Kuna Kwa Ayibere 6:1-20
6 Dianu vo, wau tumene longoka mambu ma lubantiku+ mu kuma kia Kristu, yambula twanungunuka yavana tuzikuka,+ lembi kuba diaka nkubilwa, i sia vo, luviluku lwa ntima muna mavangu mafwa yo lukwikilu muna Nzambi,
2 longi dia luvubu, ngiambik’a moko,+ lufuluku lwa mafwa+ ye mfundis’a mvu ya mvu.
3 I diau tuvanga, avo Nzambi ozola.
4 Kadi awana bateka vewa umbakuzi+ yo yeleka lukau lwangovo lwa zulu ye awana bakituka akwa kunku muna mwand’avelela
5 ye awana bayeleka e diambu diambote dia Nzambi ye nsambu za* tandu* kikwiza,
6 kansi bavengomoka,+ ke dilendakana ko mu kubafila diaka muna luviluku lwa ntima, e kuma kadi bakoma diaka Mwan’a Nzambi vana nti yo kumfusulwisa e nsoni vana meso ma ndonga.+
7 Kadi ntoto usambulwanga kwa Nzambi vava unuanga maza ma mvula zinokanga mo yo yima e mbongo ina vo yamfunu kw’awana bevatanga wo.
8 Kansi, avo uyimini nsende ye nkeka za mfinda, ubembolwa, ke kolo ko usibwa, kuna mfoko, uyokwa.
9 Kansi azolwa, kanele vo tuvovele e mpila yayi, kuna kwa yeno tuna ye ziku kia mambu mambote, mana metwasa luvuluzu.
10 Kadi Nzambi kakondelo unsongi ko kavilakana e salu kieno yo zola nuasonga muna nkumbu andi,+ wau nuasadila avauki yo kwamanana kubasadila.
11 Kansi tuzolele vo konso muntu muna yeno kasonga e fululu kiau kimosi yo kala ye vuvu+ kiasikila yakuna mbaninu,+
12 kimana nualembi kala miolo,+ kansi nuatanginina awana bena vo muna lukwikilu yo luzindalalu i bevuilanga e nsilu.
13 Kadi o Nzambi vava kasila Abarayama o nsilu, wau vo kalendi dila muntu osundidi nene ndofi ko, ukididi e ndofi,+
14 oku vo: “Sambula kikilu ikusambula, wokesa kikilu iwokesa mbongo aku.”+
15 Abarayama wau kazindalala, wavua o nsilu wau.
16 Kadi o wantu, bedilanga e ndofi ndiona osundidi nene, e ndofi au isukisanga e mpaka zawonso, kadi kuna kwa yau e ndofi i lusikidisu lwa mambu.+
17 Diau dimosi mpe, Nzambi vava kabaka e nzengo za songa kw’awana bevua o nsilu+ vo e kani diandi ke dilendi soba ko, wasikidisila wo muna ndofi,
18 kimana muna mambu mole ke malendi soba ko, mena vo Nzambi kalendi vuna ko,+ oyeto twatinina kwa Nzambi twabaka lukasakeso lwa nkuma yo simbinina e vuvu kina twavewa.
19 E vuvu kiaki tuna kiau+ kina nze mbwa a nzaza* a mioyo mieto, kia ludi ye kiasikila, kikutukotesanga kuna nim’a rido,+
20 kuna kwakota Yesu+ ona wavita muna wete dieto, wakituka se ngang’ambuta yakwele mvu, nze kinganga kia Mankizedeke.+
Mvovo vana yand'a lukaya
^ Mvovo wa sina: “nkum’a.”
^ Tala Nsas’a Mvovo.
^ I sia vo, luvaku lusimbininanga e nzaza.
