawonso za nzo yandá a Sekeme bawá wo, vana vau bakotele muna swekameno dia nzo* a Ele-berite.+
47 Disamwinu kwa Abimeleke vo mfumu zawonso za nzo yandá a Sekeme bakutakene,
48 Abimeleke yo nkangu wawonso kakala wau, batombokele kuna Mongo a Salemone. Abimeleke onete soka* vana koko, okesele tayi muna nti, osidi kio vana vembo, ovovese nkangu vo: “Nuzabuzioka, nuvanga una mpangidi!”
49 Nkangu wawonso bazengele tayi, balende Abimeleke. Basidi yo muna swekameno yo kwika dio e tiya. Dianu vo, awonso bakala muna nzo yandá ya Sekeme bafwidi, tezo kia 1.000 dia akala ye akento.
50 I bosi, Abimeleke wele kuna Tebese; onuanisi Tebese yo baka yo.
51 Vana kati kwa mbanza vakala ye nzo yandá yangolo, akala awonso ye akento ye mfumu zawonso za mbanza batinini mûna. Bakizikidi mûna yo manta kuna nludi a nzo.
52 Abimeleke wizidi kuna nzo yandá yo nuanisa yo. Ofinamene vana mwelo a nzo kimana kayoka yo.
53 Nkento mosi owende nsindulu vana ntu a Abimeleke, o ntu andi uwudikidi.+
54 Vana vau obokele selo kiandi ona wanatanga nuaninua yandi, umvovese vo: “Vola nsosolo aku, wamponda, kimana balembi vova vo, ‘Nkento umvondele.’” E selo kiandi unsukidi nsosolo, ofwidi.
55 Aneyisaele vava bamwene vo Abimeleke ofwidi, yau awonso bavutukidi kuna nzo.
56 O Nzambi i mpila yayi kavutulwidi o bi una Abimeleke kavanga kwa se diandi, wau kavonda 70 lwa mpangi zandi.+
57 Nzambi ovutwidi mpe mbi yawonso ya esi Sekeme muna ntu miau. E sibu kia Yotame+ wa mwan’a Yerubale+ kibalwakidi.
Mvovo vana yand'a lukaya
^ Nanga, “mfumu za ntoto.”
^ Mvovo wa sina: “visi ye nsuni eno.”
^ Yovo “tempelo.”
^ Mvovo wa sina: “miele kusa nti o mazi ma kintinu.”
^ Yovo “mbongo.”
^ Mvovo wa sina: “kunkusa o mazi ma kintinu kieno.”
^ Mvovo wa sina: “otwikidi mwanda wambi.”
^ Yovo “kuna ngangu.”
^ Yovo “umvanga dina o koko kwaku kulenda vanga.”
^ Yovo “ninga.”
^ Yovo “tempelo.”
^ Yovo “sengele.”
