Amose 7:1-17
7 I diau diadi kansongele o Mfumu Yave: Otwikidi e buka kia makonko vava mbongo ansuka* iyantikidi mena. I mbongo yansuka imenene vava kizengelo titi ya ntinu.
2 Vava buka kia makonko kimanisi dia titi ya nsi, mpovele vo: “E Mfumu Yave, dodokolo, loloka!+ Aweyi Yakobo kalenda vulukila?* Kadi oyandi watovoka!”+
3 I dianu vo, Yave osobele e ngindu muna diambu diadi.+ “Ke divangama ko,” u kavovele o Yave.
4 I diau diadi kansongele o Mfumu Yave: o Mfumu Yave otwikidi e tumbu muna tiya. O tiya tubomwene maza masina, tubomwene ndambu a nsi.
5 I bosi mpovele vo: “E Mfumu Yave, dodokolo, kuvangi wo ko!+ Aweyi Yakobo kalenda vulukila?* Kadi oyandi watovoka!”+
6 I dianu vo, Yave osobele ngindu muna diambu diadi.+ “Ediadi mpe ke divangama ko,” u kavovele o Mfumu Yave.
7 I diau diadi kansongele: Yave otelamene vana yaka kiatungilwa mu nsing’a nzaba, wakala ye nsing’a nzaba* vana koko.
8 Yave ungiuvuidi vo: “Amose, nki omwene?” Mpovele vo: “Nsing’a nzaba.”* I bosi Yave ovovele vo: “Nsidi nsing’a nzaba vana kati kwa nkangu a Isaele. Kikubaloloka diaka ko.+
9 Mabata ma Isaki+ nkatu mesala, e nzo zavauka za Isaele fwaswa zifwaswa;+ omono ikwiza yo nsosolo muna nzo a Yerobame.”+
10 Amaziya wa ngang’a Betele+ otumini nsamu wau kwa Yerobame wa Ntinu+ a Isaele vo: “Amose uvuandidi e mfulu vana kati kwa nzo a Isaele.+ E nsi yayi ke ilenda zizidila mambu mandi ko.+
11 Kadi i wau wuwu kavovele Amose, ‘Yerobame mu nsosolo kefwila, Isaele yalulwa iyalulwa muna nsi andi yo natwa muna kinkole.’”+
12 I bosi, Amaziya ovovese Amose vo: “Katuka e moni, wenda kuna nsi a Yuda, watambula mbolo* kwakuna, i kûna osakulwila.+
13 Kansi kusakulwila diaka mu Betele ko,+ kadi i nzo avauka ya ntinu+ ye nzo ya kintinu.”
14 Amose ovutwidi Amaziya vo: “Kiakala ngunza ko, ngatu mwan’a ngunza; kansi mvungudi yakala,+ nsanda mia sikomore yalunga-lunganga.
15 Kansi, Yave wankatula muna salu kia landa e kambi, Yave wampovesa vo: ‘Wenda, sakula kwa nkangu ame Isaele.’+
16 Owau wá diambu dia Yave: ‘Ongeye ovovele vo, “Kusakula tumbu kia Isaele ko,+ kusamuna+ tumbu kia nzo a Isaki ko.”
17 I dianu vo, i wau wuwu kavovele o Yave: “Nkento aku okituka se nkembi* muna mbanza, o wan’aku amakala ye amankento muna nsosolo befwila. E nsi aku ikayaneswa muna nsing’a nzaba, ongeye ofwila muna nsi yafunzuka; e Isaele yalulwa keyaluwa muna nsi andi yo natwa muna kinkole.”’”+
Mvovo vana yand'a lukaya
^ I sia vo, muna ngonde a Yanuali ye Fevelelo.
^ Mvovo wa sina: “telamena.”
^ Mvovo wa sina: “telamena.”
^ Nsinga usadilwanga kwa atungi muna singika e yaka.
^ Nsinga usadilwanga kwa atungi muna singika e yaka.
^ Mvovo wa sina: “wadila mbolo.”
^ Yovo “nkento a ndumba.”
